Kalahnganki Ohl kan me Wia “Kisakis kei”

1. Ia ekei kisakis kan me kitail alehsang rehn Sises?

SOHTE aramas emen me kin kasalehda kadek duwehte Sises. Ni eh ketiket nin sampah, e kin kalapw sewese aramas akan sang ni eh doadoahngki manaman kan. (Luk 9:​12-17) E ketikihda kisakis me keieu laud sang ni eh tounmeteikihla eh mour ong kitail. (Sohn 15:13) Sangete ahnsou me e ketin iasada, Sises kin ketin pousehlahte sewesei kitail. Duwehte me e inoukihda, e peki Siohwa en ketikihdo sapwellime manaman pwehn padahkih oh kansenamwahwih kitail. (Sohn 14:​16, 17, ntp.; 16:13) Oh sang ni atail mihting en mwomwohdiso kan, Sises kin pousehlahte ketikihda dahme kitail anahne pwe kitail en wia doadoahk en katohnpadahk nan sampah pwon.—Mad. 28:​18-20.

2. Ihs irail kan me wia “kisakis kei” me Episos 4:​7, 8 mahsanih?

² Pil mie ehu kisakis me Sises ketikihong kitail. Wahnpoaron Pohl ntingihdi me mwurin Sises ketidahla nanleng, “e ketikihdo aramas akan nin duwen kisakis kei.” (Wadek Episos 4:​7, 8.) Pohl kawehwehda me Sises ketikihda kisakis pwukat pwehn sewese mwomwohdiso ni soangsoangen ahl kan. (Ep. 1:​22, 23; 4:​11-13) Rahnwet, “kisakis” pwukat me iangahki sounsawas kan, elder kan, oh sounapwalih me kin seiloak kan.a Ei mehlel, ohl pwukat sohte unsek, eri irail kin wiahda sapwung kan. (Seims 3:2) Ahpw atail Kaun Sises Krais pahn ketin doadoahngkin irail pwehn sewese kitail; irail iei sapwellime kisakis ong kitail.

3. Menlau karasahda ia duwen atail kak utung doadoahk kan me irail me idihda nan mwomwohdiso kin wia.

³ Sises ketikihong ohl pwukat doadoahk kesempwal en kakehlaka mwomwohdiso. (Ep. 4:12) Ahpw kitail koaros kak sewese irail ni arail wia doadoahk kesempwal wet. Kitail kak kapahrekihong met ong koukoudahn Wasahn Kaudok ehu. Ekei kin iang wia doadoahk en kauwada doadoahko. A ekei kin sewese doadoahko sang ni arail kihda mwenge de kepwe kan de sawas ni ahl teikan. Duwehte met, sang ni dahme kitail kin nda oh wia, kitail koaros kak sewese sounsawas kan, elder kan, oh sounapwalih me kin seiloak kan pwehn kakehlaka mwomwohdiso. Kitail pahn koasoiapene ia duwen atail kin paiekihda arail kin doadoahk laud oh ia duwen atail kak kasalehiong irail oh Sises, me ketikihda “kisakis” pwukat me kitail kalahnganki irail.

SOUNSAWAS KAN KIN WIA “DOADOAHK EN SAWAS”

4. Soangen “doadoahk en sawas” dah me sounsawas kan kin wia ni mwehin tepin Kristian ko?

⁴ Ni mwehin tepin Kristian ko, ekei brother kan kin idihda nin duwen sounsawas kei. (1 Tim. 3:8) E mwomwen me irail me kin wia “doadoahk en sawas” me Pohl ntingihdi duwe. (1 Kor. 12:28) Eri e mwomwen me sounsawas kan kin wia doadoahk kesempwal tohto pwe elder kan en kak wiahte doadoahk en padahk oh apwalih mwomwohdiso. Karasepe, sounsawas kan kakete iang sewese wiahda copy en Nting Sarawi kan de pwainda soahng kan me anahn pwehn wiahda copy pwukat.

5. Ia ekei doadoahk en sawas kan me sounsawas kan kin wia rahnwet?

⁵ Medewehla ekei doadoahk en sawas kan me sounsawas kan kin wia nan omw mwomwohdiso. (1 Pit. 4:10) Ele irail pwukoahki apwalih nein mwomwohdiso mwohni de wasahn kalohk kan, oahte sawasepen Paipel kan ong mwomwohdiso, apwalih audio oh video, sewese irail kan me kohdo iang mihting, de sewese apwalih Wasahn Kaudok. Doadoahk pwukat koaros anahn pwe mwomwohdiso en kak soandi mwahu. (1 Kor. 14:40) Patehng met, ekei irail kin wia padahk nan atail mihting en Mour en Kristian oh Kalohk oh wia kapahrek ong wehipokon. Ele sounsawas men pil kin idihdida pwehn sewese sounapwalih en pwihn en kalohk. Oh ekei pak, ele elder men pahn peki rehn sounsawas men en iangih mwemweitla oh kangoange emen nan mwomwohdiso.

