Kitail en Poakehla Aramas akan
1. Dahme aramas akan rahnwet kin uhdahn anahne?
1 Laudsang mahs, aramas tohto nan atail ahnsou kin uhdahn anahne meteikan en poakeirailla oh sewese irail. Irair en sampah wet kin susuwedla oh kin kahrehda aramas tohto en nsensuwed oh sohla arail koapworopwor. Aramas tohto anahne sawas, oh kitail Kristian kan kak kasalehda me kitail uhdahn nsenohki mehn mpatail kan. (Mad. 22:39; Kal. 6:10) Ia duwen atail kak wia met?
2. Ia ahl me keieu mwahu kitail en kasalehda atail poakehla aramas?
2 Doadoahk Ehu me Kin Kasalehda Nsenoh: Koht kelehpw me ketin wia utupen sawas mehlel oh poatopoat. (2 Kor. 1:3, 4) Pwehki Siohwa kin ketin poakehla aramas, e kin ketin kangoange kitail en “kadekpene” de poakehla aramas, oh e ketikihong kitail pwukoa en ehukihong mehn mpatail kan duwen rongamwahu en sapwellime Wehi. (1 Pit. 3:8) Atail kin wia uwen atail kak nan doadoahk wet kin wia ahl me keieu mwahu en kamweitala irail kan me “nan kapehd toutoulahr,” pwehki Wehin Koht ieite koapworopwor ong tohnsampah me kin lokolok. (Ais. 61:1) Pwehki e kin ketin poakehla sapwellime aramas akan, kereniong Siohwa pahn ketin kamwakelehsang me suwed kan oh ketin wiahda sampah kapw oh pwung ehu.—2 Pit. 3:13.
3. Ia duwen atail kak alasang Sises eh kin ketin kilangwohng aramas?
3 Kilangwohng Aramas Duwehte Sises Eh Kin Ketin Wia: Ni Sises eh kin ketin kalohk ong pokon kan, e sohte kin ketin kilangwohngete aramas ko nin duwen pwihn ehu. E kin ketin tehk emenemen irail me kin anahne sawas pwe ren ahneki nanpwungmwahu rehn Koht. Re kin rasehng sihpw kan me sohte sileparail. Dahme Sises kin ketin kilang kin kamwakid kupwure oh kin kahrehiong en ketin padahki irail ni kanengamah. (Mark 6:34) Atail kin kilangwohng aramas akan duwehte Sises eh kin ketin wia pahn kamwakid kitail en uhdahn poakehla emenemen irail. Met pahn sansalda ni mwomwen atail koasoi oh pil mwomwen masatail. Doadoahk en kalohk me kitail pahn keieu kesempwalki oh kitail pahn doadoahngki soangen lokaia me konehng irair en emenemen.—1 Kor. 9:19-23.
4. Ia kahrepen kitail en poakehla aramas akan?
4 Aramas tohto sang wehi koaros kin mwekidki rongamwahu en Wehio oh pil nsenoh me kitail kin kasalehiong irail. Ni atail kin pousehlahte poakehla aramas akan, kitail pahn kawauwih oh kaperenda Siohwa Koht me kin ketin poakehla aramas.—Kol. 3:12.