Poakohng Koht oh Mehn Mpomw​—Ia Duwen Omw Kak Kakairada Met

Mendahki Kosonned en Moseso sohte kowohng Kristian kan, ahpw kehkehlik keieu kesempwal riauo, en poakohng Koht oh poakohng mehn mpomw, pil kin katamanda dahme Siohwa kupwurki sang kitail. (Md 22:37-39) Kitail sohte sohsohki soangen limpoak wet. Kitail anahne kakairada. Ia duwen? Ehu ahl kesempwal iei sang ni atail kin wadek Paipel ehuehu rahn. Ni ahnsou me kitail kin tehk ekei sapwellimen Koht irair me sansalda nan Paipel, kitail kin uhdiahl “sapwellime lingan.” (Me 27:4) Imwilahn met, atail poakohng ih kin laudla oh atail madamadau kin duwehla sapwellime. Met kin kamwakid kitail en kasawih sapwellimen Koht kehkehlik kan, iangahki kehkehlik en poakohng meteikan. (Soh 13:34, 35; 1So 5:3) Iet iren sawas siluh me pahn kahrehda wadawad en Paipel en kaperen:

• Medewehla oh doadoahngki omw pepehm kan. Medewehla me ke mi wasao. Dahme ke pahn kilang, rong, oh ned? Ia pepehm en irail me pahn iang mi mwo?

  

• Wekidala mwomwen omw kin wadawad. Iet ekei iren sawas kan: Wadawad ni ngihl laud, de rong wadawad en Paipel me rekordi oh idawehn nan noumw Paipel. Wadek duwen koasoiepen emen aramas nan Paipel de oaralap ehu a kaidehn wadek ni irekidien irelaud kan. Karasepe, doadoahngki Sawas ong Onopki Mahsen en Koht pwehn wadek duwen Sises. Wadek irelaudo pwon wasa me iren rahn kohsang ie. Wadek pwuhken Paipel kan nin duwen irekidien ar ntingdi.

  

• Wadek pwehn wehwehki. Pil wadek irelaud ehute ehuehu rahn ni omw dehdehki oh doudouloale mwahusang douluhl wadek irelaud tohto pwehn kanekehla pwuhko pwon. Tehk audepen ireo. Kasawih oaritik kan. Doadoahngki map kan oh marginal references. Roporopkihte ehu ire me ke sohte wehwehki. Ma kak, doadoahngkihte soangen uwen ahnsowo pwehn doudouloale ni omw pahn wadawad.