Kasalehda Kadek ong “Soangen Aramas Koaros”
NI AHNSOU me Sises ketin padahkihong sapwellime tohnpadahk kan ia duwen arail en kalohki rongamwahwo, e ketin katamankihong irail me aramas akan sohte pahn ahnsou koaros men rong. (Luk 10:3, 5, 6) Met pil mehlel nan atail doadoahk en kalohk. Ekei me kitail tuhwong ele kin lemeiong kitail. Oh ni arail kin wia met, ele e pahn apwal kitail en kadekohng oh men kalohk ong irail.
Aramas kadek men kin kilang anahn oh kahpwal en meteikan, poakehla irail, oh men sewese irail. Ahpw dahme pahn wiawi ma kitail sohla kin kadek ong aramas akan me kitail tuhwong nan kalohk? E pahn sohla atail ngoang, me iei, kitail pahn sohla ngoangki kalohk ong irail, oh kitail sohte pahn kak sewese irail. Kitail kak kapahrekihong atail ngoang ong kisiniei. Pwe kisiniei en kin lullul, kitail anahne kihkihong tuwi. Pil duwehte, pwe atail ngoang en kehlail, kitail anahne kadek!—1 Des. 5:19.
Ia duwen atail kak sukuhlki en kalaudehla atail kadek, pil ni ahnsou me apwal? Kitail pahn koasoiapene mehn kahlemeng siluh me kitail kak alasang—mehn kahlemeng en Siohwa, Sises, oh wahnpoaron Pohl.
ALASANG SAPWELLIMEN SIOHWA KADEK
Erein sounpar kidkid kei, aramas akan kin nda soahng likamw kan duwen Siohwa. Ahpw e kin ketin “kadek ong irail me soh kalahngan oh suwed.” (Luk 6:35) Ia duwen eh kin ketin kasalehda sapwellime kadek? E kin ketin kanengamahiong koaros. Siohwa ketin kupwurki “soangen aramas koaros” en komourla. (1 Tim. 2:3, 4) Mehnda ma Koht ketin kalahdeki me suwed, e uhdahn ketin kesempwalki aramas akan oh e sohte kupwurki ren mehla.—2 Pit. 3:9.
Siohwa ketin mwahngih me Sehdan uhdahn mai en kahrehiong aramas akan en kamehlele soahng likamw kan. (2 Kor. 4:3, 4) Me tohto kin sukuhlki duwen soahng likamw kan duwen Koht sangete arail tikitik. Eri mwomwen arail madamadau oh pepehm kak kahrehiong irail en apwalki esehla padahk mehlel. Ahpw Siohwa uhdahn ketin kupwurki sewese irail. Ia duwen atail ese met?
Karasepe, ia sapwellimen Siohwa pepehm ong aramas akan nan kahnimw en Ninipe? Mendahki re kin wia tiahk lemei, Siohwa ketin mahsanihong Sona: “Ia uwen ei sohte pahn poakehla tohn kahnimw wet Ninipe, kahnimw kalaimwun wet me seri soh dipe kei me tohtohsang 120,000 mi loale, oh pil mahn tohtohie?” (Sona 4:11) Siohwa ketin poakehla aramas ako me sohte ese dahme mehlel duwen ih. Eri e ketin poaronehla Sona en padahkihong irail duwen sapwellime kehkehlik.
Kitail pil ahneki soangen pepehmohte me Siohwa sapwellimanki ong aramas akan. Re kesempwal. Duwehte Siohwa, kitail kin men sewese irail en sukuhlki duwen ih mehnda ma e mwomwen me re sohte pahn men esehla padahk mehlel.
ALASANG SAPWELLIMEN SISES KADEK
Duwehte Semeo, Sises kin ketin poakehla aramas akan “pwehki irail wiakaula oh sohte epwelparail rasehng sihpw kan me sohte sileparail.” (Mad. 9:36) Sises ketin mwahngih dahme kahrehda re mi nan irair wet. Met pwehki arail kaunen pelien lamalam kan kin wia kauwe irail oh padahkihong irail soahng likamw kan. Oh mendahki Sises ketin mwahngih me me tohto me kohdo rong ih sohte pahn wiahla sapwellime tohnpadahk pwehki soangsoangen kahrepe kan, e kin ketin doulahte padahkihong irail soahng tohto.—Mark 4:1-9.
Dehr mworusala ni emen eh tepte sohte rong kitail
Ni irair kan ar wekila nan mour, ahn aramas akan ar madamadau ong padahk mehlel ele pil kin wekila
Ni ahnsou me aramas akan sohte men rong duwen dahme kitail padahngki, kitail anahne song en wehwehki dahme kahrehda re wiahki met. Mwein mie arail madamadau sapwung ong Paipel de Kristian kan pwehki re kilang ekei me kose me re Kristian kei kin wia soahng suwed kan. Meteikan ele kin rong duwen soahng likamw kan duwen dahme kitail kin kamehlele. Ekei ele kin masak me arail peneinei de tohn arail wasa pahn kauwe irail ma re koasoiong kitail.
Ekei me kitail kin tuhwong ele lelohng irair suwed kan me uhdahn kamedekihala irail. Misineri men me adaneki Kim nda me aramas tohto nan eh wasahn kalohk lelohng mahwen oh pitila, oh soahng koaros me re ahneki sohrala. Solahr arail koapworopwor ong ahnsou kohkohdo. Re kin lingeringer oh sohte likih aramas. Aramas akan nan wasahn kalohk wet kin kalapw song en kauhdi Sounkadehde kan sang arail kalokalohk. Ehu pak, mie me pil lemeiong Kim ni ahnsou me e wie kalokalohk.
