Siohwa Ketin Sewesei Kiht Pwehn Perenki Wasa me Se Kin Mih Ie

Brother oh sister Kassholms iang Sukuhl en Kilead nan 1979 oh erein sounpar tohto, ira pekederla pwehn papah nan Iran, Mauritius, Myanmar, Tanzania, Uganda, oh Zaire. Nan Kilead, ira rong sounpadahko Jack Redford eh kihda kaweid me sewese ira ehuehu ahnsou me ira alehdi pwukoa kapw ehu, me kin wiawi pak tohto. Ira pahn koasoiahda.

Mats, menlau koasoiahda ia duwen omw diarada padahk mehlel.

Mats: Ei pahpao kin mi Poland erein Mahwen Keriau en Sampah, oh e kilang wiewiahn mwalaun tohto nan Sarawien Kadolik. Ahpw, e kalapw nda, “I ese me mie kaudok mehlel wasa kis!” Kedekedeo, I esehda me e pwung. I kin pwainda pwuhk tohto me sohte nohn kapw. Ehu pwuhk ko iei Padahk Mehlel me Kahluwalahng Mour Soutuk me poh mei. Oaralap en pwuhko uhdahn sair ie, oh I wadekala nipwong en rahnohte me I alehdi. Ahnsou me I kanekehla pwuhko, I ese me I diaradahr padahk mehlel!

Sang April 1972, I wadekala nein Sounkadehdehn Siohwa kan pwuhk tohto teikan oh I diarada pasapengpen ahi peidek kan duwen Paipel. I pehm me I duwehte sounneto nan ahn Sises karasaraso, me mwurin eh diarada perl kesempwal ehu, e netikihla soahng koaros me e ahneki pwehn pwainda. I “netikihla” ei pilahn en iang sukuhl laud pwehn pwainda “perl” en padahk mehlel me I diarada. (Mad. 13:​45, 46) I papidaisla nan December 10, 1972.

Erein sounpar ehu, ei pahpa nohno oh riei pwutak tikitiko alehda padahk mehlel oh papidaisla. Nan July 1973, I tepida doadoahngki pali laud en ahi ahnsou ong papah Siohwa. Mie pioneer kaselel men nan aht mwomwohdisou me adaneki Ann-Catrin me kin uhdahn poakohng Siohwa. Se poakohngala emenemen oh pwopwoudla nan 1975, oh erein sounpar pahieu se mi nan kisin kahnimw en Strömsund, wasa kaselel ehu nan Sweden me aramas tohto kin men sukuhlki padahk mehlel.

Ann-Catrin: Ei pahpao sukuhlki padahk mehlel erein eh iang sukuhl laud nan Stockholm. I sounpwongte siluh ahnsowo, ahpw e kin waiehda kohla mihting oh kalohk. Ei nohnou sohte mwahuki met oh e song en kadehdehda me Sounkadehde kan sapwung. Ahpw e sohte kak, eri mwuhr e pil papidaisla. I papidaisla ni ei sounpar 13, oh ni ei sounpar 16, I tepida pioneer. Mwurin ei papah nan Umeå, wasa me mie anahn laud ong sounkalohk, I wiahla emen pioneer.

Mwurin ngehi oh Mats pwopwoudla, se perenki sewese aramas kei sukuhlki padahk mehlel. Emen irail iei Maivor, serepein pwulopwul men me uhdihsang iang mwadong pwehn kalaudehla eh papah Siohwa oh e iangih riei serepein tikitiko pioneer. Ira iang Sukuhl en Kilead nan 1984 oh met wia misineri kei nan Ecuador.

Dahme sewese kumwa en ahnla oh perenkihte amwa pwukoa kan?

