Sewese Aramas akan Ren Rong Koht

1. Kisin pwuhk dahkei me kohda ni Mihting Tohrohr en “Wehin Koht en Pweida!,” oh dahme kahrehda ara wia kepwehn doadoahk mwahu kei?

¹ Ni Mihting Tohrohr (District Convention) en “Wehin Koht en Pweida!,” kisin pwuhk kapw riau kohda me adaneki Rong Koht pwe Ken Mour Kohkohlahte oh Rong Koht.a Pwehki ire kan loale me malaulau, pwuhk pwukat kak mwadang oh mengei en kawehwehdi. Ni mehlel, ni ahnsou me Rong Koht pwe Ken Mour Kohkohlahte wiawihda ni lokaiahn wai, e mweimweidahr pwehn kawehwehdi ni lokaia 431.

2. Ihs me pahn paiekihda pwuhk pwukat?

² Ihs me pahn keieu paiekihda pwuhk pwukat? Nna medewehla irair pwukat me kin kalapw pwarada nan sampah pwon:

• Mwein sounkalohk men koasoakoasoiong tohnihmw men me e ahpwtehn tuhwong de pwurala reh, oh wehwehkihda me tohnihmwo sohte kak wadawad de sohte nohn ese wadawad.

• Sounkalohk men kalohk ong aramas me doadoahngki lokaia ehu me pwuhk malaulaute me kawehwehdi de sohte. De aramas tohto nan wasahn kalohko sohte kak wadek lokaiao me re kin keieu doadoahngki.

• Sounkalohk men lokaiahki peh kan pwehn kalohk ong me salengepon oh lohteng kan nan eh wasahn kalohk.

• Pahpa de nohno men kin padahkihong nah serio me saikinte ese wadawad padahk mehlel.

3. Dahme ke kak kilangada nan pwuhk en Rong Koht?

³ Ia Duwen Ara Wiawihda: Nan kisin pwuhko Rong Koht (lokaiahn wai), nting kan malaulau pwe e kasalehdahte ire kesempwal ehu oh iren Paipel kan ni imwin ehu pali kan. Dahme kahrehda? Song medewehla ma emen kihong uhk kisin pwuhk ehu me mi ni ehu lokaia me ke sohte kak wadek, ele ni soangen lepin nting kan me ke uhdahn sehse. Ia duwe, ke pahn perenki pwuhk wet mehnda ma kilel oh karasaras kan loale kaselel? Aramas tohto sohte pahn perenki. Ih pil duwen aramas me sohte kak wadawad, re kin pweiek en wadek pwuhk kan me nting tohto mi loale. Kahrehda, dahme keieu sansal nan ehuehu pali iei karasaras kan me kaunopadahr ni keneinei, iangahki sain ehu me kaweid mehnia karasaras ke pahn tepida koasoia oh kolahng ni ehu.

4. Ia duwen Rong Koht pwe Ken Mour Kohkohlahte eh wiawihda?

⁴ Karasaras kan nan Rong Koht pwe Ken Mour Kohkohlahte duwehte karasaras kan nan Rong Koht. E wiawihda ong onop Paipel rehn irail me sohte nohn ese wadawad de kin suksukuhlki en esehla wadawad. Me wia onopo pil kak doadoahngki pwuhk wet mehnda ma nah tohnsukuhlo doadoahngki pwuhko Rong Koht. Ni tepin ehuehu irelaud me wiawihkihda pali riau, mie peidek ehu me kin pasapengla nan ire ko me kileldi wasao. Ire ko kin iangahki karasaras oh pil iren Paipel kei. Ni imwin ekei pali kan en pwuhko, mie kisin koakon me kasalehda ire kei oh iren Paipel kei me ke kak koasoiaiong omw tohnsukuhlo oh e pahn poahsoankihda uwen eh koahiek.

5. Iahd oh ia duwen omw kak kihla pwuhk pwukat?

⁵ Wiepen Omw Kak Doadoahngki Pwuhk Pwukat: Ke kak kihla pwuhk pwukat nan doadoahk en kalohk ihmw lel ihmw ma ke pehm me e konehng en kihla, mehnda ma kaidehn kisehn pwuhk kan me pahn kihla nan sounpwongo. (Menlau kilang koakon “Wiepen Omw Kak Kihla Kisin Pwuhk Pwukat.”) Ke kak kihla pwuhk pwukat ni omw pahn pwurehng pwurala rehn emen me men rong, sang ni omw pahn ndahng me mie pwuhk ehu me ke men kasalehiong, oh eri kihong ih pwuhko.

