Kahlemengih Sapwellimen Siohwa Irair En Kanengamah
“Kauno sohte kin ketin pwapwand ni wiepen sapwellime inou, . . . ahpw e kin ketin kanengamahiong kumwail.”—2 PITER 3:9.
1. Soangen kisakis dah me Siohwa ketin ritingadahng tohnsampah?
SIOHWA ritingadahng kitail mehkot me sohte emen tohrohr kak wiahiong kitail. Met iei mehkot me inenen kaperen oh kesempwal, ahpw e sohte kin netila oh kitail sohte kak pwainda. Dahme e ritingadahng kitail iei kisakis en mour soutuk oh ong pali moron en kitail, mour poatopoat nan paradais nin sampah. (Sohn 3:16) Ia uwen met ah wia kapohl mwuledek ieu! Soahng kan me kin kahrehda nsensuwed pahn solahr wiawi me duwehte kailok, pei, paisuwed, kauwehla kosonned, soumwahu, oh pil mehla. Aramas akan pahn kousoan nan meleilei oh minimin pahn kaunda limpoak en Wehin Koht. Ia uwen atail kin kasikasik Paradais en pweida nin sampah! (Aiseia 9:6, 7; Kaudiahl 21:4, 5)
2. Dahme kahrehda Siohwa saikinte ketikihsang ahn Sehdan koasoandi wet?
2 Pil pein Siohwa kin ketin kasikasik ahnsowo me e pahn ketin wiahda Paradais pohn sampah. Pwe ni mehlel, e ketin poakohng irair en pwung oh kopwungpwung. (Melkahka 33:5) E sohte ketin kupwurki mahsanih me sampah wet kin mwamwahliki de wia kauwe sapwellime kosonned pwung kan, sampah ieu me kin kauwe sapwellime manaman oh wiakauwehla sapwellime aramas akan. Ahpw, mie kahrepe mwahu kan me kahrehda e saikinte ketikihsang ahn Sehdan koasoandi suwed wet. Kahrepe pwukat kin pidada sapwellimen pwung en kaunda. Ni Siohwa a pahn ketin koasoanehdi irair apwal pwukat, e pahn ketin kasalehda irair kaselel ieu, irair ehu me aramas tohto nan rahnwet sohte ahneki—iei irair en kanengamah.
3. (a) Ia wehwehn lokaiahn Krihk oh Ipru me kawehwehdi “kanengamah” nan Pwuhk Sarawi? (b) Peidek dah kan me kitail pahn tehkpene ahnsouwet?
3 Mie lepin lokaiahn Krihk ieu nan Pwuhk Sarawi me ede New World Translation kawehwehdi pak siluh ong “kanengamah.” Ni lokaia mengei, e kin wehwehki “ngenen koatonohng” oh kahrehda e kin kalap kihda madamadau en “lelepek pahn kalokolok” oh “kasalehda kanengamah.” Koaros lokaiahn Krihk oh Ipru ong “kanengamah” kin kolokol madamadau en koatonohng oh pwand en lingeringerda. Eri, iaduwen sapwellimen Siohwa kanengamah a kin wia kapai ong kitail? Mehn kahlemeng dah kan me kitail kak sukuhliki duwen sapwellimen Siohwa kanengamah oh pil sapwellime ladu lelepek kan arail kin kasalehda kanengamah? Iaduwen atail ese me sapwellimen Siohwa kanengamah me sohte imwi? Kitail kilang.
Tehk Duwen Sapwellimen Siohwa Kanengamah
4. Dahme wahnpoaron Piter ntingihdi duwen sapwellimen Siohwa kanengamah?
4 Wahnpoaron Piter ntingihdi duwen sapwellimen Siohwa kanengamah: “A kumwail, kompoakepahi ko, kumwail dehr manokehla mehkotet: duwen mwohn silangin Koht, rahnteieu oh sounpar kid ara raspenehte, oh duwen sounpar kid eh duwehte rahnteieu rehn Koht. Kauno sohte kin ketin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:8, 9) Menlau tehk kanahieng ire riau me pwarada wasaht me kak sewese kitail en wehwehkihla duwen sapwellimen Siohwa kanengamah.
