Listen to God​—Ia Mwomwen Doadoahngki Met

Kisin pwuhk me adaneki Listen to God wiawihda pwe kitail en padahkihong irail kan me kin apwalki wadawad, padahk mengei kan nan Paipel ni atail kin doadoahngki kilel kan. Ehuehu iren mehn kasukuhl kin kasalehda kilel kan me kaunopadahr ni keneinei oh ehuehu kilel kin kasalehda mehnia kilel me kitail pahn uhd koasoiapene mwurin mwo.

Kisin pwuhk Rong Koht pwe Ken Mour Kohkohlahte pil kin doadoahngki kilelkohte me mi nan kisin pwuhk Listen to God, ahpw mie nting me tohnsukuhl kan me ekis ese wadawad kak wadek. Ni ahnsoun onop, sounkalohk kan kin kalapw doadoahngki Rong Koht pwe Ken Mour Kohkohlahte, a neirail tohnsukuhl kan kin doadoahngki Listen to God. Pali laud en pali kan kin mie koakon ehu me kin audaudki ire kan me ira kak koasoiapene. Ira kak wia me pahn pahrekiong uwen koahiek en tohnsukuhlo.

Ke kak kihla sohte lipilipil rehn kisin pwuhk pwukat, mehnda ma kaidehn ih pwuhk me kitail pahn kihla nan sounpwongo. Ni ahnsou me ke onop Paipel rehn emen, doadoahngki kilel kan nan pwuhko pwehn kawehwehda dahme kileldi nan Paipel. Idek peidek kan pwe tohnsukuhlo en kak iang koasoakoasoi oh tehk mwahu ma e wehwehki. Wadek oh koasoiapene iren Paipel kan me mi pah. Mwurin amwa kanekehla onopki kisin pwuhko, uhd doulahng Dahme Paipel Uhdahn Padahngki? pwehn sewese noumw tohnsukuhlo en kak kekeirda oh papidaisla.