Kamweit ong me Kin Pahtou kan
1. Dahme kahrehda irail kan me pahtou anahne kamweit?
1 Mehlahn kompoakepatail kin wia mehkot me uhdahn kamedek, mehlel ong irail kan me sohte ahneki koapworopwor en Wehio. (1 Des. 4:13) Tohto me kin kalapw pwonopwonki: ‘Dahme kahrehda aramas kin mehla? Dahme kin wiahiong irail ni ahnsou me irail mehla? I pahn pwurehng tuhwong kompoakepahi?’ Ekei sawas kan pwarada nan parakrap en mwuhr kan pwehn kihong kamweit ong irail kan me kitail kin tuhwong nan doadoahk en kalohk me kin pahtoukihla mehlahn arail peneinei de kompoakparail.—Ais. 61:2.
2. Ma tohnihmw koasoiaiong kitail me e pahtou, kitail anahne ahnsou koaros song en kalohk?
2 Sang Ihmw Lel Ihmw: Mwein tohnihmw koasoiaiong kitail me emen tohn eh peneinei ahpwtehn mehla. Kitail anahne pein idek rehtail ma tohnihmwo sansal eh nsensuwed de sengiseng ni ahnsou me eh pwarala ni wenihmw? Mie peneinei tohto me pahtou nan ihmwo? Ma ei, e mwein mwahu en dehr mihmi ahnsou werei pwehn kalohk ong irail. (Ekl. 3:1, 7) Mwein kitail kak kasalehda atail pepehm en poakehla, kihong ih doaropwe, makasihn, de brochure me konehng oh kohkohla sang irail. Mwuhr kitail kak pwurehng pwurala reh ni ahnsou me mwahu ong ih pwehn ehukihong kamweit sang Paipel.
3. Ma irair kak mweidohng, soangen iren Paipel dah me kitail ele pahn kasalehiong tohnihmwo me pahtou?
3 Ni ahnsou teikan, kitail ele medewe me kitail kak koasoi laud sang dahme kitail tepin koasoi. Mendahki met kaidehn ahnsou en kapwungala madamadau sapwung kan, kitail ele kak wadek reh iren Paipel me pid duwen kaiasada. (Sohn 5:28, 29) De kitail mwein kak kasalehiong dahme Paipel mahsanih duwen irair en melahr akan. (Ekl. 9:5, 10) Iren Paipel ehu me pid kaiasada mwein kihong ih kamweit. (Sohn 11:39-44) Kitail pil kak medewe lepin mahsen en koapworopwor kan sang Siohwa me ohl lelepek Sohp kasalehda. (Sohp 14:14, 15) Mwohn kitail pahn kohkohla, kitail kak kihla doaropwe me Koapwoaroapwoar Dahieu Mie Ohng Kompoakpahmw Mehlahr Akan? De kitail ele pahn kihdi pwuhken Loalokong, kasalehda irelaud 9, oh koasoanehdi en koasoipene oaralap wet ni ahnsou me kitail pahn pwurehng pwurala.
4. soangen ahnsou dah teikan kitail kak kihong kamweit?
4 Ni Ahnsou Teikan: Ekei ahnsou, pakair en mehla me pwarada nan nuhspehpa de redio kihong kitail en ntingihdi kisinlikou en kamweit mwotomwot ong tohnpeneinei kan me pahtou. Nan ehu irair, mwurin eh pwoud mehla emen ohl oh nah serepein alehdi kisinlikou ehu me ekei doaropwe iang, ira kohla imwen sounkalohk oh idek: “Kowe me kadarodohng ie kisinlikou wet? Eri, I men kalaudehla ei wehwehki Paipel!” Ohlo oh nah serepein pwungki en wia onop Paipel oh tapihada iang towehda mihding en mwomwohdiso.
5. Dahme kahrehda kitail anahne rapahkihda ahnsou mwahu en kamweit ong me pahtou?
5 Irail me pahtou kin ahneki madamadau en men rong Mahsen en Koht sang irail kan me nsenohkihte ahneki ahnsou kaperen. Kitail koaros anahne rapahkihda ahnsou mwahu en kihda kamweit ong irail kan me pahtou pwehki mehlahn kompoakparail.