Padahkihong Meteikan en Poakohng Siohwa
1. Dahme kamwakid ekei en karanih Siohwa?
1 Ke taman ahnsou me ke tepin rong duwen Siohwa? Dahme kamwakid uhk en karanih ih? Aramas tohto me ahneki mohngiong mehlel pahn ndaiong uhk me dahme kamwakid irail en karanih atail Sounkapikada iei ni arail esehla duwen sapwellime irair kaselel tohrohr kan, keieu sapwellime limpoak.—1 Sohn 4:8.
2, 3. Iaduwen kitail kak sewese tohnsukuhl en Paipel kan en kakairada arail limpoak ong Siohwa?
2 “Iei Ih me At Koht!”: Ni ahnsou me kitail kin medemedewe ire kapw ehu, kitail kin kalapw idek soangen peidek loal kan duwehte met: “Dahme padahk mehlel wet kasalehda duwen Siohwa?” de “Ni ahl dah me ire wet kihda mehn kadehde me Siohwa iei Sahm me keieu mwahu?” Wia kasukuhl duwehte met pahn sewese tohnsukuhlo en tapihada ahneki nanpwungmwahu rehn Siohwa erein eh mour.
3 Ni ahnsou me kitail sewese tohnsukuhl en Paipel en wehwehki kapai en esehla Koht mehlel oh ieias, re kak pil nda dahme Aiseia koasoia, “Iei ih me at Koht!” (Ais. 25:9) Ni ahnsou me kitail kawehwe sapwellimen Koht Mahsen, kitail anahne kasalehda iaduwen aramas pahn kak paiekihda sang pweidahn kupwuren Siohwa ki sapwellime wehi pahnangin kaundahn Sises Krais.—Ais. 9:6, 7.
4, 5. Ia wehwehn limpoakohng Siohwa?
4 Kasalepen Limpoak ong Siohwa: Kitail ese me poakohng Siohwa ki mohngiong unsek, mour unsek, lamalam unsek pidada laudsang ahnekihte pepehm kehlail ong Koht. Kitail anahne wekidala atail madamadau oh peikiong sapwellime madamadau. (Mel. 97:10) Limpoak ong Koht kin sansalda sang atail kin peikiong sapwellime kosonned kan oh kaukaule ahneki “mour . . . mwakelekel oh kasarawihong Koht,” mendahki lelohng kahpwal kan oh kalokolok kan.—2 Pit. 3:11; 2 Sohn 6.
5 En wia kupwuren Koht pwehki atail limpoakohng ih kin wia mehkot kaperen. (Mel. 40:8) Irail tohnsukuhl en Paipel kan anahne en wehwehki me sapwellimen Koht kehkehlik koaros kin wia kamwahu soutuk ong Sapwellime ladu kan. (Deud. 10:12, 13) Aramas men pahn kasalehda eh kalahngan laud ong Sapwellime doadoahk kaselel kan koaros sang ni eh mourki sapwellimen Siohwa kaweid. Sewese tohnsukuhlo en wehwehki me ni eh pahn kekeid ni ahl pwung en Siohwa pahn pere ih sang medek oh kansensuwed.
6. Soangen kapai dah kan emen pahn alehdi pwehki limpoakohng Siohwa?
6 Kapai ong Irail kan me Poakohng Koht: Siohwa ketin apwalih mwahu irail kan me aktikitik me poakohng ih, oh e ketin kasalehiong irail “sapwellime kupwur rir.” (1 Kor. 2:9, 10) Irail ahneki madamadau sansal ong mour ahnsou kohkohdo oh koapworopwor mehlel pwehki arail ahneki loalokong me pid kupwuren Siohwa. (Ser. 29:11) Irail me poakohng Siohwa pahn iang paiekihda sapwellime kupwurkalahngan. (Eks. 20:6) Irail kesempwaliki koapworopwor en mour soutuk pwehki sapwellimen Koht limpoak laud ong irail.—Sohn 3:16.
7. Ia ahmw pepehm en padahkihong meteikan en poakohng Siohwa?
7 Ni atail uhdahn esehla samatail nanleng, met kin kamwakid kitail en ehukihong meteikan. (Mad. 13:52) E inenen kapai kaselel ehu en padahkihong meteikan, ahpw keieu neitail seri kan en poakohng Siohwa! (Deud. 6:5-7) Kitail iangahki atail tohnsukuhl en Paipel kan en kaukaule kapinga Siohwa ni atail kin kilang ‘wiewia mwahu en nin lime kan koaros.’—Mel. 145:7.