Atail Doadoahk en Kalohk—Doadoahk en Limpoak Ieu
1 Sises kilangada me irail me tohtohie me rongorong ah mahsen kan “rasehng sihpw kei me sohte silepahr.” (Madiu 9:36) Sises kin doadoahngki kadek oh limpoak ni e kin padahkihong irail elen Siohwa kan, me wahdo nsenamwahu, oh ni elen limpoak kaitarala arail anahn en pali ngehn akan. Ni atail kin doudouloale duwen elen Sises kan, kitail pil kin sukuhliki en ahneki soangen madamadau oh pepehm me duwehte Sises, oh soangen irair en limpoak wet kin sansalda nan atail doadoahk en kalohk.
2 Nna, song medemedewe mahs ahnsoukis duwen dahme Sises wia ni ahnsou me aramas ako me anahne laud sawas pwarala reh. (Luk 5:12, 13; 8:43-48) E kin ketin nsenohki irail akan me ahneki irair en anahn tohrohr kan. (Mark 7:31-35) E kin ketin tetehk duwen pepehm en meteikan oh kasalehda nsenoh laud. E kin ketin kilang loalen aramas akan ah kaidehn maslikin aramas akan. (Luk 7:36-40) Ehi, Sises kin ketin kasalehda duwen limpoak en atail Koht.
3 “Mwekidki Pepehm en Poakehla”: Sises sohte wia doadoahk en kalohk pwehki ih ah pwukoah. E “mwekidki ah kin ketin poakehla” aramas akan. (Mark 6:34) Duwehte rahnwet, kitail sohte kin ihte wahseli Rongamwahuo ahpw kitail kin nantihong kamourala mour kesempwal en aramas akan. Nantihong wehwehkihla dahme kahrehda aramas akan kin wiahki soangen mwekid kan me re kin wia. Dahme kahrehda irail kin pwunod? Irail sounapwalih kan en kaudok likamw kin pitihiraildi de solahr tehk irail? Atail nsenohki mehlel meteikan kak sewese irail en men rong Rongamwahu en Wehio.—2 Korint 6:4, 6.
4 Limpoak kin sair mohngiong kan. Karasepe: Emen lih kin wia nsensuwedki mehlahn nah serepein me mahki sounpwong siluh. Ni ahnsou me Sounkadehde riemen kalohkla ni imweo, e luhke irail en pidelong pwe e men akupwungkihong irail dahme kahrehda Koht kin mweidohng lokolok en wiawi. Ahpw, mwuhr lih menet koasoia: “Re rongorong kanahieng dahme I koasoia ni elen limpoak, oh ni ahnsou me re pahn mweseldahro, I inenen nsenamwahula me kahrehiong ahi pwungkihda ren pil pwurehng pwurodo.” Ke kin nantihong kasalehda limpoak ohng koaros me ke tuhwong nan kalohk?
5 Kakairada limpoak pahn sewese kitail en ehukihong meteikan mehn kakehl oh kaloalamwahu kan. Ni atail kin wia met, kitail kin kalinganahla “Samatail me limpoak,” Siohwa.—2 Korint 1:3.