Iahd Ke Pahn Pwurehng Pwurala Rehn Irail me Perenki Rong?
1. Dahme kin pidada atail kin wia katohnpadahk?
1 En wia katohnpadahk kin pid atail pahn pwurehng pwurala rehn irail kan me kin kasalehda arail perenki sukuhlki duwen koasoandi en sapwellimen Siohwa Wehi. (Mad. 28:19, 20) Ahnsou me keieu mwahu en pwurehng pwurala rehrail kin pidada atail koasoandi oh pil arail koasoandi. Dahme kahrehda kitail en mwadang pwurala mwurinte atail tepin tuhwong irail?
2, 3. Dahme kahrehda kitail en mwadang pwurala?
2 Dahme Kahrehda En Mwadang Pwurala? Doadoahk en kalohki “Rongamwahu en Wehin Koht” kereniong pahn imwisekla, oh imwin koasoandi wet pil kerendohr. (Mad. 24:14; 1 Pit. 4:7) Ni “rahnen komourla” eh saikinte nekier ong irail kan me kin perenki rong, kitail anahne kapwaiada kehkehlik en “kalohkiseli mahseno, . . . nantihong koasoakoasoia duwe.” Met pil kin pidada en mwadang pwurehng pwurala pwehn sewese irail.—2 Kor. 6:1, 2; 2 Tim. 4:2.
3 Sehdan kin nantihong en kihsang werentuhken mahsen en Koht sang nan mohngiong en aramas me kin perenki rong. (Mark 4:14, 15) Tohnpeneinei kan, tohndoadoahk kan, oh meteikan kin kalapw kapailoke irail kan me perenki rong. Atail mwadang pwurala rehrail pahn sewese kitail en pousehlahte atail koasoiong irail mwohn meteikan pahn kauwehla arail men rong.
4. Ni ahnsou me kitail tepin tuhwong aramas, dahme kitail kak wia pwehn kaunopada ni atail pahn pwurehng pwurala reh?
4 Wiahda Koasoandi: E keieu mwahu en wiahda koasoandi ong iahd ke pahn pwurehng pwurala mwurinte omw tepin tuhwong irail. Kihda ehu peidek me ke pahn sapeng ni omw pahn pwurehng pwurala. E kesempwal en ntingihdi duwen aramaso oh iahd ke pahn pwurehng pwurala. Ma omw koasoandi mweidohng, idek ma ke kak pwurala rahn mwurio. Ma ke tepin tuhwong ih ni imwin wihko oh e kin doadoahk rahn teikan nan wihko, ele e pahn pwungki ken pwurala reh ni imwin wihk en mwurio. Nantihong kapwaiada omw koasoandi.—Mad. 5:37.
5. Ia duwen atail mwadang pwurala kin sewese kitail en kapwaiada sapwellimen Sises kehkehlik en katohnpadahk?
5 Mie kahrepe mwahu kan me kitail anahne mwadang pwurala rehn irail kan me kin perengki rong. Eri, wiahda koasoandi oh mwadang pwurala pwe “atail ahnsou mwotomwotalahr.” (1 Kor. 7:29) Kitail pahn pweida mwahu ma kitail pahn mwadang pwurala rehn irail me perenki rong mahsen en Wehio.