Ke Kin Tetehk Mwahu Kaweid kan?

1. Kadeik dahieu me pahn kereniong wiawi?

KITAIL kin momour erein ahnsou ehu me wekidekla laud kan kin wiawi! Ahnsou keren, Sises pahn ketin kadeikada aramas koaros nin sampah. Sises ketin padahkihong kitail me kadeik wet kerendohr. E ketikihong sapwellime tohnpadahk kan “kilel” ehu duwen eh ketier oh duwen “imwin koasoandi en mwehi wet.” (Mad. 24:3) Kokohp wet kileldi nan Madiu irelaud 24 oh 25, oh nan Mark irelaud 13 oh Luk irelaud 21.

2. Dahme kitail pahn koasoiapene nan iren onop wet, oh dahme kahrehda met pahn sewese kitail?

² Sises ketin doadoahngki karasaras siluh pwehn sewese kaunopkitailda. Karasaras pwukat kin duwehte kaweid kei ong kitail. Karasaras pwukat iei me pid sihpw oh kuht kan, meipwon loalokong oh loalopwon ko, oh duwen dalend kan. Ehuehu karasaras ko kin sewese kitail en wehwehki me Sises pahn ketin kadeikada aramas emen sang ni eh wiewia kan. Nan iren onop wet, kitail pahn koasoiapene karasaras pwukat oh kilang dahme kitail kak sukuhlkihsang. Keieu en karasaras me kitail pahn koasoiapene iei me pid duwen sihpw oh kuht kan.

SIHPW OH KUHT KO

3. Iahd me Sises pahn ketin kadeikada aramas akan?

³ Nan karasaras en sihpw oh kuht ko, Sises mahsanih me e pahn ketin kadeikada aramas akan sang ni mwomwen arail kin mwekidki rongamwahwo oh ma irail kin utung rie me keidi kan. (Mad. 25:​31-46) Erein ‘kahn kamakam kowahlapo,’ e pahn ketin kadeikada ma irail sihpw kei de kuht kei mwohnte Armakedon. (Mad. 24:21) Duwehte sounsilepen sihpw men eh kin katohrepeseng sihpw oh kuht kan, Sises pahn ketin katohrepeseng irail kan me kin loalopwoat utung rie me keidi kan oh irail kan me sohte kin.

4. Nin duwen me Aiseia 11:​3, 4 mahsanih, dahme kahrehda kitail kak kamehlele me Sises pahn ketin kadeikada aramas akan ni pwung? (Pil kilang kilel ni Kahn Iroir wet.)

⁴ Paipel kohpada me nin duwen Sounkopwung me Siohwa ketin idihada, Sises pahn kin ahnsou koaros kadeikada aramas akan ni pwung. (Wadek Aiseia 11:​3, 4.) E kin ketin kasawih wiewia oh madamadau en aramas, oh dahme irail kin koasoia, iangahki arail wiewia ong me keidi kan. (Mad. 12:​36, 37; 25:40) Sises pahn mwahngih ihs me kin utung rie me keidi kan oh arail doadoahk.a Ehu ahl me keieu kesempwal me emen kak utung rien Krais kan iei sang ni eh kin sewese irail nan doadoahk en kalohk. Sises pahn ketin kadeikirailda nin duwen aramas “pwung” kei oh re pahn ahneki “mour soutuk” nin sampah. (Mad. 25:46; Kaud. 7:​16, 17) Ia uwen met eh wia keting kaselel ehu ong irail kan me kin lelepekte! Sang arail kin lelepekte erein kahn kamakam kowahlapo oh mwuri, adarail kan pahn mihmihte nan “pwuhken mour.”—Kaud. 20:15.

5. Dahme kitail kak sukuhlkihsang karasaras en sihpw oh kuht ko, oh ihs me kak paiekihda?

⁵ Kasalehda me ke kin lelepek oh loalopwoat. Sapwellimen Sises karasaras en sihpw oh kuht ko kin keieu dokedoke irail kan me ahneki koapworopwor en mour nin sampah. Irail kin kasalehda arail pwoson sang ni arail kin sewese rien Krais kan nan doadoahk en kalohk oh idawehn ni loalopwoat kaweid kan sang ladu lelepek oh loalokongo me Sises ketin idihada. (Mad. 24:45) Ahpw irail kan me ahneki koapworopwor en mi nanleng pil anahne tehk mwahu kaweido nan karasaraso. Dahme kahrehda? Pwehki Sises kin ketin tetehk duwen arail wiewia, madamadau, oh dahme re kin koasoia. Irail pil anahne kasalehda me irail kin lelepek. Ni mehlel, Sises pil ketikihda karasaras riau me audaudki kaweid kei ongete me keidi kan. Kitail pil kin kilang karasaras riau pwukat nan Madiu irelaud 25. Met kitail pahn koasoiapene karasaras en meipwon loalokong oh loalopwon ko.

