Ia Duwen en Wia Kompoakepah Mwahu Men

MIE pak ke pehm me ke anahne kelehpwki ahmw kahpwal kan? Kitail mihmi ni “ahnsou apwal oh keper” kei me kak kahrehiong kitail en pehm mworus oh kelehpwla. (2 Tim. 3:1) Ahpw ni atail lelohng kahpwal kan, mie irail kan me kak sewese kitail. Paipel mahsanih me kompoakepah mwahu kan kak sewese kitail laud ni “ahnsou apwal” kan.—Lep. Pad. 17:17.

IA DUWEN KOMPOAKEPAH MWAHU KAN AR KAK SAWAS

Wahnpoaron Pohl paiekihda eh kompoakepahnki irail kan me kin iang ih seiloak. (Kol. 4:​7-11) Ni Pohl eh sensel nan Rom, kompoakepah kan wia doadoahk kan me Pohl sohte kak pein wia. Karasepe, Epaprodaitus walahng Pohl dahme e anahne sang rie Kristian kan nan Pilipai. (Pil. 4:18) Dikikus wahla nein Pohl kisin likou kan ong mwomwohdiso kan. (Kol. 4:7) Pwehki kompoakepah kan sewese ih, Pohl kak kangoange mwomwohdiso kan pil ni eh sensel nan imweo oh mwuhr ni eh mi nan imweteng. Ia duwen omw kak wia kompoakepah mwahu men rahnwet?

Mehn kahlemeng en riatail kan rahnwet kasalehda kesempwalpen en wia kompoakepah mwahu men. Elisabet, pioneer men nan Spain, kawehwehda ia duwen sister men eh sewese ih erein ahnsou apwal ehu. Ni ahnsou me toahkte ko padahkihong eh nohnou me e ahneki kanser, sistero kadaralahng Elisabet text tohto me kohsang iren Paipel kan. Elisabet koasoia, “Ni ei kilang nah text ko, I perenda ni ei ese me mie me kin medemedewe ie, oh met kakehlaka ie en wia dahme I anahne wia.”—Lep. Pad. 18:24.

Kitail kak kakehlaka atail nanpwungmwahu rehn riatail Kristian kan ni atail sewese irail en iang kalohk de mihting. Karasepe, ke kak kihda mehn peidaid ong riatail me mah kan pwehn ren iang mihting de kalohk? Ma ke sewese irail ni soangen ahl wet, ke kak kangoange irail oh re pil kak kangoangeiuk. (Rom 1:12) Ahpw, ekei riatail Kristian kan sohte kak kohkohsang imwarail. Ia duwen atail kak sewese irail?

SEWESE IRAIL KAN ME SOHTE KAK KOHKOHSANG IMWARAIL

Ekei riatail Kristian kan sohte kak iang towehda mihting nan Wasahn Kaudok pwehki re ahneki soumwahu laud. Medewehla David me ahneki soumwahu en lymphoma. Erein sounpwong weneu samwa, e kin aliale chemotherapy. Erein ahnsou ko, David oh eh pwoudo, Lidia, kin iang towehda mihting sang ni imwarao.

Ia duwen riatail Kristian kan nan mwomwohdiso ar kangoange ira? Mwurin ehuehu mihting, ekei irail nan Wasahn Kaudok kin nsenohki koasoiong David oh Lidia nan videoconference. Patehng met, ni David oh Lidia ara kin pasapeng, mwuhr riara Kristian ko pahn kin kadarala text kan pwehn kangoange ira. Ia imwilahn met? David oh Lidia kin pehm limpoak sang riara kan.

Mwein kitail kak wiahda koasoandi en kalohk rehn riatail men me sohte kak kohkohsang ni imweo. Kitail kak wiahda wekidekla kan nan atail koasoandi pwe kitail en kak iang irail kalohk. Ni ahl wet, kitail kin kasalehiong irail me kitail sohte kin manokeirailla. (Lep. Pad. 3:27) Mwein ke kak nting kisin likou de kalohk nan delepwohn rehrail. Irail kan me mihmihte nan ihmw kakete iang mihting en kalohk nan videoconference. David oh Lidia kalahnganki soangen koasoandi wet. David koasoia, “En iang aht pwihnen kalohk koasoipene oh kapakap kin uhdahn kangoange kiht.” Ekei pak ma kak, ke kak peki rehrail ma ke kak wahdo emen noumw tohnsukuhl en Paipel oh kumwail wia onop en Paipel wasao.

Ni atail kin patehng riatail kan me sohte kak kohkohsang ni imwarail, kitail kin esehla irail oh arail irair kaselel kan, oh kitail kin wiahla kompoakparail keren kei. Karasepe, ni omw kin rong arail padahki emen duwen Mahsen en Koht oh sewese en karanihala Siohwa, omw wauneki irail kin laudla. Ni omw sewese riomw kan en iang kalohk oh mihting, ke kak wiahda kompoakepahmw tohto.—2 Kor. 6:13.

Pohl kin nsenamwahu ni kompoakepaho Taitus eh kohla kilang ih. (2 Kor. 7:​5-7) E mwahu en ndaiong riatail Kristian kan lokaia kangoang kan. Ahpw mehn kahlemeng en Taitus padahkihong kitail me kitail pil kak kansenamwahwih irail ni atail patehng irail oh iang wia soahng kan pwehn sewese irail.—1 Sohn 3:18.

WIA KOMPOAKEPAH MWAHU MEN EREIN AHNSOUN KALOKOLOK

Riatail Kristian kan nan Russia wia mehn kahlemeng kaselel en sewese emenemen. Medewehla dahme wiawihong Sergey oh eh pwoudo, Tatyana. Polis ko rapahki soahng kei nan imwarao oh eri wa irahla ni arail ohpiso. Tatyana me re tepin mweidohng en pwurala ni imwarao. Sergey koasoia: “Ni Tatyana eh lella imwato, sister eimah men mwadangete lella reh. Ekei kompoakepaht kohdo oh sewese kiht kamwakelehda imwato.”

Sergey pil koasoia: “I uhdahn mwahuki Lepin Padahk 17:17 me mahsanih: ‘Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?’ Erein ahnsoun kalokolok wet, I uhdahn anahne sawas laud sang kompoakepahi kan. I sukuhlki me mahsen kan nan Lepin Padahk 17:17 uhdahn mehlel. Siohwa ketikihda kompoakepahi kan me kin eimah sewese ie.”a

Kitail anahne sawas sang kompoakepatail met erein ahnsou apwal kan. Kitail uhdahn pahn anahne irail erein kahn kamakam kowahlapo. Eri kitail en nantihong wiahla kompoakepah mwahu kei ahnsou wet!—1 Pit. 4:​7, 8.