Doadoahk en Kalohk Iei Kasalepen Atail Limpoakohng Koht
1. Dahme limpoakohng Koht kin kamwakid Sises en ketin wia?
1 Limpoak me kin kamwakid Sises en ketin kapwaiada sapwellime doadoahk en kalohk. Soahng koaros me e ketin wia nan sapwellime doadoahk kin kasalehda sapwellime limpoakohng Siohwa. Sises mahsanih: “Tohn sampah en uhdahn ese me I poakohng Semei. Ihme kahrehda I kin wiahda soahng koaros me e ketin mahsanihong ie.” (Sohn 14:31) Pwehki kitail kin idawehn Sises, kitail pil kin ahneki pwais kaselel en kasalehda atail limpoak laud ong Koht nan atail doadoahk en kalohk.—Mad. 22:37; Ep. 5:1, 2.
2. Ia duwen limpoakohng Siohwa kin kamwakid atail kalohk?
2 “Mwaromwi en Sarawihla”: Ni ahnsou me kitail kin ngoangki padahkihong aramas akan duwen Siohwa oh sapwellime Wehi, kitail kin kasalehda atail limpoakohng Koht oh kitail kin utung kasarawihlahn mwareo. (Mel. 83:18; Esek. 36:23; Mad. 6:9) Duwehte sapwellimen Sises doadoahk en Kalohk, atail kin kalohk pil kin kasalehda me kitail men mwaren Siohwa en sarawihla oh kupwure en pweida.—Mad. 26:39.
3. Ia duwen atail limpoakohng Siohwa kin sewese kitail en powehdi kahpwal kan?
3 Limpoak Kin Kamwakid Kitail en Powehdi Kahpwal kan: Limpoakohng Siohwa kin sewese kitail en powehdi mehn kerempwa kan koaros. (1 Kor. 13:4, 7) Mie kahpwal kan me Sises kin ketin lelohng me kakete kauhdi sapwellime doadoahk en kalohk. Ahpw ni ahnsou me kahpwal pwukat kin pwarada, sapwellime limpoak ong Siohwa oh sapwellime ngoang en kapwaiada kupwure kan kin sewese ih en kak powehdi kahpwal pwukat. (Mark 3:21; 1 Pit. 2:18-23) Kitail pil kin lelohng kahpwal tohto, ahpw atail limpoakohng Koht kak sewese kitail en powehdi kahpwal ko. Sang ni atail kin idawehn mehn kahlemeng en Krais, kitail pahn kak kehlail oh loalenohng atail doadoahk en kalohk. Mendahki kitail kin lelohng kahpwal kan duwehte uhwong sang peneinei, luwetalahn paliwar, mahla, de aramas sohte kin men rong atail padahk kan, mepwukat sohte kin irehsang kitail en kasalehda atail limpoakohng Siohwa oh kapwaiada atail doadoahk en kalohk ni uwen atail kak koaros.
4. Pwais kaselel dahieu atail limpoakohng Siohwa kin kihong kitail?
4 Limpoak kin kehlail, oh kitail kin ahneki koahiek en kasalehda atail limpoakohng Koht sang atail mohngiong nan atail doadoahk en kalohk. (1 Kor. 13:13) Ni atail kin kerekerenlahng ahnsou me mwaren Siohwa pahn sarawihla, kitail kin kapakapki me atail “limpoak en lalaudla.”—Pil. 1:9; Mad. 22:36-38.