I Kin Wia Uwen Ei Kak Koaros nan Kalohk?
1. Dahme Kristian lelepek men kin kakete medemedewe?
1 Mie pak me ke pein idek rehmw peidek wet? Mwein ke solahr kin iang kalohk duwehte mahso pwehki ke likeilapalahr, soumwahula, de pwukoa en peneinei laudla kahrehda omw solahr peren duwehte mahso. Emen sister me naineki seri silimen ntingihdi me ekei pak e pehm me e kin wia mehkot sapwung pwehki eh ahnsou oh kehl me e kin kihong eh peneinei, katikala dahme e kak wia nan kalohk. Dahme pahn sewese kitail en toupahrek nan atail madamadau?
2. Dahme Siohwa kin ketin kasik rehtail?
2 Dahme Siohwa Kin Ketin Kasik Rehtail: Ni mehlel kitail koaros kin men wia laud nan kalohk. Ahpw mie wekpeseng laud nanpwungen dahme kitail men wia oh dahme kitail uhdahn kak wia. Pwehki kitail men wia laudsang dahme kitail kin wia, met kin kasalehda me kitail kaidehn soangen aramas me kin itarkihte dahme kitail kin wia. Kitail anahne taman me Siohwa mwahngih atail soh itar akan oh sohte kin kupwurki kitail en wia laudsang dahme kitail kakohng. (Mel. 103:13, 14) Dahme e ketin kasik sang rehtail? E kupwurki kitail en papah ih ni mour unsek oh kihong uwen atail kak.—Kol. 3:23.
3. Ia duwen atail kak kasawih atail doadoahk en kalohk?
3 Dahme pahn sewese kitail en ese ia uwen me kitail kak wia? Kitail kak peki Siohwa en ketin sewese kitail en kilang dahme kitail uhdahn kak wia. (Mel. 26:2) Emen Kristian me mah me kitail likih me uhdahn ese kitail oh e sohte pahn masak ndaiong kitail dahme kitail anahne kamwahwihala, kak sewese kitail. (Lep. Pad. 17:17) Pil tamataman me pwehki soahng kan kin wekila, e mwahu en kaukaule kasawih atail irair akan.—Ep. 5:10.
4. Ia duwen atail pahn kilangwohng mehn kataman kan sang Paipel me pid doadoahk en kalohk?
4 Ia Duwen Atail Pahn Kilangwohng Mehn Kataman kan me Pid Doadoahk en Kalohk: Ni ahnsoun weiren tang, soun kilang mwadong kan kin kangoange sountang kan. Kahrepen arail kin wia met pwehn sewese sountang kan en kak lel ni keso a kaidehn en kamworus irailla. Duwehte met, mehn kangoang oh kataman kan sang Paipel me kin kohda nan mihting kan oh neitail sawaspen Paipel kan ong ‘nantihong kalohkiseli mahseno’ kin wia kamwahupatail, a kaidehn en kasalehda me atail kin nannanti sohte itar. (2 Tim. 4:2) Kitail kak likih me erein atail kin nannanti en wia uwen me kitail kak, Siohwa pahn kupwurperenki taman atail ‘wiewia kan de atail limpoak.’—Ipru 6:10.