Ke Kak Kalaudehla Ahmw Doadoahk en Kalohk?
1. Dahme kahrehda kitail anahne wia doadoahk en kalohk ni karuwaru?
1 Ni ahnsou me Sises mahsanih me aramas tohto kin perenki rong rongamwahu en Wehio, e ketin padahkihong sapwellime tohnpadahk kan en “peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Mad. 9:37, 38) Pwehki doadoahk wet pahn kereniong imwisekla, kitail anahne wia doadoahk wet ni karuwaru. Met wehwehki me kitail anahne kapakap oh medemedewe ia duwen atail kak kalaudehla atail doadoahk en kalohk.—Sohn 14:13, 14.
2. Ia duwen ekei ar kin mwekidki kangoang en kalaudehla ar doadoahk en kalohk?
2 Ahl akan me Kitail Kak Kalaudehla Atail Kalohk: Ki sapwellimen Siohwa sawas, me tohto kin diarada me re kak tepida doadoahk en pioneer. (Mel. 26:2, 3; Pil. 4:6) Ekei kin nantihong en wia sawaspen pioneer sounpwong ehu de riau nan ehu pahr. Met kin sewese irail en kalaudehla arail doadoahk en kalohk. Peren me kohsang doadoahk en sawaspen pioneer kin kamwakid me tohto en medemedewe en wiahla pioneer kan.—Wiewia 20:35.
3. Ma ke kin iang doadoahk en pioneer mahs, dahme ke kak medewe en wia ni ahnsou wet?
3 Ke Kak Pwurehng Iang Doadoahk en Pioneer?: Ma ke kin iang doadoahk en pioneer mahs, mwein ke kin tamatamante uwen eh kin kaperen. Mie pak me ke kapakapki oh medemedewe ma ke kak pwurehng tepida doadoahk en pioneer? Kahrepe kan me kahrehiong uhk en uhdihsang doadoahk en pioneer ele solahr mie. Eri, mwein met ke kak pwurehng iang doadoahk en pioneer.—1 Sohn 5:14, 15.
4. Pwais kaselel dahieu kin kohwong kitail koaros?
4 Doadoahk en kalohk kin wiawi ni ahnsou wet oh e pahn kereniong imwisekla. (Sohn 4:35, 36) E pahn mwahu ma kitail koaros pahn kasawih atail irair kan pwehn kilang ma kitail kak wiahda wekidekla kan pwehn kalaudehla atail doadoahk en kalohk. Ma kitail sohte kak kalaudehla atail doadoahk en kalohk, mie ahl akan me kitail kak kamwahwihala atail doadoahk en kalohk? (Mark 12:41-44) E wia pwais kaselel ehu ma Siohwa pahn ketin doadoahngki kitail nan doadoahk en pioneer. Pwais wet kin kohwong koaros me kak kalaudehla arail doadoahk en kalohk!—Mel. 110:3.