5. Iaduwen sapwellimen Siohwa kupwur, me pid ahnsou, kin kamwekid sapwellime koasoandi en doadoahk kan?
5 Ire keieu iei me Siohwa kin ketin mahsenwohng ahnsou nin duwen atail kin kilang. Pwehki sapwellime irair en mour me soutuk, sounpar kid kin duwehte rahn ehu. Sapwellime wiewia kan sohte kin poahsoanki de irairki ahnsou, ahpw e sohte kin ketin pwand nan sapwellime koasoandi kan. Pwehki e pil sapwellimaniki erpit poatopoat, Siohwa mwahngih ahnsou me uhdahn konehng en ketin mwekid pwe en wahdo kamwahu ong koaros, oh e kin ketin kanengamah oh awiawih ahnsowo en leledo. Kahrehda kitail sohte kak mwadangete nda me e sohte kin ketin kupwure medekla me sapwellime ladu kan kin lelohng ahnsou wet. Ih Koht emen me sapwellimaniki “kupwurkalahngan oh kadek” oh mehn kahlemeng mwahu en limpoak. (Luk 1:78; 1 Sohn 4:8) E kak ketikihsang douluhl pai suwed sohte lipilipil ieu me pahn pwarada sang ni kamedek en lepin ahnsou me e ketin mweidohng en wiewiawi nan ahnsouwet.—Melkahka 37:10.
6. Dahme kitail dehpa ndahki duwen Koht, oh pwekihda?
6 E sohte kin mengei en awiawih mehkot me aramas emen nohn ngoangkihlahr. (Lepin Padahk 13:12) Kahrehda, ahnsou me aramas akan sohte kin mwadang kapwaiada audepen arail inou kan, irail kakete nda me irail sohte nsenohki. E pahn inenen sapwung ma kitail lemeleme me Koht sapwellimaniki soangen madamadau duwehte met! Ma kitail ahnekihda sawehwehki sapwellimen Koht kanengamah oh lemeleme me e kin ketin pwand, eri wereilahn ahnsou pahn kahrehong kitail en ahnekihda peikasal oh mworusala, oh kitail kak lelohng irair en meirla ni pali ngehn. Oh pil, suwed sang met, soangen aramas me Piter kasalehda me irail kak kaweid sapwungih kitail iei irail aramas mwalaun akan, irail akan me sohte arail pwoson. Irail pwukat kin nda: “E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!”—2 Piter 3:4.
7. Iaduwen sapwellimen Siohwa kupwuren kanengamah kin kasalehda me e kupwurki aramas koaros en koluhla?
7 Ire keriau me kitail kak kihsang ni mahsen en Piter kan iei me Siohwa kin kanengamah pwe e kupwurki aramas koaros en kak koluhla. Irail oko me keptakai oh kahng kawekila arail elen mour suwed akan pahn ale kalokeparail rehn Siohwa. Ahpw, Koht sohte kin kupwurperenki mehlahn aramas suwed akan. Ahpw, e kin ketin kupwurperenki kilang aramas akan en koluhla, wiliakapwala, oh momour. (Esekiel 33:11) Kahrehda, e ketin kanengamah oh ketin mweidong Rongamwahu en kalohkseli wasa koaros nan sampah pwe aramas akan en ahneki ahnsou mwahu en mourla.
