Ahnekihte Peren ni Omw Mahla

1-2. Ia sapwellimen Siohwa madamadau ong me mah kan me kin lelepek? (Melkahka 92:​12-14; pil kilang kilel ni Kahn Iroir wet.)

NAN ekei sahpw, aramas akan kin medewe me e wia pai kaselel ehu ni arail mahla. Ahpw nan ekei wasa, aramas akan kin wia uwen ar kak pwe ren dehr mahla. Karasepe, ma irail kin kilangada moangepwet, re kin usasang. Ahpw sohte lipilipil ia uwen arail song en dehr mahla, irail sohte kak kauhdi.

² Dahme Samatailo kin medewehki sapwellime ladu kan me mahlahr? (Lep. Pad. 16:31) E ketin karasahkihong irail tuhke kaselel kan. (Wadek Melkahka 92:​12-14.) Ia wehwehn met? Tuhke kan me uhdahn wereilahr kin uhdahn kaselel pwehki mie teh oh rohs tohto. Karasepe, mie soangen tuhke ehu nan Sapan me mihmihier erein sounpar tohto. Ekei soangen tuhkeo mihmihkiher daulih sounpar kid, oh e inenen kaselel. Duwehte met, sapwellimen Siohwa ladu mah kan kin uhdahn kaselel mwohn silangi. Siohwa kin ketin kesempwalki irair kaselel kan me re ahneki. Irail kin papah ih erein sounpar tohto oh kin loalopwoatohngete ni ahnsou mwahu oh suwed.

3. Menlau kihda karasepen Siohwa eh kin ketin doadoahngki me mah kan pwehn kapwaiada kupwure.

³ Siohwa kin ketin pousehlahte kesempwalki kitail ni atail mahla.a Ni mehlel, Siohwa kin ketin doadoahngki me mah kan en wia doadoahk kesempwal oh kapwuriamwei kan. Karasepe, Sara uhdahn mah ni ahnsou me Siohwa ketin mahsanihong me e pahn nainekihda pwutak emen, kadaudoke kan pahn wiahla wehi laud ehu, oh Mesaiao pahn kohsang kadaudoke kan. (Sen. 17:​15-19) Moses pil mahlahr ni ahnsou me Siohwa ketin poaronehla pwehn kasaledekihala mehn Israel kan sang Isip. (Eks. 7:​6, 7) Oh wahnpoaron Sohn uhdahn mah ni ahnsou me Siohwa ketin doadoahngki en ntingihada pwuhk limau en Paipel.

4. Nin duwen me Lepin Padahk 15:15 mahsanih, dahme kak sewese me mah kan en dadaur pahn soangsoangen kahpwal kan? (Pil kilang kilel.)

⁴ Irail kan me mahlahr kin ahneki soangsoangen kahpwal kan. Emen sister kamwanki: “Ke anahne kommwad ni omw mahmahla.” Ahpw ahnekihte perenb kak sewese me mah kan en dadaur kahpwal kan me pahn pwarada. (Wadek Lepin Padahk 15:15.) Nan iren onop wet, kitail pahn sukuhlki dahme me mah kan kak wia pwehn ahnekihte peren. Kitail pahn pil koasoiapene ia duwen meteikan ar kak sewese Kristian kan nan mwomwohdiso me mahlahr. Keieu, kitail pahn koasoiapene dahme kahrehda e kak apwal en ahnekihte peren ni atail mahla.

DAHME KAHREHDA E KAK APWAL EN AHNEKIHTE PEREN NI ATAIL MAHLA

5. Dahme kakete kahrehiong ekei me mah en mworusala?

⁵ Dahme kak kahrehiong uhk ken mworusala? Ele ke mworusala pwehki omw sohte kak wia dahme ke kin wia mahso. Mwein ke men pwulopwulte oh ahneki roson mwahu. (Ekl. 7:10) Sister men me adaneki Ruby, kin ekei pak mworusala. E koasoia: “E kin uhdahn apwal ien likouda, pwehki I sohte kak mwekid duwehte mahso oh I kin kalapw medek. En pwekada nehie pwehn sidakinda pil apwal. Pehi ka kin kalapw medek oh I sohte kak doadoahngki mwahu sendin pehi ka. E pil apwal ien wia soahng mengei kan.” Oh Harold, me kin papah nan Pedel, koasoia: “Ekei pak I kin lingeringerda pwehki I sohte kak wia soahng koaros me I kin perenki wia mahso. I uhdahn kehlail oh pwulopwul mahso. Mahso I kin uhdahn perenki iakiu. Ekei kin nda ‘Kihong Harold mpweien pwe kitail en kana.’ Ahpw met I sohte leme I kak koski mpwei.”