Ia duwen Kim eh doulahte kadek, pil ni aramas akan ar lemeiong ih? E kin ahnsou koaros song en tamataman iren Paipelo Lepin Padahk 19:11, me mahsanih: “Ma ke me loalokong, ke pahn kak kanengamahiong omw lingeringer.” Ni eh kin medewehla duwen dahme aramas akan nan eh wasahn kalohk lelohng, met kin sewese ih en poakehla irail. Oh kaidehn koaros me e tuhwong kin lemei. Nan wasahn kalohk ohte, mie ekei me mwahu me e kin pwuralahng.
Kitail kak pein idek rehtail: ‘Ma I sohte ese duwen padahk mehlel, dahme I pahn wia ma Sounkadehdehn Siohwa kan kohdo kalohk ong ie?’ Karasepe, ia duwen ma kitail rong duwen soangen likamw tohto duwen Sounkadehde kan? Mwein kitail pil pahn sohte men rong irail oh re pahn anahne kadek ong kitail. Sises mahsanih me kitail anahne wiahiong aramas dahme kitail men irail en wiahiong kitail. Eri kitail anahne song en wehwehki pepehm en meteikan oh kanengamahiong irail, mendahki ma met apwal.—Mad. 7:12.
ALASANG EN POHL KADEK
Wahnpoaron Pohl pil kasalehda kadek ong aramas akan me wia tiahk lemei ong ih ni eh kalohk ong irail. Dahme kahrehda? Pwehki e tamataman mwomwen ih mahso. E nda: “Mahso ngehi sounlahlahwe, sounkalokolok oh aramas pohnmwahso men. Ahpw e ketin kasalehiong ie kadek kalahngan pwehki ei sohte ese mehkot oh seupwoson.” (1 Tim. 1:13) Pohl ese me Siohwa oh Sises ketin kasalehiong ih kadek kalahngan. E kak wehwehki aramas ako me men kauhdi eh kalohk, pwehki e ahneki soangen pepehmohte mahs.
Ekei pak, Pohl tuhwong aramas akan me kin uhdahn kamehlele padahk likamw kan. Ia eh pepehm ong met? Nan Wiewia 17:16, kitail wadek me erein Pohl eh mi nan Adens, e “lingeringerkihda eh kilangada diren dikedik nan kahnimwo.” Ahpw, Pohl doadoahngki irairo pwehn padahkih aramas ako. (Wiewia 17:22, 23) E wekidala wiepen eh kalohk, oh e koasoiong soangsoangen aramas akan ni ahl me pahrekiong arail irairo ‘pwe en doarehla ekei ni uwen eh kak koaros.’—1 Kor. 9:20-23.
Ni atail kalohk ong irail kan me sohte men rong de arail madamadau ong dahme re kamehlele sapwung, kitail kak wia dahme Pohl wia. Kitail kak doadoahngki dahme kitail ese duwen irail pwehn sewese irail en esehla duwen “rongamwahu en popohl!” (Ais. 52:7) Sister men me adaneki Dorothy nda: “Nan at wasahn kalohk, me tohto sukuhlki me Koht kin ketin lemei oh kin kadeiki aramas. I kin kapinga irail pwehki arail uhdahn kamehlele Koht, oh uhd sewese irail en tehk dahme Paipel mahsanih duwen sapwellimen Siohwa irair en limpoak oh sapwellime inou kan ong ahnsou kohkohdo.”
“KALOWEHKIHDI ME SUWED ME MWAHU”
Ni atail karanihala ni imwio, kitail kak kasik me wiewiahn aramas akan pahn “doulahte sang ni me suwed ong ni me suwedsang.” (2 Tim. 3:1, 13) Ahpw kitail en dehr sohla kadek de peren pwehki dahme re wia. Siohwa kak ketikihong kitail kehl pwehn “ahnsou koaros kalowehkihdi me suwed me mwahu.” (Rom 12:21) Pioneer men me adaneki Jessica nda me e kin kalapw tuhwong aramas akan me kin pohnmwahso oh kin kauwe Sounkadehde kan oh pil arail padahk kan. E nda: “Met kin kak kalingeringerihada emen. Ni ei kin tepida koasoiong emen, I kin kapakap ong Siohwa oh peki en ketin sewese ien kilangwohng aramaso duwehte me e kin ketin kilangwohng.” Met kin sewese Jessica en dehr medemedewehte pein eh pepehm kan ahpw en medewe ia duwen eh kak sewese aramaso.
Kitail kin kaukaule rapahki irail kan me men esehla duwen padahk mehlel
Kedekedeo, ekei aramas pahn men ale atail sawas oh sukuhlki duwen padahk mehlel
Kitail en pil song en kangoange riatail Kristian kan ni ahnsou me kitail iang irail kalohk. Jessica nda me ni eh kin iang meteikan kalohk oh emen irail lelohng irair suwed ehu, e kin song en dehr medemedewehte irairo. Ahpw, e kin koasoia duwen mehkot mwahu, duwehte imwila mwahu kan me atail kalohk kin wia mehnda ma ekei sohte men rong.
Siohwa uhdahn ketin mwahngih me ekei pak e kin apwal ong kitail en kalohk. Ahpw e uhdahn kupwurperenki ni atail kin alasang sapwellime kadek kalahngan! (Luk 6:36) Ei mehlel, Siohwa sohte pahn ketin poakehla oh kanengamahiong aramas akan nin sampah wet kohkohlahte. Kitail kak kamehlele me e uhdahn ketin mwahngih iahd me e pahn ketin kasohrala koasoandi en sampah wet. Lao lel ahnsowo, atail doadoahk en kalohk uhdahn karuwaru. (2 Tim. 4:2) Eri kitail en pousehlahte kalohk ni ngoang oh kasalehda kadek mehlel ong “soangen aramas koaros.”