Sounparehr 100 me Pakairpen Wehio Wiewiawi!
1. Kangoang dahieu kohwong sapwellimen Siohwa aramas akan ren wia sounpar epwiki samwalahro?
1 “Kilang, Nanmwarkio kaundahr! Kumwail iei sapwellime sounkair kan. Eri pakairki, pakairki, pakairki Nanmwarkio oh sapwellime wehi.” Koasoi kangoang pwukat me Brother Rutherford nda sounpar 100 samwalahro, kin kangoange sapwellimen Siohwa aramas akan en lohkiseli rongamwahu en Wehio wasa koaros nin sampah. Iei met me kitail kin wiewia! Duwehte tepin Kristian ko, kitail kin kalohki rongamwahu en Wehio ong “aramas akan koaros nin sampah.” (Kol. 1:23) Erein sounpar 100 samwalahro, dahme kitail wiadahr pwehn pakairki Wehin Koht? Ia duwen atail kak pousehlahte pakairki duwen Wehio ni atail kerenlahngehr sounpar 100 en ipwidien Wehio?
2. Ia duwen neitail sawasepen Paipel kan eh kin utung Wehin Koht?
2 Katamando Dahme Wiawi Mahso: Sounpar epwiki kei samwalahro, neitail sawaspen Paipel kin utung Wehin Koht. Sangete 1939 neitail makasihn me keieu kesempwal kin adaneki: Kahn Iroir Pakpakairki Wehin Siohwa. Makasihn wet kalapw koasoia duwen Wehio oh dahme e pahn kapwaiada. Makasihn en Awake! pil kin kasalehda me Wehin Koht iei ihte koapworopwor ong tohnsampah. Ia uwen eh konehng me ahnsou wet makasihn riau pwukat me keieu tohto ar kawehwehdi ni soangsoangen lokaia oh me keieu tohto kohpeseng nin sampah!—Kaud. 14:6.
3. Ia ekei wiepe kan me kitail kin doadoahngki pwehn pakpakairki Wehio?
3 Sapwellimen Siohwa aramas akan kin doadoahngki soangen wiepe kei pwehn pakairki Wehio. Mahs, se wiahda sidohsa me mie sipihker laud powe, redio prokram, oh kisin dipwisou en rongorong padahk kan. Soangen wiepe pwukat sewese sen kihpeseng rongamwahwo ong aramas tohto ni ahnsou me malaulau sounkalohki Wehio. Sounpar kei nekiero, Se kihda oaralap kei nan jw.org, me pakpakairki Wehio ong aramas rar kei—iangahki irail kan me kin mi nan sahpw kan me atail doadoahk kin keinapwihdi.
4. Soangen koasoandi kapw tohrohr dahieu me kitail kin wia?
4 Sapwellimen Siohwa aramas akan pil wiahda koasoandi kapw tohrohr kei pwehn kihpeseng rongamwahu en Wehio. Karasepe, tepisang 1995 kohdo, se doadoahk laud en kalaudehla atail doadoahk en-ihmw lel-ihmw sang ni atail kalohk wasahn mwemweit kan, wasahn peidi en sidohsa kan, oh wasahn pesines kan. Me keren, se koasoanehdi doadoahk tohrohr en kalohk ong wehi pokon nan kahnimw laud nan sampah pwon. Patehng met, mwomwohdiso tohto kin wia doadoahk en kalohk en wehi pokon nan arail wasahn kalohk sang ni arail kin doadoahngki tehpel kan me pwuhk kan kin mi powe ni wasa kan me aramas tohto kin alialu nan kahnimwo. Ahpw ni mehlel, doadoahk en ihmw-lel-ihmw iei doadoahk me keieu kesempwal nan atail doadoahk-en kalohk.—Wiewia 20:20; NW.
5. Soangen ahnsou mwahu dah kan me pahr en kalohk kapw wet pahn kihong kitail?
5 Kilangla Mwowe: Ni tepin pahr en kalohk nan September, me tohto pahn tepida papah nin duwen pioneer kan. Ke kak iang irail? Ma sohte kak, ke kak iang doadoahk en sawaspen pioneer ekei pak? Mehnda ma ke kak iang pioneer de soh, Siohwa uhdahn pahn ketin kapaiada omw tounmetei kan me ke wiahda ni omw kihong omw ahnsou laud en iang pakairki duwen Wehio.—Mal. 3:10.
6. Dahme kahrehda sounpwong en October 2014 pahn wia sounpwong tohrohr ehu?
6 Sounpwong en October 2014 pahn wia kilelepen me ipwidien Wehio sounparehr 100. Met pahrekiong, Kahn Iroir en sounpwongo pwe e kin koasokoasoia duwen Wehin Koht. Ke sou nantihong kihong me tohto uwen me kak? Ni atail kin kilikilangwohng ahnsou kohkohdo, emenemen kitail en pousehlahte “kapahrengki rongamwahu en Wehin Koht” ong irail koaros me pahn men rong.—Wiewia 8:12.