6. Ia ekei kahrepe kan me kitail kin kalahnganki doadoahk laud en sounsawas kan?

⁶ Ia duwen mwomwohdiso eh kin paiekihda doadoahk en sounsawas kan? Beberly,b sister men nan Bolivia koasoia, “I kalahnganki sounsawas kan, I kin uhdahn paiekihda mihting kan. Pwehki arail doadoahk, I kak koul, pasapeng, rong padahk kan, oh sukuhlsang kisin kasdo oh kilel kan. Irail kin tehk mwahu me irail kan me iang towehda mihting sohte pahn lelohng keper oh sewese irail kan me sohte iang towehda mihting ren kilang prokramo sang ni imwarail kan. Mwurin mihting, irail kin iang sawas kamwakel, sewese apwalih nein mwomwohdiso mwohni, oh tehk mwahu me kitail alehdi neitail pwuhk kan me kitail anahne. I uhdahn kalahnganki irail!” Leslie, me kin mi Colombia oh eh pwoudo wia emen elder, koasoia: “Ei pwoudo anahne sawas sang sounsawas kan. Ma sohte irail, e pahn uhdahn kedirepw, eri I kalahnganki arail ngoang oh men sawas.” Kitail koaros kin uhdahn kalahnganki dahme re kin wia!—1 Tim. 3:13.

7. Ia duwen atail kak kasalehda atail kalahnganki sounsawas kan? (Pil kilang kilel.)

⁷ Mendahki kitail kin kalahnganki sounsawas kan, Paipel pil kangoangehkin kitail: “Kumwail en kin kasalehda kalahngan.” (Kol. 3:15) Krzysztof, elder men nan Finland, kasalehda eh kalahngan ni ahl wet, “I kin kadar card de text me iren Paipel ehu iang oh koasoia mehkot me sounsawas kan nda de wia me kangoange ie de dahme kahrehda I kalahnganki doadoahk me re kin wia.” Pascal oh Jael, me kin mi New Caledonia, kin kalapw kapakapki sounsawas kan. Pascal koasoia: “Me keren, se kin kapakapki laud sounsawas kan oh kalahngankihong Siohwa, oh peki en ketin ieiang oh sewese irail.” Siohwa kin ketin karonge soangen kapakap pwukat, oh imwilahn met, mwomwohdiso pwon kin paiekihda.—2 Kor. 1:11.

ELDER KAN NAN MWOMWOHDISO KIN “DOADOAHK LAUD NANPWUNGAMWAIL”

8. Dahme kahrehda Pohl nda me ienge elder kan kin “doadoahk laud”? (1 Deselonika 5:​12, 13)

⁸ Elder kan ni mwehin tepin Kristian ko kin doadoahk laud nan mwomwohdiso. (Wadek 1 Deselonika 5:​12, 13; 1 Tim. 5:17) Irail kin “apwalih” mwomwohdiso—wia mihting kan oh wiahda pilipil kan nin duwen pwihn en elder kan. Irail pil kin kihong riarail Kristian kan “kaweid” ni elen limpoak, pwe irail en kak kehlailte nan pwoson. (1 Des. 2:​11, 12; 2 Tim. 4:2) Ei mehlel, ohl pwukat pil kin doadoahk laud pwehn apwalih arail peneinei kan oh pwehn pousehlahte kolokol arail pwoson oh nanpwungmwahu rehn Siohwa en kehlail.—1 Tim. 3:​2, 4; Taitus 1:​6-9.

9. Ia ekei pwukoa kan me elder kan ahneki rahnwet?

⁹ Elder kan rahnwet kin uhdahn kedirepw. Irail iei sounkalohki rongamwahwo. (2 Tim. 4:5) Irail kin wia mehn kahlemeng mwahu sang ni arail kin ngoangki kalohk, koasoanehdi doadoahk en kalohk nan wasahn kalohk kan, oh kaiahne kitail pwehn kalohk oh padahk. Irail pil wia sounkopwung kei me kadek oh sohte lipilipilki aramas. Ni Kristian men eh wiahda dihp laud ehu, elder kan kin nantihong sewese kamwahwihala eh nanpwungmwahu rehn Siohwa. Ni ahnsowohte, irail kin kanahieng pwe mwomwohdiso en mwakelekelte. (1 Kor. 5:​12, 13; Kal. 6:1) Me keieu kesempwal, elder kan kin wia silepen sapwellimen Koht pelin sihpw. (1 Pit. 5:​1-3) Irail kin kaunopada oh wia padahk en Paipel kan, nantihong esehla koaros nan mwomwohdiso, oh mwamwaitih oh kangoange riarail kan. Ekei elder kan pil kin sewese kauwada oh apwalih Wasahn Kaudok kan, koasoanehdi mihting tohrohr kan, oh iang wia doadoahk en Pwihn me Kin Ehuiong Imwen Wini kan oh Pwihn me Kin Mwamwaitih me Soumwahu kan, oh pil pwukoa teikan. Elder kan kin doadoahk laud ong kitail!