6. (a) Kahrepe dah teikan me kak kahrehiong ekei me mah kan en mworusala? (b) Dahme kak sewese me mah kan en ese ma re anahne uhdihsang diraip de soh? (Menlau kilang artikelo “I Anahne Uhdihsang Diraip?” me mi nan Kahn Iroir wet.)

⁶ Ele ke kin mworuskihla omw sohla kak wia ekei soahng kan me ke kin pein wia. Mwein ke anahne sawas pwehn wia soahng kei, eri emen anahne kohwei ni imwomwo de ke anahne kohla mi rehn emen noumw seri. Mwein ke sohla kak diraip de kelehpw kohla wasa kan pwehki ke sohte nohn kehlail oh sohte kilang mwahu wasa. Met kak uhdahn kansensuwed! Ele ke sohla kak wia soahng tohto me ke kin wia mahso. Ahpw tamataman me Siohwa oh meteikan kin uhdahn kesempwalkin uhk. Oh kitail kak kamehlele me Siohwa ketin mwahngih atail pepehm. Siohwa ketin mwahngih uwen atail poakohng ih oh riatail Kristian kan. Oh met me e keieu ketin kesempwalki.—1 Sam. 16:7.

7. Ma ke kin medewe me ke kakete mehla mwohn Armakedon, dahme kak seweseiuk?

⁷ Ele ke kin nsensuwed pwehki ke medewe me ke pahn mehla mwohn Armakedon. Ma ke ahneki pepehm wet, dahme kak sawas? Taman me Siohwa kin “ni kanengamah” ketin awiawih ahnsou me e pahn ketin kasohrehla koasoandi wet. (Ais. 30:​18, NW) Dahme kahrehda Siohwa kin ketin kanengamah? Pwehki e ketin koapworopworki me aramas tohto pahn sukuhlki duwen ih oh pilada ren wiahla kompoakepah. (2 Pit. 3:9) Eri ni omw kin mworusala, tamataman me aramas tohto kak esehla Siohwa oh pitila mwohn imwio eh leledo. Ekei kakete omw peneinei de kisehmw.

8. Ni me mah kan ar soumwahu de medek, dahme irail kakete wia?

⁸ Sohte lipilipil ma kitail pwulopwul de mah, ni atail kin soumwahu de medek, kitail kakete nda de wia soahng kan me kitail kin koluhkihla. (Ekl. 7:7; Seims 3:2) Karasepe, ni ahnsou me ohl lelepeko Sohp wie lokolok, e kin wia “pato mwahl akan.” (Sohp 6:​1-3) Pil ehu, pwehki soumwahu de wini me me mah kan kin aliale, irail kakete nda de wia soahng kan me re sohte kin nda de wia. Mehnda ma kitail mahlahr de soumwahu, e sapwung en ahnsou koaros kasik me meteikan en wiahiong kitail soahng kan, de kitail en sohte kasalehiong irail kadek. Oh ma kitail ese me kitail ndaiong emen mehkot me sohte kadek, kitail en mwadang pekimahk reh.—Mad. 5:​23, 24.

IA DUWEN OMW KAK AHNEKIHTE PEREN

9. Dahme kahrehda ke anahne peki sawas rehn meteikan? (Pil kilang kilel kan.)

⁹ Peki sawas rehn meteikan. (Kal. 6:2) Ele nin tapio ke apwalki wia met. Sister men me adaneki Gretl koasoia: “Ekei pak I kin apwalki peki sawas rehn meteikan pwehki I pehm me I kakete kedirapwa irail. Erein ahnsou werei me I wekidala ei madamadau oh ni aktikitik kasalehda me I anahne sawas.” Tamataman me meteikan pahn peren ni omw mweidohng irail en seweseiuk. (Wiewia 20:35) Oh ke pahn perenki kilang me meteikan kin poakohng oh nsenohkin uhk.

