Ia Mwomwen Ngehi Mwohn Silangin Siohwa?
1. Ia duwen Paipel eh duwehte kilahs en irongen?
1 Pak depe ke kin irongen nan kilahs? Pali laud en kitail kin wia met pwehki e kin sewese kitail en kilang mwomwatail me kitail anahne kamwahwihala. Paipel kin pil duwehte kilahs en irongen. Wadewadek Mahsen en Koht kin kamwakid kitail en kasawih loalatail, me iei dahme Siohwa kin ketin kilang. (1 Sam. 16:7; Seims 1:22-24) Mahsen en Koht kak “kadeikada ineng oh lamalam en nan kapehd en aramas.” (Ipru 4:12) Ia duwen wadewadek oh doudouloale Paipel rahn koaros eh kak sewese kitail en kasawih wasa kan me kitail anahne kakehlaka pwe kitail en kak wia sounkalohk kan me kin pweida?—Mel. 1:1-3.
2. Ia duwen Paipel eh kak sewese kitail en kasawih pein kitail?
2 Doadoahngki Paipel nin Duwen Kilahs en Irongen: Koasoi kan nan Paipel me pid duwen sapwellimen Siohwa ladu lelepek kan kin padahkihong kitail duwen soangen irair kan me kaselel ong ih. Karasepe, Depit kin kasalehda eh ngoangki kalinganahla mwaren Koht. (1 Sam. 17:45, 46) Aiseia kin eimah toukihda pein ih en kalohk ni wasa apwal. (Ais. 6:8, 9) Sapwellimen Sises limpoak laud ong Semeo nanleng kin kahrehiong ih en kin ketin kilengwohng doadoahk en kalohk nin duwen mehkot me pahn kihong ih peren laud oh nsenamwahu mehlel, a kaidehn mehkot me pahn katoutouwihala ih. (Sohn 4:34) Tepin Kristian kan kin ngoangki kalohk, likih Siohwa, oh koasoanehdi teng en dehr pwangada. (Wiewia 5:41, 42; 2 Kor. 4:1; 2 Tim. 4:17) Atail doudouloale duwen mehn kahlemeng pwukat pahn sewese kitail en kasawih pein kitail pwehn song en kamwahwihala mwomwen atail kin wia sapwellimen Koht doadoahk.
3. Dahme kahrehda kitail en dehr pwand en wiahda wekidekla kan me anahn?
3 Mwekid Pwehn Kapwungala Sapwung kan: Ni mehlel, sohte katepen en kilang nan kilahs en irongen ahpw pohnsehsehla sapwung kan. Kitail kak peki rehn Siohwa en sewese kitail en kak kilang dahme uhdahn mehlel me pid duwen pein kitail oh sewese kitail en wiahda wekidekla kan me anahn. (Mel. 139:23, 24; Luk 11:13) Pwehki ahnsou wie mwotomwotala oh mouren aramas iang pidada, kitail anahne dehr pwand en wiahda wekidekla kan me anahn nan atail mour.—1 Kor. 7:29; 1 Tim. 4:16.
4. Dahme pahn wiawihong aramas emen me kin tehk mwahu Mahsen en Koht oh eri doadoahngki dahme e kin diarada?
4 Loalatail, me Siohwa kin ketin tetehk, uhdahn kesempwalsang mwomwatail ni mas liki. (1 Pit. 3:3, 4) Dahme kin wiawihong aramas emen me kin tehk mwahu Mahsen en Koht oh eri doadoahngki dahme e kin diarada? E “kin dadaurete, sohte kin rongete oh manokehla, ahpw kapwaiada; iei aramas menet me Koht pahn ketin kapaiahda ni mehkoaros me e pahn kin wia.” (Seims 1:25) Ei, kitail pahn wia sounkalohk peren oh koahiek kei pwehki “kitail koaros wia sansal en lingan en Kaun-o.”—2 Kor. 3:18.