8. Iaduwen sapwellimen Koht kanengamah kin sansaliki sapwellime wiewia kan ong wehin Israel en kawao?
8 Sapwellimen Koht kupwuren kanengamah kin pil sansaliki sapwellime wiewia ong wehin Israel en kawao. Erein pahr epwiki kei, e kin ketin kanengamahiong arail elen sapeik kan. Ki sapwellime soukohp akan, pak tohto e kin kangoangehkin irail oh mahsanih: “Kumwail kesehla amwail wiewia suwed kan oh peikiong ei mahsen, audepen Kosonned me I kihong amwail pahpa kahlap ako oh pil ong nei ladu soukohp kan pwe re en padahkihong kumwail.” Ia imwilahn met? Aramas akan “sohte peikiong.”—2 Nanmwarki 17:13, 14.
9. Iaduwen ahn Sises kanengamah ah kin duwehte Sapwellimen Semeo?
9 Ni imwio, Siohwa poaronehdo sapwellime Ohlo, me sohte kin pwangahkihda peki rehn mehn Suhs akan ren pwurodohng rehn Koht. En Sises a kasalehda kanengamah sohte weksang sapwellimen Semeo irair en kanengamah. Pwehki Sises wehwehki mwahu me ahnsou keren e pahn kamakamala, Sises mahsanih: “Serusalem, Serusalem! Kowe me kemelahr soukohp ako oh kin koasungki takai sapwellimen Koht meninkeder kan me pekederdohng uhk! Pak depe me I kin men pwoalepene noumw aramas akan koaros, rasehng litok emen me kin kompwoalepene nah kisin pwurok kan pahn peh, ke ahpw sohte kin mweidohng ie!” (Madiu 23:37) Mahsen pwukat kin weksang kadeik kehlail kan me kin kohsang sounkopwung emen me men kaloke emen aramas tohrohr, ahpw e kin wiewia ngoaren kompoakepah men me kin kanengamah ong aramas akan. Sises kin duwehte Seme nanleng, kin mwahuki aramas akan en koluhla oh eri pitsang kadeik kehlailo. Ekei aramas kin mwekidki sapwellimen Sises mahsen en kangoang oh pitsang kadeik kehlail me lelohng Serusalem nan pahr 70 C.E.—Luk 21:20-22.
10. Ni soangen ahl dah me sapwellimen Koht kanengamah kin wia kamwahupatail?
10 Sapwellimen Koht kanengamah soh kin wia mehkot kapwuriamwei ieu? Sohte lipilipil ia uwen laud en tohnsampah irair en sapeiko, Siohwa ketin mweidohng kitail oh iangahki aramas million teikan en ahneki ahnsou mwahu en esehla Ih oh ahneki koapworopwor en ale komourpatail. Piter ntingihdi, “Kumwail tehk mwahu sapwellimen Kauno kanengamah ong kumwail ni eh ketikihong kumwail ahnsou mwahu en ale komour.” (2 Piter 3:15) Kitail soh kin kalahnganki me sapwellimen Siohwa kanengamah kin ritingadahngehr ahl ong komour? Kitail soh kin kapakapki me Siohwa en kak ketin kolokolete sapwellime kanengamah ong kitail nin doken atail kin papah ih nin rahn akan?—Madiu 6:12.
11. Dahme atail wehwehkihla sapwellimen Siohwa kanengamah pahn wiahiong kitail?
11 Ni atail kin wehwehkihla kahrepen Siohwa ah kin ketin kanengamah, e kin sewese kitail en kakehr kanengamah oh awiawih komour me e pahn ketikihdo, oh kitail sohte pahn nda me e kin ketin pwand en wia sapwellime inou kan. (Koul Kedepwidepw kan 3:26) Nin doken atail kin wia kapakapki Wehin Koht en ketido, kitail kin likih me Koht mwahngih ahnsou keieu mwahu en sapeng kapakapo. Oh pil, kapehdatail kin mwekidki en kahlemengih Siohwa sang ni atail kin kasalehda pwoson ni kanengamah ohng ahnsou kan me kitail kin ehuiong riatail brother oh sister kan oh pil ohng irail me kitail kin kalohk ohng. Oh pil, kitail sohte men aramas emen en mehla ah kitail men kilang irail en koluhla oh iang ale koapworopwor en mour soutuk.—1 Timoty 2:3, 4.
