Ia Duwen Atail en Kangkakehlailihte Atail Poakohng Emenemen

1-2. (a) Dahme kahrehda wahnpoaron Pohl kak nda me limpoak iei irair me “keieu kesempwal”? (b) Peidek dah kan me kitail pahn koasoiapene?

AHNSOU me wahnpoaron Pohl koasoia duwen pwoson, koapworopwor, oh limpoak, e koasoia me “me keieu kesempwal rehrail iei limpoak.” (1 Kor. 13:13) Dahme kahrehda Pohl kak ndahki met? Ni ahnsou kohkohdo, kitail sohla pahn anahne pwoson sapwellimen Koht inou kan duwen sampah kapwo pwehki soahng pwukat me kitail kin koapworopworki pahn pweidahr. Ahpw kitail pahn kin ahnsou koaros anahne poakohng Siohwa oh aramas akan. Ni mehlel, atail poakohng irail pahn pousehlahte lalaudla.

² Pwehki kitail pahn kin ahnsou koaros anahne kasalehda limpoak, kitail pahn koasoiapene peidek siluh. Keieu, dahme kahrehda kitail anahne poakohng emenemen? Keriau, ia duwen atail en kasalehda atail poakohng emenemen? Kesiluh, ia duwen atail kak kangkakehlailihte atail poakohng emenemen?

DAHME KAHREHDA KITAIL ANAHNE POAKOHNG EMENEMEN?

3. Kahrepe dah kan me kitail ahneki pwehn poakohng emenemen?

³ Dahme kahrehda e kesempwal kitail en poakohng emenemen? Ehu kahrepe iei me limpoak kin wia kilelepen Kristian mehlel. Sises mahsanihong sapwellime wahnpoaron kan: “Koaros pahn esehki me kumwail nei tohnpadahk kan—ma kumwail kin limpoakpene nanpwungamwail.” (Sohn 13:35) Pil ehu, atail poakohng emenemen kin kahrehda kitail en miniminpene. Pohl nda me limpoak “kin kapatapene mehkoaros ni unsek.” (Kol. 3:14) Ahpw pil mie ehu kahrepe kesempwal me kitail en poakohng emenemen. Wahnpoaron Sohn ntingkilahng ienge Kristian ko: “Mehmen me kin poakohng Koht pil anahne poakohng rie.” (1 Sohn 4:21) Ni atail kin kasalehda atail poakohng emenemen, kitail kin kasalehda atail poakohng Koht.

4-5. Menlau karasahda ia duwen atail poakohng Koht eh pidada atail poakohng emenemen.

⁴ Ni ahl dah me atail poakohng Koht kin uhdahn pidada atail poakohng riatail Kristian kan? Pwehn karasahda, medewehla mwomwen mohngiongitail oh wasa teikan nan paliwaratail ar dokpene. Ni toahkte men eh doahke pulse ni kumwut en pehtail pwehn tehk ma e luwet de kehlail, e kak esehda ia iren atail mohngiong. Dahme kitail kak sukuhlkihsang ire mehlel wet?

⁵ Duwehte toahkte men eh kak esehda iren atail mohngiong sang ni eh tehk pulse ni kumwut en pehtail, kitail pil kak esehda uwen kehlail en atail poakohng Koht sang ni atail kasawih mwomwen atail poakohng meteikan. Ma kitail tehkada me atail poakohng riatail Kristian luhluwetala, met kak kasalehda me atail poakohng Koht pil luhluwetala. Ahpw ni atail kin kaukaule kasalehda atail poakohng riatail kan, kitail pahn ese me atail poakohng Koht kin kehlail.

6. Dahme kahrehda kitail anahne nsenohki ma atail poakohng riatail Kristian kan luhluwetala? (1 Sohn 4:​7-9, 11)

⁶ Kitail anahne nsenohki ma atail poakohng riatail kan luhluwetala. Pwekida? Pwehki met pahn wehwehki me atail nanpwungmwahu rehn Siohwa pil luhluwetala. Wahnpoaron Sohn kasalehda met ni sansal ni eh katamankihong kitail: “Ma e sohte kin poakohng rie me e kin kilang, ia duwen eh kak poakohng Koht me e sohte kin kilang?” (1 Sohn 4:20) Dahme kitail kak sukuhlkihsang met? Siohwa kin ketin kupwurperenkihte kitail ma kitail kin “poakohng emenemen.”—Wadek 1 Sohn 4:​7-9, 11.

