Doadoahngki Paipel Duwehte Kilahs en Irongen Ehu

Tohnpadahko Seims kapahrekiong Paipel kilahs en irongen ehu me sewese kitail en tehk mwahu pein kitail. (Seims 1:​22-25) Ia duwen atail kak doadoahngki mwahu Paipel nin duwen kilahs en irongen?

Wadek ni keneinei. Ma kitail kin kilang kitail nan kilahs ehu oh mwadang sohpeisang, ele kitail sohte pahn kak kilangada ma mie mehkot sapwung ni mwomwatail. Ni ahlohte, ma kitail kin karuwaru en wadek Paipel, kitail sohte pahn tehkada dahme kitail ele anahne kapwungala. Pwehn wia met, kitail anahne wadek Paipel ni keneinei.

Medemedewe dahme ke anahne kamwahwihala, kaidehn meteikan. Ekei pak ni atail kin irongen, kitail pil kak kilang meteikan nan kilahso, oh kitail ele pahn medemedewehte dahme sapwung ni mwomwatail. Duwehte met, kitail kak wadek Paipel oh medemedewe dahme meteikan anahne kamwahwihala. Ahpw met sohte kak sewese kitail en kapwungala wasa kan me kitail anahne kamwahwihala.

Ahneki madamadau pwung oh toupahrek. Ma kitail kin irongen oh kilangete dahme kitail sohte mwahuki rehtail, kitail kakete mworusala. Kitail anahne ahneki madamadau pwung oh toupahrek ni atail wadek Mahsen en Koht oh dehr song en wia laudsang dahme Siohwa ketin kupwurki.—Seims 3:17.