Mats: Se kin kalapw alehdi pwukoa kapw kan. Ahpw me keieu sewesei kiht en ahnla pwukoa kan iei en ahnsou koaros song uwen aht kak en alasang Sises, ahpw mehlel sapwellime irair en aktikitik. (Kol. 2:​6, 7) Karasepe, se sohte kin kasik riat Kristian kan wasao en wiahiong kiht soahng kan me se ahn, ahpw sen song en sukuhlki kahrepen arail wia soahng ehu. Se kin song en wehwehki mwomwen arail madamadau oh tiahk. Ni aht kin kahlemengih Sises, e mengeila sen ahnla oh perenki aht pwukoa kan.—Mel. 1:​2, 3.

Ann-Catrin: Ni aht keseula pwehn wia pwukoa kapw ehu, se duwehte tuhke pwoat me ahpwte poaddi oh anahne ketipin pwehn kekeirda. Siohwa kin ketin ahnsou koaros rasehng “ketipin ehu” ong kiht. (Mel. 84:​11, NW) Siohwa ketikihda riat Kristian tohto me kin poakohng kiht. Karasepe, Kristian ko nan Tehran, Iran, kin uhdahn kasamwo oh kadek ong kiht. E katamankihong kiht duwen kadek me ekei me ke wadek nan Paipel kin kasalehda. Se men mihmihte nan Iran, ahpw nan July 1980, kopermento keinapwihdi doadoahk en kalohk wasao oh ndaiong kiht me erein awa 48 se anahne kohkohsang sahpwo. Se uhd pekederla Zaire (me met adaneki Congo) nan Africa.

Ni ahnsou me I tepin esehda me se pahn pwurala Africa, I sengiseng. I rong duwen sineik oh soumwahu kan nan Africa oh I masakada. Ahpw kompoakepaht keren riemen me kin papah nan Africa erein sounpar tohto ndaiong kiht: “Kumwa saik lel mwo! Song kohla oh kilang, kumwa uhdahn pahn perenki.” Oh ih met me wiawi! Kristian kan wasao uhdahn kin poakohng kiht. Ahpw sounpar weneu mwuri, se anahne kohkohsang Zaire pwehki atail doadoahko keinapwidi. I kouruhr pwe ahnsowo I kapakapkihong Siohwa, “Menlau mweidohng kiht sen mihmihte Africa.”

Kapai dah kan me kumwa alehdi ni amwa papah Siohwa?

Se kompoakepahnkihla misineri teikan me kohsang soangsoangen wasa kan. Pil nan ekei pwukoa ko, kiht koaros ahneki onop en Paipel 20 ape, oh met kin kihong kiht peren laud! Pil ehu, I sohte pahn manokehla limpoak oh kadek me riat kan nan Africa kasalehda. Se kin pweidihte nan warat sidohsao ni aht mwemweitla ni mwomwohdiso kan nan Tanzania. Oh Kristian ko kin tehk ma mie soahng koaros me se anahne, mendahki irail uhdahn semwehmwe. (2 Kor. 8:3) Ahpw ehu me se uhdahn kesempwalki iei ahnsou me se kahdaneki ahnsoun soai. Ahnsowo, ngehi oh Ann-Cartin kin mwohdpene oh koasoia dahme wiawi erein rahno oh kalahngankihong Siohwa eh ketin ieiang kiht.

Ann-Catrin: Ong ie, I uhdahn perenki aht esehla riatail Kristian kan me kohsang soangsoangen wasa kan. Se esehla lokaia teikan—me iangahki lokaiahn Farsi, France, Luganda, oh Swahili, oh se pil esehla soangsoangen tiahk kan. Se sewese kaiahnehda me kapw kan, wiahda kompoakepaht mwahu kan, oh perenki iang irail papah Siohwa.—Sep. 3:9.

Se pil kilang soangsoangen kepikipik kan en Siohwa. Ehuehu ahnsou me se kin alehdi pwukoa kapw ehu, e mwomwen me Siohwa kin ketin ahnsou koaros kasalehiong kiht wasa me sen kohla. E ketin padahkihong kiht soahng kan me pein kiht sohte kak sukuhlki.

