Dahme Kin Kamwakid Kitail en Kalohk?
1. Limpoak ong ihs me kin kamwakid kitail nan atail doadoahk en kalohk?
1 Kalohki rongamwahu en Wehin Koht iei doadoahk me keieu katapan me kitail kak wia rahnwet. Mehlel, pwehki doadoahk wet, kitail kin kasalehda atail peikiong kosonned riau me keieu kesempwal, iei poakohng Siohwa oh pil mehn mpatail. (Mark 12:29-31) Limpoak kin kamwakid kitail en wia sounkalohk ngoang kei.—1 Sohn 5:3.
2. Ia duwen atail kalohk eh kin kasalehda limpoak ong Siohwa?
2 Limpoak ong Siohwa: Limpoak ong Kompoakpatail me keieu keren Siohwa kin kamwakid kitail en uhki ih. Sehdan kin karaunlikamwih Siohwa mpen sounpar 6,000. (2 Kor. 4:3, 4) Kahrehda, aramas kin kamehlele me Koht kin ketin kalokehki me dipan akan kisiniei nan ehl, e wiawihkihda Koht silimen, oh e sohte kin ketin nsenohki aramas. Me tohto pil kin nda me sohte Koht. Ia uwen atail kin men aramas akan ren esehla padahk mehlel duwen Samatail nanleng! Atail doadoahk laud nan kalohk kin uhdahn kaperenda ih oh kansensuwedihada Sehdan.—Lep. Pad. 27:11; Ipru 13:15, 16.
3. Ia duwen atail kalohk eh kin kasalehda limpoak ong mehn mpatail?
3 Limpoak ong Mehn Mpatail: Ehuehu ahnsou me kitail kin kalohk ong emen aramas, kitail kin kasalehda atail limpoak ong aramaso. Aramas akan kin uhdahn anahne rong rongamwahu nan ahnsou apwal pwukat. Me tohto kin duwehte mehn Ninipe kan ni mwehin Sona me “sohte douluhl ese wekpeseng en pehrail palimaun oh palimeing.” (Sona 4:11, NW) Atail kalohk kin padahkihong aramas akan duwen ahneki mour mwahu oh kaperen. (Ais. 48:17-19) E kin kihong irail koapworopwor. (Rom 15:4) Ma irail pahn rong oh doadoahngki dahme irail sukuhlki, irail “pahn mourla.”—Rom 10:13, 14.
4. Dahme Siohwa sohte pahn ketin meliehla?
4 Seri mwahu kan sohte kin kasalehda arail limpoak ong arail pahpa oh nohno ni ahnsou kante me koasoandi. Re kin nantihong kasalehda limpoak ahnsou koaros. Pil duwehte, atail limpoak laud ong Koht oh mehn mpatail kan pahn kamwakid kitail en tetehk ahnsou mwahu ong kalohk ahnsou koaros, kaidehn ihte ahnsou me koasoandi ong kalohk. Kitail pahn wonoweite kalohk. (Wiewia 5:42) Siohwa sohte pahn ketin meliehla soangen limpoak wet.—Ipru 6:10.