Kisinlikou Sang Governing Body

“KALAHNGAN oh popohl en Samatail Koht oh atail Kaun Sises Krais en ketin ieiang kumwail.” Met kin wia rahnmwahu me Pohl kin kalap doadoahngki nan sapwellime kisinlikou kan ong mwomwohdiso kan. E kin kasalehda mwahu soangen rahnmwahu me se kin men wia ong kumwail.—Episos 1:2.

Ia uwen atail kin kalahnganki limpoak kadek me Siohwa kasalehiong kitail sang sapwellime koasoandi en meirong tomw en Sises Krais! Pwehki meirong en tomwo, kitail kak ahneki nanpwung mwahu rehn Koht. Kitail sohte kak ahneki nanpwung mwahu wet sang pein atail koahiek, mendahki kitail nantihong onop Paipel, kalohki Rongamwahu, oh wiewia mwahu ahnsou koaros. Siohwa Koht men ketikihong kitail kisakis en mahkpen dipatail oh pil kisakis en mour soutuk, kaidehn pwehki e men pwain ong kitail atail wiewia mwahu kan, ahpw pwehki kalahngan en Siohwa Koht sang rehn Sises Krais.—Rom 11:6.

Pohl ntingwohng rie Kristian kan: “Se peki ni ngidingid rehmwail pwe kumwail en dehr kin mwamwahliki sapwellime kalahngan me kumwail aleier. Kumwail rong dahme Koht mahsanih: ‘I karongeiuk, ni ahnsowo eh leledo me I pahn kasalehiong uhk ei kupwurkalahngan; I seweseiukada, ni rahno eh leledo me I pahn komouruhkala.’ Eri rong! Iet ahnsoun ale sapwellimen Koht kupwurkalahngan; rahnwet, ih rahnen komourla.” “Rahnen komourla” wehwehkiong ahnsou mwahu ong aramas en ale komourparail mwohn ohlahn Serusalem nan keieun senturi. Aramas me kin poakohng Siohwa ki mohngiong mehlel kak ale komourparail ni pali ngehn. Ma irail lelepek ong Siohwa, irail kak ale komourparail ni ahnsou me irail tang sang Serusalem mwohn e ohla nan pahr 70 C.E.—2 Korint 6:1, 2.

Rahnwet, kitail pil kin momour nan “rahnen komourla.” Irail me Siohwa kin ketin kupwurki oh irail eri wiahla sapwellime ladu kan pahn ale komourparail ni pali ngehn oh mwuhr ale komourparail ni ahnsou me “Rahnen Siohwa” pahn leledo.—Sepanaia 1:14.

Pwehki kitail wehwehki me Rahnen Siohwa kerenieng pahn leledo, kitail wehwehki me kitail ahneki pwukoa laud. Kitail anahne kehsehki aramas duwen Rahno oh sewese irail me mohngiong mehlel kan en alehdi kamwahu kan me kohsang sapwellimen Koht limpoak kadek pwe ren kak ale komourparail. Pohl kin wehwehki duwen kesempwalpen pwukoa wet. E ntingihdi: “Meid suwediong ie, ma I sohte pahn lohkiseli Rongamwahu!” E pil ntingihdi duwen ah pepehm kan wasaht: “Pwehki mie ei pwukoa ong aramas akan koaros, ong me marainlahr oh pil ong me rotorot akan, ong me loalokong oh me lampwon kan. Ihme kahrehda I pil inengieng lohki Rongamwahu.”—1 Korint 9:16; Rom 1:14, 15.

Siohwa pahn kapwukoahnki kitail ma kitail sohte pahn wia doadoahk en kehsehkin aramas dahme pahn wiawi ni ahnsou kohkohdo. Kitail kak wadek dahme Siohwa mahsanih ong soukohp Esekiel: “Kowe, nein aramas, I pahn wiahkinuhkala silepen wehin Israel. Ke ahpw padahkihong irail kehkehlik kan me I pahn wiahiong uhk. Ma I pahn mahsanih me emen pahn mehkihla dipe, ke ahpw sohte kaweidki pwe en wekidala eh mour suwed pwe en kak momour, e uhdahn pahn mehla nan dipe kan, a I pahn kapwukoahnekin uhk eh mehla.”—Esekiel 3:17, 18.

“Imwin rahn pwukat” kin wia ahnsou apwal akan. E sohte mengei en toupahrek apwalih atail pwukoa kan koaros: pwukoa en apwalih peneinei, doadoahk en mwohni, pwukoa kan nan mwomwohdiso, oh iang kalohk ahnsou koaros. Oh pil, sounkalohk tohto kin peiong arail soumwahu, arail pepehm en pahtou kan, arail wie mahmahlahr, oh pil uhwong sang meteikan. Pali laud en kumwail kin “toutoulahr.” Se men kasalehda duwen aht limpoak ong kumwail, nin duwen me Sises mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kakommoaleikumwailla.” (Madiu 11:28) Se men kapinga kumwail pwe kumwail kin wia uwen amwail kak koaros en papah Siohwa mendahki kahpwal kan me kumwail kin lelohng, sohte lipilipil ma kahpwal laud de tikitik.

Pwehki Siohwa kapaiada amwail doadoahk laud oh ngoang nan doadoahk en kalohk oh padahk, aramas 4,762 kin papidaisla (average) ehu ehu wihk. Erein pahr en kalohk me ahpwtehn neko, mwomwohdiso kapw 1,375 kin kokouda. Se kapakapki me pwuhk kapwo What Does the Bible Really Teach? me met mihmi ni lokaia 120 samwa, pahn sewese aramas tohto en ale kapai kan sang sapwellimen Siohwa limpoak, kadek oh popohl ni ahnsou wet nan “rahnen komour.”

Menlau tamataman me kiht, pwihn en Governing Body, kin poakpoake kumwail oh se kin kapakapkin kumwail. Se pil men kalahnganki amwail kin kapakapkin kiht.

Riamwail brother kan,

Governing Body en Sounkadehdehn Siohwa kan