10. Dahme kahrehda ke anahne taman en kasalehda kalahngan?(Pil kilang kilel kan.)

¹⁰ Kasalehda kalahngan. (Kol. 3:15; 1 Des. 5:18) Ni meteikan ar wiahiong kitail soahng mwahu kan, kitail kin kalahnganki ahpw ele kitail manokehla kasalehda. Ahpw, ma kitail kin sirei oh nda kalahngan, kompoakepatail kan pahn ese me kitail kalahnganki dahme irail wiao. Leah, me kin apwalih me mah kan nan Pedel, koasoia: “Emen sister ko me I kin apwalih kin ahnsou koaros ntingihada kisinlikou pwehn kalahngan ong ie. Dahme e kin koasoia sohte reirei, ahpw uhdahn kadek. I uhdahn perenki ale kisinlikou ko, oh I perenki ese me e kalahnganki ei sawas.”

11. Ia duwen omw kak sewese meteikan? (Pil kilang kilel kan.)

¹¹ Wia uwen omw kak en sewese meteikan. Ni omw kin medewe meteikan oh song sewese irail, ke sohte pahn nohn medemedewe pein omw kahpwal kan. Kitail kak kapahrekiong me mah kan pwuhk kan me kin kihda mehn kasukuhl kesempwal. Ma aramas sohte wadek pwuhk ko, sohte mehkot re kak sukuhlkihsang. Duwehte met, me pwulopwul kan sohte kak sukuhlkihsang uhk mehkot ma ke sohte koasoiong oh padahkihong irail ekei soahng kan me ke ese. Idek rehrail peidek kan, kowe eri rong. Mwuri ke kak padahkihong irail ia duwen Siohwa eh ketin seweseiuk nan omw mour oh ia duwen peikihong Siohwa eh pahn kihong irail nsenamwahu. Ni omw kin kansenamwahwih oh kangoange kompoakepahmw pwulopwul kan, ke pahn nsenamwahu.—Mel. 71:18.

12. Nin duwen me Aiseia 46:4 mahsanih, dahme Siohwa ketin inoukihong me mah kan? (Pil kilang kilel kan.)

¹² Peki Siohwa en ketikihong uhk kehl. Ekei pak, ele ke kin luwetala de pwangada, oh met kak kamworus. Ahpw taman me Siohwa uhdahn ketin manaman. Paipel mahsanih me e ‘sohte mwahn kin ketin ngirala de luwetala.’ (Ais. 40:28) Eri, e kak ketikihong uhk kehl koaros me ke anahne. (Ais. 40:​29-31) Ni mehlel, Siohwa ketin inoukihda en seweseiuk. (Wadek Aiseia 46:4.) Oh Siohwa kin ahnsou koaros ketin kapwaiada sapwellime inou. (Sos. 23:14; Ais. 55:​10, 11) Ni omw kin kapakap, Siohwa pahn ketikihong uhk sawas me ke anahne. Eri ke pahn pehm uwen eh ketin poakohng uhk oh met pahn uhdahn kansenamwahwihiukla.

13. Nin duwen me 2 Korint 4:​16-18 mahsanih, dahme kitail en tamataman? (Pil kilang kilel kan.)

¹³ Taman me ke pahn pwurehng pwulopwulla oh ahneki roson mwahu. Ni atail kin tamatamante met, e pahn mengeiong kitail en dadaur. Paipel inoukihda me ni ahnsou kohkohdo, aramas akan sohla pahn mahla oh soumwahu. (Sohp 33:25; Ais. 33:24) Eri, ke kak nsenamwahu pwehki ke ese me ni ahnsou kohkohdo ke pahn ahneki roson mwahu, kehlail, oh kaselella. (Wadek 2 Korint 4:​16-18.) Ahpw dahme meteikan kak wia pwehn sawas?

IA DUWEN METEIKAN AR KAK SAWAS

14. Dahme kahrehda e kesempwal en mwemweitla de call me mah kan?

¹⁴ Kaukaule mwemweitla oh call riatail me mah kan. (Ipru 13:16) Me mah kan kak nsensuwedkihla arail kin kelekelehpw. Emen brother me adaneki Camille koasoia: “Ekei pak, I kin pwunod oh lingeringerki ei sohte kak kohkohsang nan ihmw oh sohte kak wiahda mehkot.” Ni atail mwemweitla rehn me mah kan, irail pahn ese me kitail poakohng irail. Mwein mie pak me kitail men call de mwemweitla rehn me mah men, ahpw kitail sohte wia met. Kitail koaros kin kedirepw. Eri dahme kak sewese kitail en “pilada dahme keieu kesempwal,” me iangahki en mwemweitla rehn me mah kan? (Pil. 1:10) Ke kak ntingihdi eden me mah kan nan omw mwomwohdisou oh rahn me ke pahn ntingla de call irail. Ke kak pil koasoanehdi ahnsou me ke pahn mwemweitla rehrail, oh dehr manokehla.