6. Ia duwen atail pahn wia onop en Paipel ni atail doadoahngki pwuhk pwukat?

⁶ Pwehki sohte peidek kan me kileldi nan Rong Koht, omw pahn koasoia ire kan sohte pahn doadoahngki peidek oh pasapeng kan ni wiepeohte me mwein ke kin doadoahngkihong pwuhken Paipel Padahngki. Nan sahpw koaros, aramas akan kin perenki rong koasoi en poadopoad kan. Eri, doadoahngki karasaras ko oh padahkihong irail poadopoad kan en Paipel. Kawehwehda dahme karasaras ko kasalehda. Kasalehda me ke perenki dahme ke koasoakoasoia. Luke tohnsukuhlo en kasalehda dahme e kilang oh medemedewe. Wadek iren Paipel kan me kileldi pah oh kawehwehda dahme ire ko kasalehda. Idek peidek kan pwehn kahrehiong ih en iang koasoi oh tehk mwahu ma e uhdahn wehwehki. Ma e doadoahngki Rong Koht pwe Ken Mour Kohkohlahte, wadekpene ire ko iangahki iren Paipel ko ni amwa koasoia ehuehu karasaras.

7. Ia duwen atail kak sewese tohnsukuhlo en kekeirda?

⁷ Sewese Tohnsukuhlo en Kekeirda: Omw onop rehn tohnsukuhlo kakete kahrehiong ih en men esehla wadawad pwehn kak pein sukuhlki duwen Siohwa. (Luk 11:28; Sohn 17:3) Kahrehda, ma Rong Koht me kadoadoahk nan onopo, mwein ke kak pekihda ma kumwa kak sukuhlki en esehla wadawad, oh uhd tepida doadoahngki Rong Koht pwe Ken Mour Kohkohlahte ni ahnsou me e kakehr wadawad. Sohte lipilipil mehnia pwuhk me kumwa doadoahngki, tohnsukuhlo saikinte pahn kak papidais mwurin amwa kanekehla kisin pwuhko. Ke kak uhd onopki reh pwuhk en Paipel Padahki de pil ehu pwuhk tohrohr me konehng me pahn kalaudehla eh esehla Paipel.

8. Dahme kahrehda ke kalahnganki kepwehn doadoahk en kalohk kapw pwukat?

⁸ Aramas akan anahne rong Kaunepen Lahng oh Sampah ma irail men mour kohkohlahte. (Ais. 55:3) Kupwuren Siohwa iei me “aramas koaros” iangahki irail me sohte ese wadawad ren sukuhlki ia duwen ar pahn rong ih. (1 Tim. 2:3, 4) Kitail uhdahn kalahnganki kepwe kapw pwukat me kitail kak doadoahngki pwehn padahkihong aramas akan pwe ren rong Koht!

[Nting tikitik me mi pah]

[Koakon nan pali 3]

Wiepen Omw Kak Kihla Kisin Pwuhk Pwukat

Kasalehiong tohnihmwo pali 2-3 oh nda: “Ke pahn mwahuki mour nan sampah ehu me duwehte met? [Mweidohng tohnihmw en sapeng] Paipel inoukihda [de pwuhk sarawi inoukihda] me Koht pahn ketin wiahla sampah wasa kaselel oh meleilei ehu oh sohte me pahn semwehmwe de soumwahu. Tehk dahme kitail anahne wia pwehn kak mour wasaht. [Wadek Aiseia. 55:3, me kileldi powe nan pali 3.] Met padahkihong kitail en ‘kohla rehn’ Koht oh en ‘rong’ ih. Ahpw ia duwen atail kak rong Koht?” Pahkalahng pali 4-5 oh koasoiapene pasapengo. Ma sohte eh ahnsou, pwilikihdi reh kisin pwuhko oh koasoanehdi en pwurala reh oh koasoiapene pasapengo.