Anahne Kalamwur Werentuhke kan Pwe Ren Keirda
1. Dahme kitail anahne kalamwur pwe en keirda?
1 Ke anahne kalamwur werentuhke kan me ke padokedi nan mwetuwel ehu pwe ren kak keirda. Met pil duwehte werentuhke kan en padahk mehlel me kin poadidi nan mohngiong en aramas akan nan atail wasahn kalohk. (1 Kor. 3:6) Kitail anahne pwurala oh kalamwur werentuhke pwukat ni karasaras sang ni atail pahn doadoahngki Mahsen en Koht ma kitail men ren wosada, keirda oh pweida.
2. Ia duwen atail kak sewese tohnihmwo en perenki rong dahme kitail pahn koasoia ni atail pahn pwurala?
2 Kihda Ehu Peidek: Ni omw pahn kaunopada wiepen omw padahk kan, dahme ke sou pil kaunopada ehu peidek me pahn kamwakid tohnihmwo en perenki rong dahme ke pahn koasoia ni ahnsou me ke pwurala reh? Ke kak wia peidek wet mwurin amwa tepin koasoipene, oh koasoanehdi iahd me ke pahn pwurala. Me tohto kin diar me e mwahu en pilada ehu ire sang nan pwuhken Paipel Padahngki me pahn sewese irail en kamwomwada duwen onop Paipel.
3. Soahng dah kan me ke kak ntingihdi ni tepin omw tuhwong tohnihmw?
3 Kilelehdi: Mwurin omw kohkohsang tepin aramas me ke koasoiong, kilelehdi soahng koaros me kumwa koasoia. Ntingihdi ede oh eh adres. E pil mwahu en ntingihdi rahn oh ahnsou me ke koasoiong, dahme kumwa koasoia, oh pwuhk me ke kihdi reh, ma mie. Mie eh pelien lamalam? Mie eh peneinei? E koasoia dahme e kin perenki de dahme e kin pwunodki? Soahng pwukat pahn seweseiuk ken kak koasoia ire kan me kesempwal ong ih ni omw pahn pwurala. Pil ntingihdi ahnsou me kumwa pwungkipene ken pwurala oh pil peidek me ke pahn sapeng.
4. Dahme kahrehda kitail en nantihong nan atail kin pwurala oh koasoiong aramas akan me perenki rong rohng me kitail kin kalohkiseli?
4 Nantihong: Sehdan sohte pahn uhdihsang eh kin nantihong en “kauwehsang irail” mahsen me poadidier nan arail mohngiong. (Mark 4:14, 15) Ihme kahrehda, ke dehr pweiek ma ke sohte kak pwurehng tuhwong aramaso me kin perenki rong. Ke kak kadaralahng irail ehu kisinlikou de ntingihda kisin doaropwe oh kihdi ni arail wenihmw? Emen pioneer tapiada onop rehn lih emen ni eh wenihmwo, ahpw e sohte kak pwurehng tuhwong liho ni imweo, eri e kadarala kisinlikou ehu. Ni eh pwurehng tuhwong liho ni imweo, liho kasalehda eh pwuriamweikihla en sistero eh kin nsenohki ih. Ni atail kin kalamwur weren padahk mehlel kan, kitail kak ahneki peren me kohsang atail kin kilang arail kin keirda, laudla oh “kin wa: ekei wa silihsek, ekei weneisek, a ekei wa epwiki.”—Mark 4:20.