15. Dahme me pwulopwul kan oh me mah kan kak wiapene?

¹⁵ Ma kowe emen me pwulopwul, ele ke pwunodki dahme ke pahn nda de wia rehn me mah men. Ahpw ke sohte anahne pwunodki. Wiahte kompoakepah mwahu men. (Lep. Pad. 17:17) Koasoiong me mah kan mwohn de mwurin mihting. Mwein ke kak idek rehrail iren Paipel ehu me re perenki de mehkot me re wia ni ahnsou me re pwulopwul me kemenkouruhr. Ke pil kak luke irail en iang uhk kilang ehu JW Broadcasting^®. Ke pil kak wiahiong irail mehkot me re sohte kak pein wia. Karasepe, ke kak tehk mwahu me neirail sehlpwohn de tablet kin doadoahk mwahu oh me re naineki sawasepen Paipel kapw kan. Sister men me adaneki Carol, koasoia: “Idek rehn me mah kan ma re men iang uhk wia soahng kan me ke perenki wia. Mendahki I mahlahr, I kin perenkihte wia soahng kan me I perenki. I perenki netinet, iang iengei kan kohla mwenge, oh kohla mwemweit kilang soahng kaselel kan me Siohwa ketin kapikada.” Oh emen sister me adaneki Maira, koasoia: “Emen kompoakepahi ko sounpar 90. E sounpar 57 laudsang ie. Ahpw I kin manokehla me e uhdahn mah sang ie pwehki se kalapw kouruhr oh kilang kasdo. Oh ni aht kin lelohng kahpwal kan, se kin peki kaweid rehn emenemen.”

16. Dahme kahrehda e pahn sawas en iang me mah kan kohla rehn arail toahkte?

¹⁶ Iang irail ni rahnen arail pwurala rehn toahkte. Ke kak wairaila rehn toahkteo, oh ke pil kak mi rehrail pwehn tehk mwahu me toahkteo oh nurse kan kin apwalih mwahu oh kihong irail sawas me re anahne. (Ais. 1:17) Mwein ke kak sewese me maho sang ni omw ntingihdi soahng kan me toahkteo koasoia. Sister mah men me adaneki Ruth koasoia: “Ni ei kin kalapw kelehpw kohla rehn ei toahkteo, toahkteo sohte kin kamehlele dahme I padahkihong. Toahkte kan kakete nda soahng pwukat, ‘Ke sohte soumwahu, ke mwomwehdahte soumwahu.’ Ahpw ni ahnsou me emen kin iang ie, toahkteo kin uhdahn mwahu ong ie. I kalahnganki riei Kristian kan me kin wiahda ahnsou pwe ren iang ie.”

17. Ni ahl dah kan me ke kak iang me mah kan kalohk?

¹⁷ Iang irail kalohk. Ele ekei me mah kan sohte kak kalohk ihmw lel ihmw. Ahpw mwein ke kak luke irail en iang uhk kalohk doadoahngki deupen pwuhk kadahr. Mwein ke kak wahda sehr me re kak mwohndi powe limwahn deupen pwuhk kadahro. De ke kak luke emen me mah ong onop en Paipel ehu. Ke pil kak wia onopo ni imwen brother maho de sister maho. Ekei me mah kan mengeiki iang kalohk ni arail pwihnen kalohko kin tuhpene ni imwarailo. Ma ih duwen met, elder kan kak koasoanehdi. Siohwa kin ketin kupwurperenki ni atail wia dahme kitail kak wia pwehn kasalehda atail poakohng oh wauneki me mah kan.—Lep. Pad. 3:27; Rom 12:10.

18. Dahme kitail pahn koasoiapene nan iren onop en mwuhr?

¹⁸ Iren onop wet katamankihong kitail me Siohwa kin ketin poakohng oh kesempwalki me mah kan. Oh pil kitail koaros nan mwomwohdiso! Me mah kan, mendahki ke ahneki kahpwal tohto, Siohwa pahn ketin seweseiuk en ahnekihte peren. (Mel. 37:25) Oh ke kak kilengwohng ahnsou ehu me ke pahn ahneki peren me laudsang ahnsou wet. Ahpw ia duwen ekei kitail me kin apwalih kisehtail me mahlahr, de seri men, de kompoakepatail men me soumwahu? Ia duwen omw kak ahnekihte peren? Kitail pahn koasoiapene pasapengpen peidek wet nan iren onop en mwuhr.