10. Ia ekei kahrepe kan me kitail kin kalahnganki elder kan me kin doadoahk laud?

¹⁰ Siohwa ketin kohpada me elder kan pahn apwalih mwahu kitail oh me kitail “solahr pahn perki de masak mehkot.” (Ser. 23:4) Johanna, sister men nan Finland, ahneki soangen pepehm wet ni ahnsou me eh nohnou soumwahuda laud. E koasoia: “E uhdahn sohte mengei ien koasoiaiong meteikan ei pepehm, ahpw elder men me I sohte nohn ese rong ie ni kanengamah, iang ie kapakap, oh kamehlelehiong ie sapwellimen Siohwa limpoak. I sohte taman dahme e koasoia, ahpw I taman me I sohla pwunod. I kamehlele me Siohwa ketin poaronehdo pwehn sewese ie ni ahnsou me I keieu anahne.” Ia duwen elder kan nan omw mwomwohdiso ar seweseiukehr?

11. Ia duwen atail kak kasalehiong elder kan atail kalahngan? (Pil kilang kilel.)

¹¹ Siohwa ketin kupwurki kitail en kasalehda atail kalahnganki elder kan “pwehki arail doadoahk.” (1 Des. 5:​12, 13) Henrietta, me pil mi Finland, koasoia: “Elder kan kin perenki sewese meteikan, ahpw met sohte wehwehki me mie arail ahnsou laud oh kehl laudsang meteikan, de sohte arail kahpwal kan. Ekei pak I kin ndaiongete irail: ‘Ke ese dah? Ke uhdahn wia elder mwahu men. I men ken ese met.’” Sister men nan Türkiyec me adaneki Sera koasoia: “Elder kan anahne kangoang pwe ren kak pousehlahte wia arail doadoahk. Eri kitail kak ntingihada kisinlikou ong irail, luke irail en iang mwenge, de iang irail kalohk.” Mie emen elder me ke uhdahn kin kalahnganki pwehki e kin doadoahk laud nan mwomwohdiso? Kasalehiong me ke kalahnganki dahme e kin wia.—1 Kor. 16:18.

SOUNAPWALIH ME KIN SEILOAK KAN KIN KAKEHLAKAHDA

12. Koasoandi dahieu me kin kakehlakahda mwomwohdiso kan ni mwehin tepin Kristian ko? (1 Deselonika 2:​7, 8)

¹² Sises pil ketin idihada ekei ohl pwehn sewese mwomwohdiso ni ehu ahl tohrohr. E ketin doadoahngki elder kan nan Serusalem pwehn kadarala Pohl, Parnapas, oh meteikan nin duwen sounapwalih me kin seiloak. (Wiewia 11:22) Dahme kahrehda? Kahrepeohte me sounsawas oh elder kan kin idihda: pwehn kakehlaka mwomwohdiso kan. (Wiewia 15:​40, 41) Ohl pwukat kin wiahda tounmetei tohto pwehn wia doadoahk wet. Ekei pak irail pil kin tounmeteikihla arail mour pwehn padahkih oh kangoange meteikan.—Wadek 1 Deselonika 2:​7, 8.

13. Ia ekei pwukoa kan me sounapwalih me kin seiloak kan kin wia?

¹³ Sounapwalih me kin seiloak kan kin anahne seiloak pak tohto. Ekei kin seiloakla wasa doh pwehn mwamwaitih mwomwohdiso kan. Ehuehu wihk, sounapwalih me kin seiloak kin wia padahk kan, iang mwamwaitih oh kangoange ekei nan mwomwohdiso, wia mihting en pioneer, mihting en elder kan, oh tuhpenehn kalohk. E kin kaunopada padahk kan oh koasoanehdi mihting tohrohr kan. E kin iang kasukuhlih sukuhl en pioneer kan, koasoanehdi mihting tohrohr rehn pioneer kan nan wasa me e kin mwamwaitih. Patehng soahng pwukat koaros, e pil kin apwalih pwukoa kesempwal teikan oh ekei pak kin uhdahn karuwaru—me e alehdihsang ohpis en Sounkadehdehn Siohwa kan.

