Koasoipen Riatail kan

Poakehla Soangen Aramas Koaros

Ehu rahno riatail sister men sang New Zealand kilang kisin kasdou “Have . . . Concern for One Another,” me koasoia duwen Siohwa eh sohte kin ketin poakehlahte aramas ahpw pil kin ketin kasalehda. (Ais. 63:​7-9) Sistero eri koasoanehdi en kapwaiada dahme e sukuhlki oh rapahki ahl akan en sewese aramas. Rahnohte ni eh wie netinet, e tuhwong lih emen me sohte imwe oh idek ma e kak pwainohng kene mwenge. Liho pwungki. Ni sistero eh pwurala wa mwenge ko, e kalohk ong liho ni mwotomwot doadoahngki kisin doaropweo Lokolok Pahn Imwisekla?

Liho tepida sengiseng. E koasoiahda me e tikida wia Sounkadehde men ahpw e kohkohsang padahk mehlel sounpar tohto samwalahro. Ahpw me keren, e kin kapakap ong Siohwa pwehn ketin sewese ih en pwurala reh. Sistero kihong liho Paipel ehu oh wiahda koasoandi en onop reh.a

Duwehte Siohwa, kitail kak kasalehda atail poakehla aramas akan, iangahki kisehtail kan oh pil riatail Kristian kan nan mwomwohdiso. Kitail pil kak kasalehda atail poakehla meteikan sang ni atail ehukihong irail duwen Siohwa.