Sampah Wet Pahn Sohrala?

Dahme Sohte Pahn Sohrala?

ARAMAS AKAN

Dahme Paipel mahsanih: Koht “sohte ketin wiahda [sampah] ni mwomwen sapwtehn ehu, ahpw ni mwomwen wasa mwahu ong aramas en kousoan ie.”​—AISEIA 45:18.

SAMPAH

Dahme Paipel mahsanih: “Ehu dih kin kohdo oh kohkohla, oh mwuri pil ehu dih kin kohdo oh pil kohkohla, ahpw sampah duweduwehte.”​—EKLESIASDES 1:4.

MET WEHWEHKI: Nin duwen me Paipel mahsanih, sampah sohte mwahn pahn mwomwla oh e pahn mie towe ahnsou koaros. Eri, ia wehwehn imwin sampah?

MEDEWE: Paipel kapahrekiong imwin sampah wet me kohkohdo ong dahme wiawi ni mwehin Nohao. Ni ahnsowo, sampah direkihla “wiewia suwed kan.” (Senesis 6:13) Ahpw Noha wia aramas pwung men. Eri Koht ketin doarehla Noha oh eh peneineio, ahpw E ketin kamwomwala aramas suwed ko sang ni nohlik ehu. Paipel kasalehda dahme wiawi ni ahnsowo ni eh mahsanih: “Sampah en ahnsowo kasohrala ni nohlik eh wiawi.” (2 Piter 3:6) Met iei imwin sampah ni ahnsowo. Ahpw, dahme kasohrala? Kaidehn sampah ahpw aramas suwed kan nin sampah. Eri, ni ahnsou me Paipel kin mahsanih duwen imwin sampah, e sohte kin wehwehki me sampah wet pahn mwomwla. Ahpw met kin wehwehki me aramas suwed kan nin sampah oh koasoandi kan me re wiahda me pahn sohrala.

Dahme Pahn Sohrala?

KAHPWAL OH SUWED KAN

Dahme Paipel mahsanih: “Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail; a me aktikitik kan pahn sapwenikihla sahpwo oh re pahn paiamwahu oh popohl.”​—MELKAHKA 37:10, 11.

MET WEHWEHKI: Nohlik en ni mwehin Nohao sohte kasohrehla douluhl suwed. Mwurin Nohliko, aramas suwed kan pwurehng kansensuwedihala mouren aramas koaros. Ahpw, ni ahnsou keren Koht pahn ketin kasohrehla suwed koaros. Duwehte me sounmelkahkao koasoia: “Aramas suwed kan pahn sohrala.” Koht pahn ketin kasohrehla suwed kan sang ni eh ketin doadoahngki sapwellime Wehio. Met iei koperment ehu sang nanleng me kin kakaun aramas akan me kin peikiong Koht.

MEDEWE: Ia duwe, kaunen sampah kan pahn perenki utung Wehin Koht? Paipel kasalehda me re sohte pahn. Ni pweipwei, re pahn uhwong Wehin Koht. (Melkahka 2:2) Ia pahn imwilahn met? Wehin Koht pahn kasohrehla koperment en aramas koaros oh e “pahn mihmi kohkohlahte.” (Daniel 2:44) Ahpw dahme kahrehda en aramas akan kaunda anahne imwisekla?

DAHME ANAHN​—Kaundahn Aramas en Imwisekla

Dahme Paipel mahsanih: “Sohte aramas emen me kaunda pein eh mour.”​—SEREMAIA 10:23.

MET WEHWEHKI: Aramas sohte kepikipikda pwe ren kaunda pein irail. Re sohte kin pweida ni ar kin kaunda aramas teikan oh kamwahwihala ar kahpwal kan.

MEDEWE: Britannica Academic koasoia me ehuehu koperment mwomwen sohte kak “kamwahwihala kahpwal kan me duwehte semwehmwe, duhpek, soumwahu, melimel, rerrer en sahpw, ilok laud oh mahwen de tiahk lemei teikan.” E pil doula koasoia: “Ekei . . . kamehlele me koperment ehu me pahn kaunda sampah pwon me kak kamwahwihala kahpwal pwukat.” Ahpw mehnda ma koperment en aramas koaros miniminpene, sampah pahn mihmihte pahn manaman en aramas soh unsek kan me sohte kak kamwahwihala kahpwal kan me kileldi mwoweo. Ihte koperment en Wehin Koht iei koperment me ahneki manaman en kamwahwihala kahpwal en sampah koaros kohkohlahte.

Ihme kahrehda, imwin sampah iei imwin koasoandi suwed en mwehi wet nin duwen me Paipel mahsanih, eri met kaidehn mehkot me aramas mwahu kan pahn masak. Ahpw met wia mehkot me kitail en kasikasik pwehki sapwellimen Koht sampah kapw kaselelo pahn wiliandi sampah mering wet me ohlahr!

Iahd me mepwukat koaros pahn wiawi? Iren mwurin met pahn kawehwehda pasapeng sang nan Paipel.