Peidek Kan Sang Sounwadawad Kan

Ia duwen iren onopo “Mwaromwi en Sarawihla” nan Kahn Iroir en June 2020 eh kawehwehda mwahu dahme kitail kamehlele me pid mwaren Siohwa oh sapwellime pwuhng en kaunda?

▪ Nan iren onopo, kitail sukuhlki me mie ire kesempwal ehu me pidada aramas oh tohnleng kan koaros: met iei en kasarawihla mwaren Siohwa me lapalap. Sapwellimen Koht pwuhng en kaunda​—me iei, sapwellimen Siohwa elen kaunda me keieu mwahu​—e kin pidada ire ehu me uhdahn kesempwal. Duwehte met, ma aramas emen kin lelepek ong Koht de soh, met kin pidada ire kesempwalo me pid kasarawihla mwaren Siohwa.

Dahme kahrehda ahnsou wet e kesempwal en kasalehda ire kesempwalo me pid mwaren Siohwa oh en kasarawihla mwaro? Kitail pahn koasoiapene kahrepe siluh.

Keieu, Sehdan kin uhwong mwaren Siohwa, nan mwetuwel en Ihden. Peideko me Sehdan idek rehn Ihp mwomwen kasalehda me Siohwa sohte ketin kadek oh me sapwellime kaweid kan me e ketikihong Adam oh Ihp sohte pahrek. Sehdan nda soahng kan me weksang dahme Siohwa ketin mahsanih, e nda me Koht sounlikamw men. Eri e lahlahwe mwaren Siohwa. E wiahla “Tepilo” me wehwehki “soun karaunlikamw.” (Sohn 8:44) Pwehki Ihp kamehlele ahn Sehdan likamw kan, e sapeikiong Koht, oh uhwongada sapwellime pwuhng en kaunda. (Sen. 3:1-6) Leledo rahnwet, Sehdan kin pousehlahte nda soahng kan me likamw duwen Siohwa. Mwein ele irail kan me kin kamehlele likamw pwukat kakete sapeikiong Siohwa. Eri ong sapwellimen Koht aramas akan, karaunlikamw me wiawihong mwaren Siohwa uhdahn wia wiewia sapahrek me uhdahn suwed. Ih met me kahrehda mie lokolok laud oh soahng suwed kan nin sampah.

Keriau, pwe aramas oh tohnleng kan koaros en paiekihda, Siohwa pahn ketikihsang lahlahwe koaros oh kadehdehda mwareo. Ih met me keieu kesempwal ong Siohwa. Ihme kahrehda E ketin mahsanih: “I uhdahn pahn kasarawihala mwarei lapalap.” (Esek. 36:23, NW) Oh Sises ketin kasalehda ni sansal dahme keieu kesempwal nan ahn sapwellimen Siohwa ladu lelepek kan ar kapakap ni eh mahsanih: “Mwaromwi en sarawihla.” (Mad. 6:9) Paipel kin pwurupwurehng kasalehda kesempwalpen en kalinganahla mwaren Siohwa. Kitail kilang ekei karasaras: “Kumwail kapinga lingan en mwaren KAUN-O.” (1 Kron. 16:29; Mel. 96:8) “Kumwail koulki lingan en mware.” (Mel. 66:2) “I pahn kalinganahla mwaromwi kohkohlahte.” (Mel. 86:12, NW) Ehu ahnsou me Siohwa ketin mahsendihdo sang nanleng wiawi ni tehnpaso nan Serusalem, wasa me Sises mahsanih: “Semei, komw ketin kalinganahda mwaromwi.” Siohwa ketin sapeng mahsanih: “I kalinganahdahr edei oh I pahn pil pwurehng kalinganahda.”​—Sohn 12:28.a 

Kesiluh, kupwuren Siohwa pahn kin ahnsou koaros pidada mwareo. Medewehla met: Ni kaimwiseklahng kasongosongo mwurin Kaundahn Pahr Kid en Krais, dahme pahn wiawi mwurin mwo? Ia pahn ahn tohnleng koaros oh aramas akan ar madamadau ong mwaren Siohwa ni ahnsowo? Pwehn sapengala peidek wet, kitail tamataman ire kesempwal riau​—ahn aramas akan ar lelepek oh Siohwa me sapwellimanki pwuhng en kaunda. Ia duwe, aramas akan me kadehdedahr ar lelepek mahso pahn pil pwurehng lelohng kasongosong pwehn kolokolete arail lelepek? Soh. Irail unseklahr oh aleier kasongepen ar lelepek. Irail pahn alehdi mour soutuk. Patehng met, sohte anahnepen en kadehdehda ma sapwellimen Siohwa elen kaunda me keieu mwahu. Ni ahnsowo, koaros nanleng oh sampah pahn miniminpene oh pwungki sapwellimen Siohwa kaunda. Ahpw ia duwen mwaren Siohwa?

Ni ahnsowo, koaros pahn esehlahr dahme mehlel duwen Siohwa oh mwareo pahn kasarawihla ni unsek. Ahpw mwaren Siohwa iei me pahn keieu kesempwal ong sapwellime ladu kan koaros. Dahme kahrehda? Pwehki irail pahn kilang Siohwa pahn ketin pousehlahte wiahda soahng kapwuriamwei kan. Medewehla met: pwehki Sises ni aktikitik, pahn kapwurelahng Siohwa kaunda koaros, Koht pahn “ketin wiahla mehkoaros ong koaruhsie.” (1 Kor. 15:28) Mwurin mwo, aramas akan nin sampah pahn perenki “saledek lingan en sapwellimen Koht seri kan.” (Rom 8:21) Siohwa pahn ketin kapwaiada kupwureo en kaminiminpene sapwellime peneinei nanleng oh sampah nin duwen peneinei laud minimin ehu.​—Ep. 1:10.

Ni soahng pwukat ar pahn wiawi, ia pahn ahn sapwellimen Siohwa peneinei nanleng oh sampah ar pepehm? Atail inengieng kapinga mwaren Siohwa pahn laudla. Sounmelkahkao Depit ntingihedi: “Kitail kapinga KAUN-O . . . Kitail kapinga lingan en mware kohkohlahte!” (Mel. 72:18, 19) Pil kohkohlahte, kitail pahn pousehlahte rapahki kahrepe kapw oh kaperen kan en wia met.

Mwaren Siohwa kin pidada soahng koaros duwen ih. Ni atail kin medewehla mwaren Siohwa, kitail kin medemedewe sapwellime limpoak. (1 Sohn 4:8) Kitail pahn ahnsou koaros tamataman me Siohwa kapikada kitail ni limpoak, e ketikihong kitail pweinen pweipwei sapahlo ni limpoak, oh e kin ketin kaunda ni limpoak oh pwung. Ahpw kitail pahn pousehlahte kilang sapwellimen Siohwa limpoak ong kitail kohkohlahte. Pil kohkohlahte, kitail pahn men karanihala ih nin duwen Samatail oh koulki koulen kaping ong mwareo me lingan.​—Mel. 73:28.