MEIPWON LOALOKONG OH LOALOPWON KO

6. Ia duwen meipwon limmeno kasalehda me irail loalokong? (Madiu 25:​6-10)

⁶ Nan karasaras en meipwon ko, Sises mahsanih duwen meipwon ehk me kohieila pwehn tuhwong ohl kamwohd men. (Mad. 25:​1-4) Irail koaros kasikasik en iang ohl kamwohdo kohla ni eh kamadipw en kapwopwoudo. Sises mahsanih me meh limmen rehrail “loalokong” ah meh limmen teiko “loalopwon.” Meipwon loalokong ko kaunopada oh kin tetehk mwahu. Irail onopada en awih ohl kamwohdo sohte lipilipil ia uwen werei, mehnda ma e pwarodo ni lukepen pwong. Eri, re wahda neirail lamp kan pwehn kamarainih irail. Re pil wahda ekis leh nan pwoatol pwe ohl kamwohdo de pwand en leledo. Irail kaunopada mwahu pwe neirail lamp ko en wie lullulte. (Wadek Madiu 25:​6-10.) Ni ahnsou me ohl kamwohdo leledo, meipwon loalokong ko iangih pedolongala ni kamadipw en kapwopwoudo. Duwehte met, Kristian keidi kan me kasalehda me re onopada sang ni arail kin tetehk mwahu oh lelepek lao ketidohn Krais pahn ale ketingparail en iang Ohl Kamwohdo, Sises, nan sapwellime Wehin nanleng.b (Kaud. 7:​1-3) A dahme wiawihong meipwon limmen loalopwon ko?

7. Dahme wiawihong meipwon loalopwon limmen ko, oh dahme kahrehda?

⁷ Weksang meipwon loalokong ko, meipwon loalopwon limmen ko sohte kaunopada ni ahnsou me ohl kamwohdo leledo. Neirail lamp ko kereniong kunla, oh re pil sohte wahda leh. Ni arail esehda me ohl kamwohdo pahn kereniong leledo, re kohieila pwehn pwainda leh. Ni ohl kamwohdo eh leledo, re saikinte pwurodo. Ni ahnsowo, “meipwon ko me onopadahr iangih pedolong nan kamadipw en kapwopwoudo oh wenihmwo ahpw ritidi.” (Mad. 25:10) Mwuhr ni meipwon loalopwon ko ar pwurodo oh men pedolongala, ohl kamwohdo ndaiong irail: “I sehsei kumwail.” (Mad. 25:​11, 12) Meipwon ko sohte onopada en awih ohl kamwohdo sohte lipilipil ia uwen werei. Dahme me keidi kan sukuhlkihsang met?

8-9. Dahme me keidi kan kak sukuhlkihsang karasaras en meipwon ko? (Pil kilang kilel.)

⁸ Kasalehda me ke kin kaunopada oh tetehk mwahu. Sises sohte ketin kohpada me e pahn mie pwihn riau en me keidi kan—ehu pwihn me onopada en awih lao lel imwiseklahn koasoandi en mwehi wet ah ehu pwihn soh. Ahpw e ketin kawehwehda dahme pahn wiawihong me keidi kan ma irail sohte kaunopada en dadaur ni lelepek lao lel ni imwi. Ma irail sohte kaunopada, irail sohte pahn alehdi ketingparail. (Sohn 14:​3, 4) Met uhdahn kesempwal! Sohte lipilipil ma atail koapworopwor iei en mi nanleng de nin sampah, kitail koaros anahne tehk mwahu kaweid kan me kohsang karasaras en meipwon ko. Emenemen kitail anahne mwasamwasahn oh kaunopada, onopada en dadaur lel ni imwi.—Mad. 24:13.

⁹ Mwurin Sises eh mahsanih duwen karasaras en meipwon ko pwehn kasalehda anahnepen en kin kaunopada oh tetehk mwahu, e uhd mahsanih duwen karasaras en dalend ko. Karasaras wet kasalehda kesempwalpen en kin pwerisek.

