Kitail Anahne Kanengamah nan Atail Doadoahk en Kalohk
1. Ia duwen Siohwa eh kin ketin kasalehda kanengamah ong aramas akan?
1 Koht kin ketin kanengamahiong aramas akan. (Eks. 34:6; Mel. 106:41-45; 2 Pit. 3:9) Kitail kak kilang ehu karasepe mwahu duwen sapwellime limpoak oh kanengamah nan doadoahk en kalohki Wehio nin sampah pwon. Siohwa kin ketin kanengamahiong aramas akan kereniong sounpar 2,000, ahpw e kin ketin pousehlahte kainangihedo irail kan me men ahneki nanpwungmwahu reh. (Sohn 6:44) Ia duwen atail kak alasang sapwellime kanengamah nan atail doadoahk en kalohk?
2. Ia duwen atail kin kasalehda kanengamah ni atail kin kalohk?
2 Kalohk Ihmw lel Ihmw: Kitail kin alasang sapwellimen Siohwa kanengamah ni atail kin “wonoweite” kalokalohk nan wasa kan me aramas akan saikinte kasalehda arail perenki rong. (Wiewia 5:42) Kitail kin kanengamahiong aramas akan me sohte kin perenki rong oh pil irail kan me kin kauwe oh uhwong atail doadoahk en kalohk. (Mark 13:12, 13) Kitail pil kin kasalehda kanengamah sang ni atail nannantihte kalamwuri weren padahk mehlel ni karasaras mendahki e kin apwal en pwurehng tuhwong irail kan me kasalehda arail perenki rong.
3. Dahme kahrehda kitail en kanengamah ni atail kin pwurala oh wia onop en Paipel rehn irail kan me perenki rong?
3 Onop en Paipel kan: Kitail anahne kanengamah ni atail kin kakairada tuhke pwoat. Kitail kak apwalih, ahpw kitail sohte kak kamwadangahla eh pahn kekeirda. (Seims 5:7) Pil duwehte, aramas men kin ekis ekis kakairada eh nanpwungmwahu rehn Siohwa. (Mark 4:28) Irail kan me kitail kin onop rehrail ele kin apwalki kesehla padahk likamw kan de tiahk kan me uhwong Paipel. Kitail en dehr song kamwadangahla arail kekeirda sang ni atail idingkihong irail ren wiahda wekidekla kan. Kitail anahne kanengamah pwehn mweidohng sapwellimen Koht manaman en kak kamwakid arail mohngiong.—1 Kor. 3:6, 7.
4. Ia duwen kanengamah eh kak sewese kitail en pweida ni atail kin kalohk ong kisehtail kan?
4 Kisehtail kan me Saikinte Iang Padahk Mehlel: Mendahki atail kin uhdahn men kisehtail kan en esehla padahk mehlel, kitail kin kasalehda kanengamah sang ni atail awih ahnsou me konehng pwehn ehukihong irail padahk mehlel. Kitail kin kanahieng pwe kitail en dehr padahkihong irail soahng tohto ni ahnsou tehkis. (Ekl. 3:1, 7) Ahpw ni ahnsowohte, atail mehn kahlemeng mwahu pahn kasalehda soangen aramas dah kei kitail pwehki padahk mehlel. Oh kitail kin onopada pwehn kasalehda atail pwoson ni kadek oh wahu. (1 Pit. 3:1, 15, 16) Mehlel, atail kanengamah nan kalohk pahn pweida mwahu oh pahn kaperenda kupwuren Samatail nanleng.