Rohng Sang Riatail Kristian akan
◼ Australia: Emen ohl me sukuhl laud me adaneki John, kin iang sarawi ni eh kisin seri ahpw mwuhr e wiahla emen me uhdahn sohte kamehlele Koht. Emen pioneer kihdi nah kisin pwuhk Was Life Created? oh ni ahnsou me e pwurehng pwurala reh e kihdi kisin pwuhk Origin of Life. Pioneer menet pwurepwurehng pwurala reh pwehn kalaudehla ahn ohl menet men esehla padahk mehlel. E kin wahla reh makasihn kapw kan oh kasalehiong ih ire kan me pid kapikipik kan oh kokohp kan nan Paipel. Ni ahnsou me e pehm me John pahn men wadek, e kihong ih pwuhk The Bible—God’s Word or Man’s? Mwurin John wadek pwuhko e uhd nda me ih soangen aramas me sohte kamehlele me e kak ese ma Koht uhdahn mie de soh. Eri pioneer menet kihong pwuhken Paipel Padahngki, oh kasalehiong ih parakrap 8 nan pali 23 oh parakrap 13-16 nan pali 25-28. Iren Paipel me kileldi nan pwuhket uhdahn kamwakid John en nda, “Mwein I anahne pwurehng tehk Paipel.”
◼ Mexico: Emen ohl ndaiong sounkalohk men me e sohte kamehlele me Paipel kohsang rehn Koht. Sounkalohk menet idek reh ma e kak kasalehiong ih mehn kadehde kan me kasalehda me Paipel kohsang rehn Koht. Mwurin ara koasoipene pak kei, ohlo tepida mwekidki dahme e kin sukuhlki sang nan Paipel. E keieu mwekidki eh sukuhlki sapwellimen Koht koasoandi kan. E ndaiong sounkalohk menet: “Nin tapio ahnsou me kita kin wadekpene Paipel, e kin duwehte I kin ale kaweid sang pwuhk teikan oh e sohte kin kamwakid ie. Ahpw met ahnsou me kita wadek Paipel, ahpw mehlel kaweid kan me pid tiahk pwuhng, ei mohngiong kin tihwohkihla.”
◼ Amerika (United States): Ni ahnsou me pwopwoud ehu iang wia doadoahk tohrohr en kalohk ong wehi pokon nan kahnimw laud, re tuhwong emen lih sang Taiwan me kin kamehlele Koht ahpw pehm me Paipel ongete mehn wai kan. E kohdo ni ara dewen pwuhk ong kasansal pwehki e sohte wehwehki kahrepen eh mour mendahki e paiamwahu. E kasikasik me Paipel pahn sewese ih en diarada kahrepen eh mour. Pwopwoudo tepida onop reh doadoahngki pwuhken Paipel Padahngki oh kisin pwuhk Lasting Peace and Happiness—How to Find Them. Irail sohte onopki irelaud 2 nan pwuhken Paipel Padahngki, ahpw re uhd koasoiahpene ehu wasa nan kisin pwuhko me oaralap “Pwuhken Kaweid Ehu ong Kapai kan ong Aramas Koaros (A Guidebook for the Blessing of All Mankind).” Mwurin arail koasoiahpene tepin parakrap meh 6 nan wasao, liho kasalehda eh pwuriamwei oh nda me Paipel uhdahn weksang pwuhken pelien lamalam teikan. Mwurin arail koasoiahpene kokohp en Paipel kan me pweidahr, liho nda, “Sohte ehu pwuhk me I kak medewehda me uhdahn pwung me duwehte Paipel!”
◼ Sapan: Emen tohnihmw ndaiong sounkalohk men me e sohte kin kamehlele Koht, ahpw sounkalohk menet kin pwurepwurehng pwurala reh, oh ni mwotomwot ehukihong ih ire kan sang Awake! me oaralape “Mie me Wiahda?(Was It Designed?)” Ekisekis ohl menet wekidala eh madamadau oh tepida nda me mwein mie Sounkapikada men. Met e kin uhd kamehlele me mie Koht, oh sounkalohko kin onop reh ni ara kin doadoahngki kisin pwuhk Rohng Mwahu Sang Rehn Koht!
◼ Canada: Emen sister kihong lih emen makasihn kapw ahnsou me liho kohsang imweo kohlahng douda nan were sidohsao. Ahnsou me sister me kihong liho makasihn kapwo pwurala reh, liho ngihtehtehki me e sohte men rong oh sohte kamehlele Koht. Mendahki met, sistero koasoanehdi en pwurala reh oh kihong ih kisin pwuhk A Satisfying Life—How to Attain It. Ni sistero eh diarada liho ni imweo, e ndaiong liho me e ese me liho sohte kamehlele Koht, ahpw e medemedewe duwen liho pwehki e ese me liho nohno kiripw men . E kasalehiong liho parakrap 6 nan pali 4 en kisin pwuhko, me kin koasoia iawasa e kak diar kaweid mwahu ie. Ih eri kangoange liho en wadek sawas kan nan iren mehn kasukuhl 2 me pid apwalih seri kan. Liho uhdahn perenki ale kisin pwuhko.