DALEND KO

10. Ia duwen ladu riemen ara kasalehda me ira lelepek? (Madiu 25:​19-23)

¹⁰ Nan karasaras en dalend ko, Sises mahsanih duwen ladu riemen me kin lelepek ong ara soumaso oh emen me sohte kin. (Mad. 25:​14-18) Ladu riemeno kasalehda me ira kin lelepek sang ni ara kin doadoahk laud pwehn kalaudehla nein ara soumaso mwohni. Mwohn soumaso eh seiloakla sahpw liki, e kihong ira dalend kei—uwen mwohni laud ehu. Ladu lelepek riemeno uhdahn pwerisek oh doadoahngki mwohnio ni loalokong. Ia imwilahn met? Ni ahnsou me soumaso pwurodo, ira koadoahkihadahr mwohnio pak riau laudsang me e kihong ira. Soumaso kapinga ira—ira ‘iang ara soumaso peren.’ (Wadek Madiu 25:​19-23.) A dahme wiawihong ladu kesilimeno? Dahme e wiahiong mwohni me eh soumaso kihong ih?

11. Dahme wiawihong ladu ‘pohnkahkeo,’ oh dahme kahrehda?

¹¹ Ladu kesilimeno ale dalend ehu ahpw e “pohnkahke.” Eh soumaso kasik me e pahn doadoahngki mwohnio ni loalokong. Ahpw laduwo sarepedi mwohnio nanpwel. Ni soumaso eh pwurodo, laduwo kapwurehiong dalendohte. Ahn laduwo madamadau pil sohte mwahu. E sohte pekimahngki eh sohte kalaudehla nein eh soumaso mwohni, ahpw e nda me eh soumaso “ohl limeidihd men.” Soumaso sohte kapinga ladu menet. Laudsang met, e ruwese nah ladu ko ren kihsang dalendo oh kesehieila laduwo liki.—Mad. 25:​24, 26-30.

12. Ihs me ladu lelepek riemeno kin karasaraskihong rahnwet?

¹² Ladu lelepek riemeno kin karasaraskihong Kristian keidi lelepek kan. Soumaso, Sises, ketin luke irail en “iang [arail] soumas peren.” Irail ale ketingparail nanleng, me iei kaiasada keieu. (Mad. 25:​21, 23; Kaud. 20:5b) Ahpw, mehn kahlemeng suwed en ladu pohnkahkeho kin wia mehn kataman ehu ong me keidi kan. Ia duwen?

13-14. Dahme me keidi kan sukuhlki sang karasaras en dalend ko? (Pil kilang kilel.)

¹³ Kasalehda me ke kin pwerisek. Duwehte nan karasaras en meipwon ko oh dalend ko, Sises sohte ketin kohpada me irail me keidi kan pahn kin pohnkahke. Ahpw, e ketin kawehwehda dahme pahn wiawi ma irail sohla ahneki ngoang. Arail “malipilip oh pilipil” sohla pahn pweiong irail, oh re sohte pahn ale mweimwei en pedolong nan Wehin nanleng.—2 Pit. 1:10.

¹⁴ Sapwellimen Sises karasaras en meipwon ko oh dalend ko kasalehda ni sansal me Kristian keidi kan koaros anahne kin kaunopada oh tetehk mwahu, oh pil kin pwerisek. Ahpw ia duwe, pil mie mehkot me Sises mahsanih me pahn wia mehn kataman ong me keidi kan? Ei, mie! Mahsen en Sises ko nan Madiu 24:​40, 41 pil dokedoke kaimwiseklahn kadeik ong me keidi kan.

IHS ME PAHN “WISIKSANG”?

15-16. Ia duwen Madiu 24:​40, 41 eh sewese me keidi kan ren kilang me re anahne pousehlahte mwasamwasahn?

¹⁵ Mwohn eh mahsanih duwen karasaras siluh ko, Sises ketin kawehwehda kaimwiseklahn kadeik ong me keidi kan me pahn kasalehda ma e kupwurkin irail. E mahsanih duwen ohl riemen me wie doadoahk nan mwaht ehu oh lih riemen me ngidar pilawa. Ohl ako mwomwen wiewia doadoahk teieu, pil duwehte lih ako, ahpw Sises mahsanih me emen pahn “wisiksang a meteio pahn lekdekla.” (Wadek Madiu 24:​40, 41.) Ih eri ketin kangoange sapwellime tohnpadahk ko: “Kumwail eri pousehlahte mwasamwasahn pwe kumwail sehse mehnia rahn me amwail Kauno pahn ketido.” (Madiu 24:42) Sises pil mahsanih soahng ehu me duwehte met mwurin eh mahsanih duwen karasaras en meipwon ko. (Mad. 25:13) Ia duwe, mahsen pwukat dokpene? Ei. Me keidi lelepek kante me pahn “wisiksang,” de irailte me Sises pahn ketin kasamwolong nan Wehin nanleng.—Sohn 14:3.