14. Ia ekei kahrepe kan me kitail kin kalahnganki sounapwalih me kin seiloak me kin doadoahk laud?

¹⁴ Ia duwen mwomwohdiso kan kin paiekihda doadoahk kesempwal me sounapwalih me kin seiloak kan kin wia? Brother men nan Türkiye koasoia: “Ehuehu arail mwemweit ko kin kamwakid ien kalaudehla ei sewese riei Kristian kan. I tuhwongehr sounapwalih me kin seiloak tohto; ahpw sohte emen rehrail me kin nohnla kedirepw de sohte men koasoiong ie.” Johanna, me kitail koasoiapene mwoweo, iangih emen sounapwalih me kin seiloak kalohk, ahpw sohte me ira tuhwong. E koasoia: “I pahn ahnsou koaros tamataman rahno. Riei serepein riemeno keseula ehu wasa oh I uhdahn loaleidkin ira. Sounapwalih me kin seiloako kangoange oh sewese ien kilang me ahnsou wet ele kitail sohte kak mi karanih atail peneinei de kompoakepatail kan, ahpw nan sampah kapwo, kitail pahn mi rehrail kohkohlahte.” Me tohto kitail kin kesempwalki atail sounapwalih me kin seiloak kan oh mwomwen arail kin sewese kitail.—Wiewia 20:37–21:1.

15. (a) Nin duwen me 3 Sohn 5-8 mahsanih, ia duwen atail kak kasalehda atail kalahnganki sounapwalih me kin seiloak kan? (Pil kilang kilel.) (b) Dahme kahrehda kitail en kasalehda atail kalahnganki ahn brother kan me kin doadoahk laud arail pwoud, oh ia duwen atail kak wia met? (Menlau kilang koakono “Tamataman Arail Pwoud.”)

¹⁵ Wahnpoaron Sohn kangoange Kaius en kasalehda kadek ong brother ko me kodohng kakehlaka mwomwohdiso kan, oh ‘ni ar pahn mwesel, en sewese irail ni ahl me Koht ketin kupwurki.’ (Wadek 3 Sohn 5-8.) Ehu ahl me kitail kak wia met iei sang ni atail luke sounapwaliho en iang kitail mwenge. Pil ehu ahl iei en iang tuhpenehn kalohk kan me e kin wia. Leslie, me kitail koasoiapene mwoweo, pil kasalehda eh kalahngan ni ahl teikan. E koasoia: “I kapakapki me Siohwa en ketikihong irail dahme re anahne. Ngehi oh ei pwoudo pil ntinglahng irail oh padahkihong irail ia uwen arail mwemweito eh sewesei kiht.” Tamataman, sounapwalih me kin seiloak kan kin ahneki kahpwal kan oh kin pwangada duwehte kitail. Ekei pak, irail kin soumwahuda, pwunodki soahng kan, oh pil mworusala. Ele omw koasoi kadek de kisakis tikitik pahn sapengala arail kapakap en sawas!—Lep. Pad. 12:25.

KITAIL ANAHNE OHL KAN ME WIA “KISAKIS KEI”

16. Nin duwen me Lepin Padahk 3:27 mahsanih, peidek dah kan me brother kan ele kak pein idek rehrail?

¹⁶ Nan sampah pwon, kitail anahne brother tohto pwehn papah nin duwen “kisakis kei.” Ma kowe emen brother me papidaislahr, ke kak “sewese irail kan me kin anahne sawas”? (Wadek Lepin Padahk 3:27.) Ke men akadeiong en wiahla sounsawas men? Ma ke wialahr emen sounsawas, ke men akadeiong en wiahla emen elder?d Ke kak wiahda wekidekla kan nan omw mour pwe ken iang audehda doaropwehn iang Sukuhl ong Sounkalohki Wehio kan? Sukuhlo pahn kaiahne oh seweseiuk en kalaudehla Sises en ketin doadoahngkin uhk. Ma ke pehm me ke sohte kak wia soahng pwukat, kapakap ong Siohwa. Peki en ketikihong uhk sapwellime manaman pwe ken kak kapwaiada pwukoa me ke alehdi.—Luk 11:13; Wiewia 20:28.

17. Dahme brother kan me wia “kisakis kei” kadehdehda duwen atail Nanmwarkio, Krais Sises?

¹⁷ Brother kan me Sises ketin idihada nin duwen “kisakis kei” wia mehn kadehde me e kin ketin kaukaweid kitail ni imwin rahn pwukat. (Mad. 28:20) Kitail uhdahn kalahnganki me atail Nanmwarkio kin ketin kadek oh limpoak oh mwahngih dahme kitail anahne oh ketikihong kitail brother kan pwehn sewese kitail. Eri rapahki ahl akan en kasalehda omw kalahnganki ohl pwukat me kin doadoahk laud. Oh dehr manokehla en kalahngankihong Siohwa, pwe ih me kin ketikihda “kisakis mwahu oh unsek koaros.”—Seims 1:17.