‘Mwaren Koht en Sarawihla’
1. Ia oaralap en prokram en mihting tohrohr ong pahr en kalohk 2012, oh dahme e kin poahsoankihda?
1 Ia uwen atail pai pwehki kitail kin wa mwaren Wasa Lapalahpie, Siohwa! Pein Koht me ketikihong kitail mware pwehn kadehde, ahpw mehlel sang pahr wet 1931, aramas akan kin esehkin kitail nin duwen Sounkadehdehn Siohwa kan. (Ais. 43:10) Sapwellimen Koht Iehros, Sises, pil kin ketin wauneki mwar wet oh e wia tepin ire nan sapwellime kapakap me e ketin padahkihong sapwellime tohnpadahk kan. (Mad. 6:9) Sapwellime mahsen kihda oaralap en atail prokram en mihting tohrohr ong pahr en kalohk 2012. Oaralap wet iei “Mwaren Koht en Sarawihla.”
2. Padahk dah kan me kitail kasikasik?
2 Dahme Kitail Pahn Karonge: Padahk en Rahn Kaunop me oaralap mahsanih “Kadehdehda Mwaren Koht nin Duwen Irail kan me Kin Doadoahngki Pali Laud en Ar Ahnsou ong Doadoahk ong Koht” pahn koasoia dahme kahrehda doadoahk wet wia kapai ehu nan mour. Kitail pahn rong padahk kei me pahn kohsang oaralap wet, “Kanahieng Pwe Ke De Kauwehla Mwaren Siohwa,” me pahn sewese kitail en dehr lohdi nan soangen lidip 4. Peidek pwukat, Dahme pahn seweseiuk en kalohk ni ngoang mehnda ma aramas sohte men rong? oh, Dahme pahn sewese omw doadoahk en kalohk en pweida mwahu? pahn pasapengla nan padahk me oaralap mahsanih “Dahme Kahrehda Mwaren Koht Anahne Sarawihla.” Irail me kapwodo kan pahn perenki kapahrek en wehi pokon me oaralape iei “Siohwa Pahn Ketin Kasarawihla Mware Lapalap ni Armakedon.”
3. Pwukoa kesempwal dahieu me kitail pwukoahki oh ia duwen prokram wet eh pahn sewesei kitail?
3 Ahnsou keren Siohwa pahn ketin kasarawihla mware. (Esek. 36:23) Ahnsou wet, kitail ahneki pwukoa kesempwal en papah Siohwa ni ahl ehu me pahn utung soahng koaros me kin pid mware. Atail mour anahne kasalehda me kitail sohte men kauwehla mwaren Koht. Kitail kamehlele me prokram en mihting tohrohr wet pahn sewese emenemen kitail en kapwaiada atail pwukoa kesempwal en kadehde mwaren Koht.