Neitail Koakon en Kasukuhl
1. Ia duwen sounkalohk Kristian kan ar kin duwehte sounparada dipwisou kan?
1 Sounparada dipwisou kan kin doadoahngki soangsoangen dipwisou en doadoahk kan. Ekei dipwisoun doadoahk ongete ahnsou doadoahk tohrohr ehu, ahpw ekei dipwisou kan kin kalapw kadoadoahk. Tohndoadoahk koahiek en parada soahng kan kin naineki dipwisoun doadoahk me re kalapw doadoahngki nan neirail koakon en dipwisoun doadoahk, oh iei dipwisoun doadoahk pwukat me re samanihala doadoahngki. Paipel kin kangoange emenemen Kristian en kin koahiekla nan doadoahk en kalohk oh en wia “soundoadoahk men me sohte kin namenengki eh doadoahk.” (2 Tim. 2:15) Mehn doadoahk dahieu me keieu kesempwal nan neitail koakon en dipwisou en doadoahk? Iei Mahsen en Koht, dipwisoun doadoahk me kitail kin keieu doadoahngki pwehn ‘katohnpadahk.’ (Mad. 28:19, 20) Kahrehda kitail en nantihong en samanihala doadoahngki “mahsen en Koht ni mehlel.” Ahpw, pil miehte dipwisoun doadoahk teikan me kalapw kadoadoahk nan neitail koakon en kasukuhl me Kristian koaros anahne koahiekla en doadoahngki pwehn padahkihong aramas akan padahk mehlelo.—Lep. Pad. 22:29.
2. Ia neitail mehn doadoahk en kasukuhl mengei kan?
2 Neitail Mehn Doadoahk en Kasukuhl Mengei kan: Soangen dipwisou dah likin Paipel, me kitail anahne doadoahngki? Keieun dipwisoun doadoahk me kitail naineki en padahngki padahk mehlel en Paipel iei Dahme Paipel Uhdahn Padahngki? Mwurin atail kanekehla onopki pwuhk wet rehn neitail tohnsukuhl en Paipel, kitail kin uhd doadoahngki “Dadaurete ni Limpoak en Koht” pwehn padahkihong ih en doadoahngki kaweid en Paipel kan nan eh mour rahn koaros. Ihme kahrehda, kitail en koahiekla ni atail doadoahngki pwuhk riau pwukat. Kitail en pil audehkihda neitail koakon en kasukuhl ekei kisin pwuhk kan. Rohng Mwahu Sang Rehn Koht! iei pil ehu neitail dipwisoun doadoahk ong tapiada onop en Paipel kan. Ma nan atail wasahn kalohk mie soangen aramas me sohte nohn koahiek en wadawad de kin doadoahngki ehu lokaia tohrohr me sohte de malaulau neitail pwuhk ni eh lokaiao, eri kitail kak doadoahngki Listen to God ni (lokaiahn wai) de Rong Koht pwe Ken Mour Kohkohlahte. Ihs me Kin Wia Kupwuren Siohwa Rahn Pwukat? iei ehu dipwisoun doadoahk ong kasukuhl en kahrelahng neitail tohnsukuhl kan nan sapwellimen Siohwa pwihn. Kasdo kan me sawas laud nan doadoahk en katohnpadahk, me duwehte Dahme Kahrehda Ken Onopki Paipel?, Dahme Kin Wiawi nan Atail Wasahn Kaudok?, oh Does God Have a Name? ni (lokaiahn wai) iei dipwisou kan me kitail en samanihala doadoahngki.
3. Dahme Atail Doadoahk ong Wehio me pahn kohdo mwuhr kan pahn sewese kitail en wia?
3 Atail Doadoahk ong Wehio me pahn kohdo mwuhr kan pahn sewese kitail en samanihala doadoahngki mehn doadoahk tohto mengei nan neitail koakon en kasukuhl. Ni atail kin nantihong en samanih doadoahngki mehn doadoahk pwukat, kitail pahn kapwaiada kaweid me pwilsang rehn Koht: “Kanakanahieng pein kowe oh pil kanahieng omw padahk kan. Nantihong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.”—1 Tim. 4:16.