IA DUWEN ATAIL EN KASALEHDA ATAIL POAKOHNG EMENEMEN?

7-8. Ia duwen atail kak kasalehda atail poakohng emenemen?

⁷ Mahsen en Koht kin pwurupwurehng kehkehlingkihong kitail en “poakohng emenemen.” (Sohn 15:​12, 17; Rom 13:8; 1 Des. 4:9; 1 Pit. 1:22; 1 Sohn 4:11) Ahpw limpoak iei pepehm ehu loalatail me sohte aramas emen kak kilang. Eri, ia duwen meteikan ar kak kilang me kitail kin poakohng irail? Sang ni atail lokaia oh wiewia kan.

⁸ Mie soangsoangen ahl akan me kitail kak kasalehiong riatail kan me kitail poakohng irail. Iet ekei karasepen met: “Lokaia mehlelpene nanpwungamwail.” (Sek. 8:16) “Kolokol popohl nanpwungamwail.” (Mark 9:50) “Tiengla mwowe ni amwail kin kasalehda wahu ong emenemen.” (Rom 12:10) “Kasamwo emenemen.” (Rom 15:7) “Pousehlahte . . . mahkpene.” (Kol. 3:13) “Pousehlahte sawaskipene amwail wisik toutou kan.” (Kal. 6:2) ‘Kumwail kansenamwahwih emenemen.’ (1 Des. 4:18) “Kumwail . . . kangkakehlailih emenemen.” (1 Des. 5:11) “Kapakapki emenemen.”—Seims 5:16.

9. Dahme kahrehda en kansenamwahwih meteikan wia ahl kesempwal ehu en kasalehda atail limpoak? (Pil kilang kilel.)

⁹ Kitail pahn koasoiapene ehu ahl me kitail en kasalehda atail poakohng riatail kan. Pohl kaweidki: ‘Kumwail kansenamwahwih emenemen.’ Dahme kahrehda en kansenamwahwih meteikan wia ahl kesempwal ehu en kasalehda me kitail poakohng irail? Nin duwen me ehu pwuhk kawehwehda, lepin mahsen me Pohl doadoahngki me kawehwehdi ong “kansenamwahwih” kin wehwehki “en kesihnen limwahn emen pwehn kangoange ih ni eh mihla nan kahpwal laud.” Eri, ni atail kin kansenamwahwih riatail men, kitail kin sewese en pousehlahte papah Siohwa ni lelepek. Oh ehuehu ahnsou me kitail kin wia met, kitail kin kasalehiong me kitail poakohng ih.—2 Kor. 7:​6, 7, 13.

10. Ia duwen poakehla emen oh kansenamwahwihala eh uhdahn dokpene?

¹⁰ En poakehla oh kansenamwahwih emen kin uhdahn dokpene. Ia duwen? Ni emen eh kin poakehla emen me lelohng lokolok, e kin men kansenamwahwihala aramaso oh wia mehkot pwehn sewese. Eri keieu, kitail kin poakehla, oh mwuhr kitail kin kansenamwahwih. Pohl kawehwehda me ni Siohwa eh kin ketin poakehla emen, met kamwakid Ih en ketin kansenamwahwihala. Pohl koasoia me Siohwa iei “Semen kupwurkalahngan oh Koht en kansenamwahu koaros.” (2 Kor. 1:3) Nan iretikitik wet, Pohl doadoahngki lepin lokaiao “kupwurkalahngan” pwehn kawehwehda pepehm en poakehla meteikan. Eri, Koht iei Semen, de Utupen, kupwurkalahngan pwehki eh kin uhdahn ketin poakehla aramas akan. Oh eh ketin poakeikitailla kin kamwakid ih en ketin kansenamwahwihala “kitail nan atail kahpwal koaros.” (2 Kor. 1:4) Duwehte pihl mwakelekel me kohda sang utuhnpihl ehu eh kin kansenamwahwihala irail kan me men nimpil, Siohwa kin ketin kansenamwahwihala irail kan me kin lelohng lokolok. Ia duwen atail kak kahlemengih Siohwa oh poakehla oh kansenamwahwihala meteikan? Ehu ahl en wia met iei sang ni atail kakairada nan mohngiongitail soangen irair kan me pahn sewese kitail en poakehla oh kansenamwahwih meteikan. Ia ekei irair pwukat?

