Kalohk ong Soangen “Aramas Koaros”
1. Ia duwen sounkalohk koahiek kan arail kin duwehte tohndoadoahk saman kan?
1 Tohndoadoahk saman men kin naineki dipwisou tohto oh ese iahd oh ia duwen eh pahn doadoahngki ehuehu kepwe pwukat. Pil duwehte, kitail naineki soangsoangen kepwehn doadoahk kan pwehn sewese kitail en wia atail kalohk. Karasepe, mie soangsoangen ire tohto nan neitail kisin pwuhk me pali 32 me wiawihda pwehn sewese kitail kalohk ong soangen “aramas koaros.”—1 Kor. 9:22.
2. Iahd me kitail pahn doadoahngki neitail kisin pwuhk me pali 32 nan kalohk?
2 Iahd me Kitail en Doadoahngki Neitail Kisin Pwuhk me Pali 32: Tohndoadoahk saman men pahn doadoahngki ehu nah kepwehn doadoahk ko ni ahnsou me e leme me konehng. Pil duwehte, kitail kak kihla neitail kisin pwuhk me pali 32 ahnsou me kitail pehm me e pahn mwahu ong emen, a kaidehn nan sounpwong kante me kitail pahn kihla. Karasepe, ma kitail pahn kihla pwuhken Paipel Padahngki ahpw kitail tuhwong emen me kohsang sahpw ehu me pali laud en aramas akan kaidehn Kristian kei oh e sohte nohn men rong duwen Paipel, e pahn mwahu ma kitail kihong ehu kisin pwuhk pwukat me mwahu ong ih. Mwurin atail kalaudehla eh perenki rong, kitail eri kasalehiong ih pwuhken Paipel Padahngki.
3. Dahme kahrehda kitail anahne koahiekla en doadoahngki neitail kepwehn kalohk kan?
3 Paipel kin kapinga irail kan me kin koahiek en doadoahk. (Lep. Pad. 22:29) Rahnwet, sohte doadoahk ehu me kesempwalsang atail “padapadahngkiseli Rongamwahu wet sang rehn Koht.” (Rom 15:16) Pwehn wia “soundoadoahk men me sohte kin namenengki eh doadoahk,” kitail pahn anahne nantihong koahiekla en doadoahngki neitail kepwehn doadoahk kan.—2 Tim. 2:15.