Tehk Kanengamah en Soukohp akan
12, 13. Iaduwen soukohp Aiseia a kin pweida ni ah kin kasalehda kanengamah?
12 Ni atail kin medemedewe duwen sapwellimen Siohwa kanengamah, kitail kin ale sawas en perenki oh pil kin ahnekihda kanengamah ong pein kitail. E sohte mengei ong aramas soh unsek en kakairada kanengamah, ahpw e kak wiawi. Kitail kak sukuhliki sang sapwellimen Koht ladu kan en mahs oko arail kasalehda kanengamah. Tohnpadahk Seims ntingihdi: “Riei ko, kumwail tamanda soukohp ako me mahsenier ni mwaren Kauno. Kumwail alasang arail kanengamah oh nannanti nan ar lokolok kan.” (Seims 5:10) E kansenamwahu oh wia mehn kangoang ohng kitail en ese me aramas teikan kin lelohng soangen kahpwal me duwehte atail ahpw powehdi.
13 Karasepe, soukohp Aiseia uhdahn anahne en ahneki kanengamah nan sapwellime pwukoa doadoahk. Siohwa mahsanih ong ih: “Ih eri mahsanih ong ie I en patohla oh padahkiong aramas akan duwen mahsen pwoatet: ‘Mehnda ma kumwail rong kanahieng, ahpw kumwail sohte pahn dehdehki; mehnda ma kumwail pahn kilang mwahu, ahpw kumwail sohte pahn ese dahme wiewiawi.’ E pil mahsanih ong ie, ‘Ke pahn kakeptakaila kapehd en aramas pwukat, kaponehla salengarail kan, oh karotongehla masarail kan; pwe re dehr kilang, de rong, de dehdehki. Pwe ma re kilang de rong de dehdehki, re kakete sohpeidohng ie oh ale kamwahuparail.’” (Aiseia 6:9, 10) Mendahte aramas akan sohte kin men rong ih, Aiseia kin kanengamah oh wie kalohkiseli pahngok en Koht mpen pahr 46! Pil ni ahlohte, ahneki kanengamah pahn sewese kitail en dadaurete wiewia atail doadoahk en kalohki Rongamwahuo, mendahki ma pali tohtohn aramas sohte kin men rong.
14, 15. Dahme kin sewese Seremaia en kak powehdi uhwong kan oh mehn kaluwetala kan?
14 Mehlel me ni ahnsou me soukohp akan kin wiewia arail doadoahk en kalohk, aramas akan kin kaidehn ihte kahng rong irail ahpw re pil kin lelohng wiewiahn kailok kan. Seremaia eri lekdeklahng nan “imweteng,” oh lekdeklahng ong nan pwarer. (Seremaia 20:2; 37:15; 38:6) Irail akan me kin kaloke ih iei irail pwukat me kin songosong sewese irail. Ahpw, Seremaia sohte kin kou imwintihti ong irail, e pil sohte men uhwong irail. E kin nannanti kasalehda kanengamah erein pahr tohto.
15 Kalokolok oh kapailok sohte kauhdi Seremaia sang ah wia doadoahk en kalohk, oh pil met sohte kak kauhdi atail doadoahk nan rahnwet. Mehlel, me kitail pahn kin luwetala atail madamadau ekei ahnsou. Seremaia pil kin nsensuwedla. E ntingihdi, “Ahpw, Maing Kaun, ahnsou koaros I kin sarohdi oh kamwamwahlla, pwehki ei kin kalohkiseli sapwellimomwi mahsen. Ahpw ni ei kin patohwan, ‘I solahr pahn tamanda Kauno, oh I solahr pahn kokohp ni mware.’” Eri, dahme wiawi mwuri? Seremaia uhdi sang ah kalohk? E doula oh koasoia: “Eri, iei ahnsou me sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.” (Seremaia 20:8, 9) Tehk mwahu pwe ni ahnsou me e kin katapanki dahme irail soun kapailok ko kin nda, e sohlahr peren. Ahpw, ni ahnsou me e kin kihong ah madamadau ong lingan oh kesempwalpen mahsen me e kin padapadahki, ah peren kin pwurehng kehlailla. Oh pil, Siohwa kin ketin ieiang Seremaia duwehte emen “me roson oh manaman,” kin kakehlailih ih en kalohk mahsen en Koht ni eimah oh ngoang.—Seremaia 20:11.