11. Nin duwen me Kolose 3:12 oh 1 Piter 3:8 mahsanih, irair dah teikan me pahn sewese kitail en poakohng oh kansenamwahwihala meteikan?

¹¹ Dahme pahn sewese kitail en pousehlahte poakohng oh ‘kansenamwahwih emenemen’ rahn koaros? Kitail anahne kakairada soangen irair kan me duwehte ahneki limpoak en pirien, kadek, oh iang riatail kan nan arail lokolok. (Wadek Kolose 3:12; 1 Piter 3:8.) Ia duwen irair pwukat ar pahn sewese kitail? Ni atail kin poakehla riatail Kristian kan oh uhdahn nsenohkin irail, kitail pahn ahneki ineng laud en kansenamwahwih irail ni arail lelohng lokolok. Nin duwen me Sises mahsanih, “ewen aramas kin kapwadewei audepen eh mohngiong. Aramas mwahu kin kihda dahme mwahu sang soahng mwahu kan me e kin nekinekid.” (Mad. 12:​34, 35) En kansenamwahwih riatail kan me anahne sawas wia ahl ehu me uhdahn kesempwal pwehn kasalehda atail poakohng irail.

IA DUWEN ATAIL KAK KANGKAKEHLAILIHTE ATAIL POAKOHNG EMENEMEN?

12. (a) Dahme kahrehda kitail en kanahieng en dehr sohla poakohng emenemen? (b) Peidek dah kan me kitail pahn koasoiapene met?

¹² Kitail koaros men “pousehlahte limpoakpene.” (1 John 4:7) Ahpw e kesempwal en tamataman me Sises mahsanih me “limpoak en pali laud en aramas pahn loula.” (Mad. 24:12) Sises sohte mahmahsanih me pali laud en sapwellime tohnpadahk kan pahn uhdihsang arail kin limpoakpene. Ahpw kitail anahne kanahieng kitail en dehr mweidohng madamadau en aramas akan nin sampah me sohte kin limpoak en kamwakid mwomwen atail wiewia ong emenemen. Eri, kitail pahn koasoiapene peidek kesempwal wet: Dahme pahn sewese kitail en ese ma atail poakohng riatail kan kehlail?

13. Dahme kakete kasonge atail limpoak?

¹³ Ehu ahl en esehda uwen laud en atail limpoak iei sang ni atail tehk ia duwen atail kin mwekidki soangen irair kan en mour. (2 Kor. 8:8) Wahnpoaron Piter koasoia duwen ehu soangen irair pwukat: “Mwohn mehkoaros, kumwail en uhdahn limpoakpene, pwehki limpoak kin pwaindi dihp tohto.” (1 Pit. 4:8) Eri, luwet oh soh unsek en meteikan kak kasonge atail limpoak.

14. Nin duwen me 1 Piter 4:8 mahsanih, soangen limpoak dah me kitail anahne kasalehda? Menlau kihda ehu karasaras.

¹⁴ Kitail pahn tehkpene dahme Piter koasoia. Tepin iretikitik 8 koasoia me kitail en “uhdahn limpoakpene.” Lepin lokaia me Piter doadoahngki me kawehwehdi ong “uhdahn” kin wehwehki en “kadangpeseng.” Pali keriau en iretikitiko kawehwehda dahme kitail pahn wia ni atail kin uhdahn limpoakpene. Kitail pahn pwaindi dipen meteikan. Kitail kak karasahda met ni ahl wet: Medewehla pohn tehpel ehu me mie mwahi de ohla tohto ie. Ke kak ale lepin likou kis oh kadangpeseng pohn tehpelo pwehn pwaindi kaidehn ohla ehute de riau, ahpw ohla tohto. Ni ahlohte, ma kitail kin uhdahn poakohng riatail Kristian kan, kitail kak pwaindi, de mahkohng, diparail kan, kaidehn ehute de riau ahpw “dihp tohto.”

