Erein Ahnsoun Kataman, Ke Pahn Alasang Sapwellimen Siohwa oh Sises Ngoang?
1. Dahme Sounkadehdehn Siohwa kan kin nantihong kalaudehla wia erein ahnsoun Kataman?
1 Siohwa kin ketin kapwaiada kupwure ni ngoang. Me pid duwen ekei kapai kan en Wehin Koht, Aiseia 9:7 mahsanih: “KAUN-O, Wasa Lapalahpie, ketin ngoangki kowahlap mepwukat koaros en pweida.” Duwehte met, sapwellimen Koht Ohlo kin kasalehda eh kin ngoangki kowahlap kaudok mehlel erein sapwellime doadoahk en kalohk nin sampah. (Sohn 2:13-17; 4:34) Nan ehuehu pahr erein ahnsoun Kataman, sounkalohk rar kan nan sampahn pwon kin kalaudehla arail nantihong alasang sapwellimen Siohwa oh Sises ngoang sang ni arail kin kalaudehla arail doadoahk en kalohk. Ke pahn iang irail wia met?
2. Tepisang March 7, dahme ngoang pahn kamwakid kitail en wia?
2 Doadoahk en Luhk ong Kataman: Atail koasoandi nan pahret en pakairkihong meteikan duwen rahnen Katamano pahn tepida Rahn Kaunop March 7. Koasoanehdi ahnsouwet pwe ken ngoangki doadoahk en kalohk. Tohnmwomwohdiso kan pahn inenen perenki oh ngoangki arail pahn nantihong luke uwen aramas tohto me re kak. Nantihong medemedewehte en luke noumw tohnsukuhl en Paipel kan, me ke kin pwurehng pwurala rehrail, iengomw tohndoadoahk kan, kisehmw kan, oh iengomw tohnsukuhl kan ni omw pahn kihong irail doaropwehn luhk de ni omw pahn doadoahngki jw.org.
3. Ia duwen atail kak kalaudehla atail doadoahk en kalohk nan March oh April?
3 Wia Sawaspen Pioneer: Ngoang pahn pil kamwakid kitail en kalaudehla atail doadoahk en kalohk. Me tohto pahn kak wia sawaspen pioneer erein March oh April, pwe kitail pahn kak pilada wiahda awa 30. Erein amwail kaudok en peneinei de wia pein omw onop, en medemedewe omw kapakapki ia duwen omw kak wia met. (Lep. Pad. 15:22) Atail ngoang kak kamwakid meteikan en pil ngoangki kalohk. Ma ke wekidala omw koasoandi kan pwe ken kak kalaudehla dahme ke kak wia, ke pahn alasang sapwellimen Sises ngoang.—Mark 6:31-34.
4. Soangen kapai dah kan me kin kohsang atail kin kahlemengih sapwellimen Siohwa oh Sises ngoang?
4 Erein ahnsoun Kataman, atail kahlemengih sapwellimen Siohwa oh Sises ngoang pahn wahdo kapai laud kan. Met pahn kahrehda eh tohtohla me kitail pahn kak kalohk ong nan atail wasahn kalohk. Kitail pahn kak ahneki peren oh nsenamwahu me kohsang atail kin papah Siohwa oh sewese meteikan. (Wiewia 20:35) Me keieu kesempwal, kitail pahn kaperenda atail Koht oh sapwellime Ohl me kin kasalehda ngoang.