16. Iaduwen atail kak wie kolokolete peren nan atail doadoahk en kalohki Rongamwahuo?
16 Iaduwen—soukohp Seremaia kin perenki wia sapwellime doadoahk? Ei! E patohong Siohwa: “Komwi ketin mahsendohng ie, I ahpw pahn kanahieng rong sapwellimomwi mahsen kan koaros. Komw ketin sapwellimankin ie, Maing Kaun, Koht Wasa Lapalahpie, iei me sapwellimomwi mahsen kan kadirehkilahr nan mohngiongi peren oh nsenamwahu.” (Seremaia 15:16) Seremaia perenki kapai tohrohr me e pwaisaniki pwe en wia weliepen Koht mehlelo oh padahki sapwellime mahsen. Pil kitail kak pil ahneki pepehm wet. Kitail oh pil iangahki tohnleng kan ki men en peren laud ni ahnsou me aramas tohto nan sampah pwon, kin alehda mahsen en Wehin Koht oh koluhla oh kekeid nan ahl me pahn kahluwalahng mour soutuk.—Luk 15:10.
“Sohp Kin Kasalehda Kanengamah”
17, 18. Ia mwomwen Sohp a kasalehda kanengamah, oh ia imwi?
17 Mwurin Seims ah kihda mahsen kan duwen soukohp akan en kawao, e ntingihdi: “Kumwail rongehr duwen en Sohp eh kanengamah oh dehdehkilahr duwen ni imwilah Kauno eh ketin kupwurehla. Pwe Kauno me diren kadek oh kalahngan.” (Seims 5:11) Lepin lokaiahn Krihk me kawehwehdi wasaht ong “kanengamah” kin ahneki soangen wehwehohte me duwehte lepin mwowe ong “nannanti.” Soun nting men song en kawehwehda wekpeseng en lepin mahsen riau pwukat ni ah ntingihdi: “Me ‘nannanti’ kin wehwehki nantiong powehdi ni ahnsou me aramas kin mwamwahliki kitail, ah ‘kanengamah’ kin wehwehki lamalam kehlail ni ahnsou me kitail mehkot kin kahpwalih kitail.”
18 Sohp lelohng kahpwal laud. Ah pai en pali en sent kohsang ih, nah seri kan mehla, oh alehdi soumwahu weirek. Aramas akan pil lahlahwe oh karaunlikamwe ih me Siohwa ketin kaloke ih. Sohp sohte kin nennenwei ni ah kin lelohng kahpwal pwukat; e kin kasalehda ah pahtoukihla duwen irair me e mihla loale oh pil kose me e pwung laud sang Koht. (Sohp 35:2) Ahpw, eh pwoson sohte kin tikitikla, oh e sohte kin salelepekla. E sohte kin lahlahwe Koht nin duwen me Sehdan dene me e kin wia. (Sohp 1:11, 21) Ia imwilahn met? Siohwa ketin “kupwuramwahwihala luhwen ahnsoun mouren Sohp, ketikihong dipwisou tohtohsang mehn mahs ako.” (Sohp 42:12) Siohwa ketin kasapahldohng ih roson mwahu, ketin kalaudehla ah kepwehpwe pak riau, oh kapaiahki ih mour en peneinei unsek oh peren. En Sohp kasalehda kanengamah kahrehiong en wehwehkihla laud duwen Siohwa.