Kahpwal dah kan me kumwa lelohng, oh dahme sewese kumwa en dadaur?

Mats: Ekei pak se iangada soumwahu lusulus, me duwehte malaria. Oh mie ahnsou kei me Ann-Catrin anahne ale pwal ni aht sohte kasik. Se pil pwunodki aht pahpa nohno me mahlahr, ihme kahrehda, se uhdahn kalahnganki riat ko me apwalih ira erein aht wia aht pwukoa. Irail apwalih aht pahpa nohno ni kanengamah, peren, oh limpoak. (1 Tim. 5:4) Mendahki se kin wia uwen aht kak koaros en sawas erein aht mi wasa doh, ekei pak se kin nsensuwedla oh men wia laudsang.

Ann-Catrin: Nan 1983, erein aht papah nan Zaire, I ahnekihda soumwahu en Kolera. Toahkteo ndaiong Mats, “Rahnwet te wahlahsang ih nan sahpwet!” Se kohkohla rahno mwuri, ahpw ihte sompihr me se kak dake kohla Sweden iei me kin wahte kepwe.

Mats: Se sengiseng pwehki se medewe me se solahr pahn kak wia misineri kei. Toahkteo medewe me Ann-Catrin sohte pahn mwahula, ahpw e mwahula. Oh sounpar ehu mwuri, se pwurala Zaire, met nan kisin mwomwohdiso ehu me kin lokaiahki lokaiahn Swahili nan Lubumbashi.

Ann-Catrin: Ni aht mihmi Lubumbashi, I iohla. Mendahki se sohte pilahn en naineki seri, I uhdahn nsensuwedkihla nait serio eh mehla. Ahpw, erein ahnsou apwalo, Siohwa ketikihong kiht kisakis ehu me se sohte kasik. Se tapiada onop en Paipel tohtohsang mahs. Sohte lel sounpar ehu, sounkalohk 35 nan mwomwohdisou tohtohla lel 70. Oh meh 40 me kin iang towehda mihting, tohtohla lel meh 220. Se uhdahn soupisengki kalohk, oh Siohwa ketin kapaiahda aht nannanti oh met kansenamwahwihiehla. Se kin medemedewehte oh kalapw koasoia nait serio. Se kasikasik en kilang Siohwa eh pahn ketikihsang atail medek koaros nan Paradais.

Mats: Ann-Catrin tepida uhdahn luwetala oh pwang. Ni ahnsowohte, I diarada me I kanser en mwasahl (colon) oh anahne pwal. Ahpw met I mwahu, oh Ann-Cartin kin wia uwen eh kak koaros en papah Siohwa.

Se esehda me kaidehn kiht kelehpw me ahneki kahpwal kan. Mwurin ahnsou me keinek kan kin peipene oh kemehla emenemen nan Rwanda nan pahr 1994, se mwemweitla rehn riatail Kristian tohto me kin mi wasa kan me irail kan me tangasang sapwarail pwehki mahwen kin mi ie. Ni aht kilang arail pwoson, dadaur, oh kadek mendahki irail mi wasa me uhdahn apwal, met padahkihong kiht me Siohwa ketin sapwellimanki manaman en sewese sapwellime kan nan soangen kahpwal koaros.—Mel. 55:22.

Ann-Catrin: Pil ehu kahpwal wiawi ni ahnsou me se iang towehda kasarawien branch kapw nan Uganda, 2007. Mwurin prokramo, se iangih misineri kei oh tohn Pedel kei kohkohla Nairobi, Kenya. Mwohn aht lel ni idin Kenya, sidohsa laud ehu apali ahlo tangodohte loiong kiht. Me dirapo oh kompoakepaht meh limmen mehlahte ahnsowo, oh mwuhr, emen sister mehla nan imwen wini. Se uhdahn kasikasik en pwurehng kilang kompoakepaht ko.—Sohp 14:​13-15.