¹⁶ Kasalehda me ke kin mwasamwasahn. Me keidi men me sohte kin mwasamwasahn sohte pahn iang “me pilipildahr” kan. (Mad. 24:31) Oh koaros me ahneki koapworopwor en mour kohkohlahte nin sampah pil anahne pousehlahte mwasamwasahn oh lelepekte.

17. Dahme kahrehda kitail en dehr pwunodki iahd me Siohwa kin ketin keiekihdi ekei sapwellime manaman?

¹⁷ Kitail eselahr mwahu duwen Siohwa, eri kitail likih me soahng koaros me e kin ketin wia kin pwung. Kitail sohte kin pwunodki ma Siohwa ketin pilada en keiehdi ekei me lelepek kan nan atail ahnsou.c Kitail tamanda dahme Sises mahsanihki duwen tohndoadoahk kan me doadoahk sang awa kaeisek ehu nan sapwellime karasaras en mwahto. (Mad. 20:​1-16) Irail kan me kodohng doadoahk nan mwahto ni soutik pil alehdi uwen pweipweiohte me irail kan me tepida nimenseng alehdi. Duwehte met, sohte lipilipil iahd me keidi kan pilipilda, irail pahn alehdi ketingparailo nanleng ma irail kin lelepekte.

TETEHK MWAHU KAWEID KAN

18-19. Dahme kitail sukuhlkihsang karasaras ko?

¹⁸ Dahme kitail koasoiapenehr? Ong irail kan me ahneki koapworopwor en mour kohkohlahte nin sampah, karasaras en sihpw oh kuht ko kin kasalehda uwen kesempwal en lelepekte oh loalopwoatohngete Siohwa—ahnsou wet oh pil erein kahn kamakam kohwahlapo me pahn wiawi. Ni ahnsowo, Sises pahn ketin kadeikada me lelepek kan nin duwen aramas kei me warohng kolahng “mour soutuk.”—Mad. 25:46.

¹⁹ Kitail pil koasoiapene karasaras riau me kasalehda mehn kataman kan ong me keidi kan. Nan sapwellimen Sises karasaras en meipwon loalokong oh loalopwon ko, meh limmen me kasalehda me irail loalokong. Irail kaunopada oh kin tetehk mwahu, kin onopada en awih sohte lipilipil ia uwen werei lao ohl kamwohdo leledo. Ahpw meipwon loalopwon ko sohte kaunopada. Eri ohl kamwohdo sohte mweidohng irail en iang eh kamadipw en kapwopwoudo. Kitail pil anahne onopada en awih sohte lipilipil ia uwen werei lao Sises ketin kasohrehla koasoandi en mwehi wet. Pil ehu, nan sapwellimen Sises karasaras en dalend ko, kitail koasoiapene duwen ladu lelepek riemen me kin pwerisek. Ira kin doadoahk laud ong ara soumaso oh alehdi eh kupwuramwahu. Ahpw soumaso soikala ladu pohnkahkeo. Ia mehn kasukuhlo? Kitail en kin soupisengkihte atail papah Siohwa lao lel ni imwi. Ni kaimwisekala, kitail koasoiapene duwen me keidi kan ar anahne pousehlahte mwasamwasahn pwe irail en “wisiksang,” de Sises en ketikiniraildalahng nanleng. Irail kin kasikasik arail pahn “pokonpene” rehn Sises nanleng. Mwurin mahwen en Armakedon, irail pahn wia sapwellimen Sises lih kamwohd nan kapwopwoud en Sihmpwulo.—2 Des. 2:1; Kaud. 19:9.

20. Dahme Siohwa pahn ketin wiahiong irail kan me kin tehk mwahu sapwellime kaweid kan?

²⁰ Ahnsoun sapwellimen Sises kadeik kerendohr, ahpw kitail sohte anahne perki. Ma kitail kin lelepekte, Samatail limpoako nanleng pahn ketikihong kitail “kehl me laudsang dahme aramas ahneki” pwe kitail en “kakohng . . . kesihnen mwohn Nein-aramas.” (2 Kor. 4:7; Luk 21:36) Sohte lipilipil ma atail koapworopwor iei en mi nanleng de nin sampah, kitail pahn kaperenda Samatailo ma kitail kin tehk mwahu kaweid kan me kohsang sapwellimen Sises karasaras ko. Oh pwehki Siohwa uhdahn ketin kadek, adatail kan pahn ‘ntingdi nan pwuhk’ en mour.—Dan. 12:1; Kaud. 3:5.