15. Ma atail poakohng riatail kan uhdahn kehlail, dahme kitail pahn kak wia? (Kolose 3:13)

¹⁵ Atail poakohng riatail kan anahne kehlail pwe kitail en kak mahkohng arail soh unsek kan—mehnda ma met uhdahn apwal. (Wadek Kolose 3:13.) Ni atail kin mahkohng meteikan, kitail kin kasalehda me atail limpoak kin kehlail oh kitail men kaperenda Siohwa. Dahme pil kak sewese kitail en mahkohng sapwung en meteikan oh dehr mwadang en lingeringerda pahrail?

16-17. Dahme pil pahn sewese kitail en pohnsehsehla en meteikan ar sapwung tikitik kan? Menlau kihda ehu karasaras. (Pil kilang kilel.)

¹⁶ Medemedewehte irair mwahu kan en riatail kan, a kaidehn arail sapwung kan. Medewehla karasaras wet. Medewehla ke iang riomw Kristian kan kohpene mwemweit. Ke perenki ahnsowo oh ni amwail pahn kohkohpeseng, ke men kilelekumwaildi. Ke pil wiahda kilel riau pwe me ke tepin kilelehdio kakete sohte mwahu. Met mie noumw kilel siluh. Ahpw nan ehu kilel ko, ke tehkada me emen brother sohte sirei. Dahme ke pahn wiahiong kilelo? Ke pahn delete sang nan kilel ko pwehki nan kilel riau tehi ko, koaros sirei, pil iangahki brothero.

¹⁷ Kitail kak kapahrekihpene kilel ko me kitail nekidala ong ahnsou kan me kitail men wiahki mehn kataman. Kitail kin kalapw taman ahnsou mwahu kan me kitail iang riatail Kristian kan. Ahpw ia duwen ma ehu ahnsou ko, emen riatail nda de wia mehkot me sohte kadek? Dahme kitail pahn wia? Kitail sou pahn song en manokehla soangen ahnsowo duwehte atail delete kilel suwedo? (Lep. Pad. 19:11; Ep. 4:32) Kitail kak manokehla ahn riatail men sapwung tikitik pwehki kitail kin tamataman ahnsou mwahu tohto me kitail kin iangih. Ih soangen mehn kataman me kitail men nekidala oh kesempwalki.

DAHME KAHREHDA LIMPOAK UHDAHN ANAHN RAHNWET

18. Ire kesempwal dah kan duwen limpoak me kitail koasoiapene nan iren onop wet?

¹⁸ Dahme kahrehda kitail men kangkakehlailihte atail poakohng emenemen? Ni duwen me kitail koasoiapenehr, ni atail kin kasalehda atail poakohng riatail kan, kitail kin kasalehda atail poakohng Siohwa. Ia duwen atail en kasalehda atail poakohng riatail kan? Ehu ahl en wia met iei sang ni atail kin kansenamwahwihirailla. Kitail pahn kak ‘kansenamwahwih emenemen’ ma kitail kin poakeirailla. Ia duwen atail kak kangkakehlailihte atail poakohng emenemen? Sang ni atail kin wia uwen atail kak en mahkohng ahn meteikan ar sapwung.

19. Dahme kahrehda e uhdahn kesempwal en kasalehda atail poakohng emenemen rahnwet?

¹⁹ Dahme kahrehda e uhdahn kesempwal en kasalehda atail poakohng emenemen rahnwet? Tehk kahrepeo me Piter kihda: “Imwin mehkoaros kerendohr. Kahrehda, . . . kumwail en uhdahn limpoakpene.” (1 Pit. 4:​7, 8) Ni imwin sampah suwed wet eh kerendohr, dahme kitail kak kasik? Sises ketin kohpada duwen sapwellime tohnpadahk kan: “Wehi koaros pahn kailongkin kumwail pwehki mwarei.” (Mad. 24:9) Pwehn dadaur pahn kailok wet, kitail anahne kolokol atail miniminpene. Ni atail kin poakohng riatail kan, Sehdan sohte pahn kak katohrekitailpeseng pwehki limpoak “kin kapatapene mehkoaros ni unsek.”—Kol. 3:14; Pil. 2:​1, 2.