Kisinlikou Sang Pwihn me Kin Apwalih Mwomwohdiso nan Sampah Pwon
Ong Riat Sounkadehdehn Siohwa kan:
Ia uwen kaperen en ahnsou pwukat! Oh ia uwen at peren! Se uhdahn perenki iang kumwail riat akan doadoahk pwehn wia kadehde me keieu laud ong Samatail nanleng, Siohwa.—Sohn 14:12.
Atail kin peren papah Siohwa sohte kin wehwehki me sohte atail kahpwal laud kan. Nan pahr en kalohk me nekiero, ekei kumwail lelohng kahpwal laud pwehki rerrer en sahpw, lapake kan de pil melimel ape. (Mad. 24:7) Me tohto kin nannanti pwehki kahpwal me kohsang soumwahu oh mahla. Kitail koaros anahne dadaurete pahn kahpwal me rasehng “medek en neitik.” (Mad. 24:8) Nan ekei sahpw me duwehte Armenia, Eritrea, oh South Korea, tohto riatail kan me selidi pwehki arail pwoson.—Mad. 24:9.
Dahme sewese kitail en kak kolokol madamadau pwung mendahki soangen kahpwal pwukat? Iren pahr en 2010 katamankin kitail ehu ire kesempwal: ‘Limpoak kin kanengamah ni mehkoaros. Limpoak me poatopoat, sohte imwi.’ (1 Kor. 13:7, 8) Ei, atail limpoak ong emenemen oh pil atail limpoak ong Siohwa kin kakehlaka kitail en kak dadaurete.
Tohto irail akan me dene irail Kristian kin pwuriamweikihla uwen laud oh miniminpenehn doadoahk en kalohk me kin wiawi sampah pwon. Mendahki irail sohte kin pwungki dahme kitail kamehlele oh kin padahngki, ekei kin nda, “Kumwail kin wiewia doadoahko me kitail koaros anahne wia!” Ia ehu ire me kin sewese Sounkadehdehn Siohwa kan en kak pousehlahte kalohk rahn koaros? Iei pil limpoak. Duwehte Samatail nanleng, kitail sohte men emen en kasohrala. (2 Pit. 3:9) Atail kin men koaruhsie en koluhla kin sansal sang ni uwen tohtohn sounkalohk 7,508,050 me kileldi nan pahr en kalohk nekiero. Met me keieu tohto sangete mahs leledo met. Mehnia pelien lamalam me towe tohto kin ngoangki tounmeteiki arail ahnsou ren iang kalohk?
Kitail kin ale kangoang ni atail kin kilang pweidahn kokohp me Aiseia ntingihdi: “Ni rahn ekei me pahn kohdo, nahnao, wasa me Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng rehi.” (Ais. 2:2-4) Nanpwungen pokon kalaimwun ehu me kin pokondohng ni tehnpas en Siohwa iei irail meh 294,368 me papidaislahr nan pahr en kalohk nekiero. Se kasamwo irail pwukat ong atail peneinei. Atail limpoak en Kristian en kin kamwakid kitail en pousehlahte sewese irail pwukat ren kak pelianda uhwong kan sang atail imwintihti Sehdan me Tepil.—1 Pit. 5:8, 9.
Sangete mahs kohdo, irail me towehda Kataman me wiawi Niare, March 30, 2010 me keieu tohto. Irail meh 18,706,895. Met kin kasalehda me miehte me tohto me kak iangala kitail oh kaudokiong Siohwa. Ia uwen atail peren pwehki Siohwa eh saikinte ketin kaimwisekala koasoandi suwed wet. Atail limpoak kin sewese kitail en kak dadaurete.—2 Des. 3:5.
Mihting Tohrohr me oaralap koasoia, “Kolokolete Omw Nanpwungmwahu Rehn Siohwa!” kakehlakahda atail nanpwungmwahu rehn Samatail nanleng, Siohwa. Mihting wet wiawi nan sampah pwon nan pahr 2010. Ia uwen mehlel mahsen pwukat en sounmelkahkao: “Meid pai wehi me ahneki soahng pwukat koaros; meid pai aramas akan me arail Koht iei KAUN-O!” (Mel. 144:15) Sohte lipilipil dahme pahn wiawi ahnsou kohkohdo, kitail kin likih me ma Siohwa kin ketin ieiang kitail, sohte mehkot kitail anahne masak. (Mel. 23:4) Ahnsou keren, Siohwa pahn ketin doadoahngki sapwellime Ohl pwehn “kauwehla doadoahk en Tepilo.” (1 Sohn 3:8) Kitail uhdahn kin inengieng met en pweida! Ahpw ahnsou wet tohto doadoahk me kitail pahn wia.—1 Kor. 15:58.
Kumwail en ese me se kin “tamataman kumwail” nan at kapakap kan. (Rom 1:9) Kumwail “dadaurete ni limpoak en Koht, ni amwail kasikasik kalahngan en atail Kaun Sises Krais me pahn ketikihong kumwail mour soutuk.”—Sud 21.
Se poakohng kumwail koaros!
Riamwail kan,
Pwihn me kin Apwalih Mwomwohdiso nan Sampah Pwon