19. Dahme kitail sukuhliki sang ahn Sohp kanengamah oh nannanti?
19 Dahme kitail sukuhliki sang ahn Sohp kanengamah oh nannanti? Duwehte Sohp kitail kak lelohng soumwahu oh kahpwal teikan. Ele kitail sohte kak wehwehki unsek kahrepen Siohwa ketin mweidohng kitail en lelohng soangen iren kalokolok ieu. Ahpw iet me kitail en wehwehki: Ma kitail pahn kolokolete atail lelepek, kitail pahn ale kapai. Siohwa sohte kak sapwungala, e pahn ketin katingih irail oko me kin poaden raparapahki ih. (Ipru 11:6) Sises mahsanih: “Ahpw me pahn dadaurete lel ni imwi, ih me pahn mourla.”—Madiu 10:22; 24:13.
“Rahn en Siohwa Pahn Leledo”
20. Dahme kahrehda kitail ese ni mehlel me Rahnen Siohwa pahn kohdo?
20 Edetehn Siohwa me diren kanengamah, e pil kin sapwellimaniki irair en kopwungpwung oh sohte pahn ketin mweidong irair en tiahk suwed kohkohlahte. Mie irepen sapwellime kanengamah. Piter ntingihdi: “Koht sohte ketin kupwurehla mehn kawa ko, ahpw e ketikihdi ong pohn tohnsampah suwed ko Nohlik Lapalapo.” Mendahte Noha oh ah peneinei ah mourla, ahpw irail me sapeikiong Koht akan iang mehla nan Nohliko. Siohwa pil ketin kadeikada Sodom oh Komora, oh wiahkinirailla pehs. Elen kadeik pwukat “wiahkinirailla kadehdepen dahme pahn wiawihong me suwed kan.” Ong met kitail en ese ni mehlel: “Rahnen Siohwa pahn kohdo.”—2 Piter 2:5, 6; 3:10.
21. Iaduwen atail kak kasalehda atail nannanti oh kasalehda kanengamah, oh dahme kitail pahn sukuhliki nan artikel en mwurin met?
21 Kitail en kahlemengih sapwellimen Siohwa irair en kanengamah ni atail kin sewese meteikan en koluhla pwe irail en kak mourla. Kitail en pil kahlemengih soukohp akan ni atail kin nantihongete wahseli Rongamwahuo mendahki aramas akan me kitail kin kalohk rehrail kin kahng rong. Oh pil, ma kitail kin duwehte Sohp me kin kanengamah pahn kasongosong, kitail kak kamehlele me Siohwa pahn ketin kapaiada kitail laud ma kitail pahn dadaurete. Mie kahrepe laud ong kitail en pereperen nan atail wia doadoahk en kalohk ni atail kilang duwen sapwellimen Siohwa kapai mwuledek ong doadoahk en sapwellime aramas me kin wie padapadahki Rongamwahuo nan sampah koaros. Met kitail pahn tehkpene nan artikel en mwurin met.
Ke Tamataman?
• Dahme kahrehda Siohwa kin ketin kasalehda kanengamah?
• Dahme kitail sukuhliki sang kanengamah me soukohp akan kin kasalehda?
• Iaduwen Sohp ah kasalehda kanengamah oh ia imwila?
• Iaduwen atail ese me sapwellimen Siohwa kanengamah kin mie irepe?
[Kawehweh pen kilel kan nan ehu ehu pali 5]
Iaduwen sapwellimen Sises kanengamah kin duwehte sapwellimen Semeo
[Kawehweh pen kilel kan nan ehu ehu pali 6]
Iaduwen Siohwa ah katingih en Seremaia ah kanengamah?
[Kawehweh pen kilel kan nan ehu ehu pali 7]
Iaduwen Siohwa a kin ketin katingih en Sohp ah kanengamah?