Kedekedeo, ei ohla ko mwahula. Pwehki aksidento, ngehi oh Mats oh ekei doulahte ahneki pwunod laud. Ong ngehi, pwunod laudo kin kapiriehda nipwong, duwehte heart attack ehu. Met uhdahn kamasepwehk. Ahpw I kapakapohng Siohwa ni ngidingid oh wadek oh doudouloale ekei iren Paipel kan me se perenki kin sewesei kiht en meleilei. Se pil kohla tuhwong toahkte kan me ese apwalih pwunod laud me se ahneki oh met uhdahn sawas. Met se kehlailsang mwoweo oh se kin pousehlahte peki Siohwa en ketin sewesei kiht kansenamwahwih meteikan me kin lelohng soangen kahpwalohte.

Ni omw koasoia duwen amwa kak dadaur pahn irair apwal kan, ke koasoia me Siohwa kin ketin weuwa kumwa “duwehte kutohr amas.” Ia wehwehn met?

Mats: Lepin lokaiao kohsang lepin kahs en Swahili me koasoia “Irail wai kiht duwehte ar wa kutohr amas.” Duwehte emen eh kin wahda kutohr amas oh kanahieng pwehn dehr pwalpeseng, ni kadek Siohwa kin ketin apwalih kiht nan ehuehu aht pwukoa kan. E kin ahnsou koaros mie dahme se anahne, oh pil tohtohsang. Ehu ahl me se kin pehm sapwellimen Siohwa limpoak oh sawas iei sang ni Governing Body ar kasalehda me irail wehwehki aht pepehm.

Ann-Catrin: I koasoiahda ehu karasepen Siohwa eh ketin sewesei kiht ni kadek. Ehu rahno ei peneinei call kin ie me ei pahpao nan Sweden mi nan imwen wini oh e uhdahn luwet. Mats sousoumwahukihte malaria. Se sohte kak pwainda ticket pwehn kohla. Eri se medewehda sen netikihla warat sidohsao. Ahpw, mie meh riemen me pil call kiht; ehu sang rehn pwopwoud ehu me rong duwen aht irairo oh men pwainda ehu ticket ko. Mehteio me call iei sister mah men me kin nekidala mwohni nan kisin kakon ehu me e ntingihong “Ong emen me anahne.” Erein minit keite, Siohwa ketin sewesei kiht sen alehdi ticket kan me se anahne!—Ipru 13:6.

Ni amwa medewehla sounpar 50 me kumwa doadoahngki ong Siohwa, dahme kumwa sukuhlki?

Ann-Catrin: I sukuhlki me aht kehl kin kohsang ‘aht kin meleilei oh kasalehda aht likih’ Siohwa. Ni aht kin likih Siohwa, e kin mwomwen me e ketin peikin kiht. (Ais. 30:​15, NW; 2 Kron. 20:​15, 17) Pwehki se papah Siohwa ni uwen aht kak nan ehuehu aht pwukoa ko, se alehdi kapai kan me tohtohsang me se kak alehdi ma se wia soahng teikan.

Mats: Dahme I keieu sukuhlki iei en likih Siohwa nan irair koaros oh kilang ia duwen eh pahn ketin sewese ie. (Mel. 37:5) E kin ketin ahnsou koaros sewese ie duwehte me e ketin inoukihda. Se kin kilang Siohwa eh kin ketin sewesei kiht nan aht pwukoa ahnsou wet nan Pedel en Myanmar.

Se koapworopworki me irail me pwulopwul tohto me men kalaudehla arail doadoahk en kalohk pahn kilang soangen limpoak loalopwoatohte me Siohwa ketin kasalehiong kiht. Se kamehlele me irail pahn kilang met ma irail mweidohng Siohwa en ketin sewese irail en ahnla wekidekla kan oh ahnekihte peren sohte lipilipil wasa me re pekederla ie.