Mie Atail Pai Kesempwal kan me Kitail en Ehukihong Meteikan
1 Mie padahk kesempwal tohto nan Paipel me kitail kin kalahnganki. (Mel. 12:6; 119:11, 14) Ehu ahnsou, Sises ketin doadoahngki karasaras kan me kasalehda soangsoangen irair kan me pid Wehio. Ih eri idek rehn sapwellime ko: “Kumwail wehwehki soahng pwukat koaros?” Ni ahnsou me re sapengki me re uhdahn wehwehki soahng pwukat koaros, e mahsanihong irail: “Eri, met wehwehki me sounpadahk koaros en Kosonnedo me pahn wiahla tohnpadahk nan Wehin Koht, re rasehng kaunen peneinei men me kin kapwarehda sang nan imwe imwen nahk kepwe kapw oh kepwe mering kan [“pai kesempwal kapw kan oh pai kesempwal en mahs kan,” NW].”—Mad. 13:1-52.
2 Padahk mehlel kan me kitail sukuhlki ni ahnsou me kitail tepin onop Paipel kin rasehng pai kesempwal en mahs kan. Sang ni atail kin kekeirda nan atail pein onopki ire loal kan nan Mahsen en Koht, kitail kin diarada padahk mehlel teikan en Paipel, me kin duwehte pai kesempwal kapw kan. (1 Kor. 2:7) “Ladu lelepek oh loalokong” kin sewese kitail en wehwehkihda pai kesempwal kapw pwukat.—Luk 12:42.
3 Kitail uhdahn kin kesempwalki pai kesempwal pwukat, mehn mahs oh me kapw kan me kohsang nan Paipel. Met kin kamwakid kitail en nantihong alehdi kasukuhl oh koahiekla nin duwen sounkalohki Mahsen en Koht, pwerisek en ehukihong meteikan padahk kesempwal kan me kitail sukuhlkier.
4 Mehn Kahlemeng Dah me Sises Ketikihda?: Sises ketin kasalehda ia sapwellime pepehm ong pai kesempwal pwukat ni eh kin nantihong ehukihong meteikan mepwukat mendahki ekei pak e kin pil ngirala.—Sohn 4:6-14.
5 Sises kin limpoakohng irail kan me sohte wehwehki duwen Koht oh kupwure. Met kin kamwakid ih en ehukihong irail padahk mehlel en Koht me rasehng pai kesempwal kan, me kin komourala irail. (Mel. 72:13) E kin poakehla irail kan me men sukuhlki duwen Koht oh kupwure. Met kin kahrehiong ih en “kawehwehiong irail soahng tohto.”—Mark 6:34.
6 Kahlemengih Sises: Duwehte Sises, ma kitail uhdahn kesempwalki pai kesempwal kan me kitail ahneki, kitail pahn perenki kasalehiong aramas padahk kesempwal pwukat sang nan Paipel. (Lep. Pad. 2:1-5) Mendahki ekei pak kitail kin pwangada, kitail pahn ngoangki koasoia duwen padahk mehlel kan en Paipel. (Mark 6:34) Atail kalahnganki laud pai kesempwal kan me kitail ahneki pahn kamwakid kitail en wia uwen me kitail kak nan kalohk, oh ahnsou koaros song en kalaudehla met.