Kisinlikou Sang Pwihn me Kin Apwalih Mwomwohdiso nan Sampah Pwon—2016
Riat akan:
Soukohp Aiseia ni karakarahk pohnese me sohte lipilipil pweida oh paiamwahu me Wehin Suda kin nsenamwahuki kin kohsangete ni sapwellimen Siohwa kapai. Ni atail wadek Aiseia 26:12, e kasalehda: “Maing KAUN, . . . mehkoaros me se pahn pweida loale iei wahn nin limomwi.” Soahng koaros me pweidahr nan pahr en kalohk nekiero kahrehiong kitail en pil pohnese soahngohte me Aiseia koasoia. Siohwa uhdahn kin ketin wiewia “soahng kapwuriamwei kei me saikinte wiawi” mahs! (Eks. 34:10) Medewehla ekei kapai kan me kitail alehdihsang nin lime.
Neitail website jw.org, kin wie kadoadoahk ni ahl ehu me inenen kaselel. Website wet miehier ni lokaia daulih 600, oh ke kak wadek oh download sawaspen Paipel kan ni lokaia daulih 750. Ia uwen website wet eh mwahu en kasalehda padahk mehlel ong aramas me mohngiong mehlel kan? Tehk met: Pwopwoud ehu mwoaroskihla wiewia mwalaun en pelien lamalam kan me ira kin kilang. Ni ara wia roporop ong kaweidpen ara mour, ira diarada neitail website. Ira eri tepida kaukaule kohla nan website wet pwehn wadek ire kan sang nan neitail sawaspen Paipel kan oh kilang kisin kasdo kan. Ira pil download kisin pwuhk Tetehk Paipel Ehuehu Rahn oh tepida wadek ehuehu rahn iangahki neira seri pwulopwul riemeno. Ni mehlel, ih met me irail wiewia ehu nimensengo ni ahnsou me Sounkadehdehn Siohwa kan letelet ni arail wenihmwo. Sounkadehde ko esehda me peneineio wiahda wekidekla tohto pwehki ar kin kohla ni website wet. Irail kihsang arail pelipel kan, tiati kan ni paliwararail kan, kesehla kilel kan en pelien lamalam, sohla iang kasarawi rahnen kasarawi kan, sohla kilang kasdo me sohte konehng kan, oh re wia soahng pwukat koaros mwohn pwopwoudo ara tuhwong Sounkadehde kan! Ni ahnsou me se ntingihada duwen met, pwopwoudo oh emen neira seri ko wialahr sounkalohk me saikinte papidais oh pwopwoudo medemedewe ira en papidaisla ni ahnsou keren.
Se alehdi kaping tohto ong pil ehu mehn sawas kaselel: JW Broadcasting. Prokram wet me kin wiawi ehuehu sounpwong miehier ni lokaia daulih 70, oh miehte ekei lokaia kan pahn kereniong kawehwehdi. Peneinei tohto kin kilang kasdo pwukat erein arail Kaudok en Peneinei ni soutik kan. Emen brother koasoia, “Ehdin sapwellimen Siohwa pwihn eh wia soangen laud wet; ahpw, ehdin at pehm me se uhdahn karanihala irail kan nan at poasen kaun!”
Mihting tohrohr kan kin wia ahnsou kaperen ong sapwellimen Siohwa aramas akan, ahpw mehlel kasansaldahn soahng kan me wiawi erein pahr en kalohk 2015. Prokram en mihting tohrohro kasalehda kisin kasdo 42 oh mahlen kan, pil iangahki ngilen keseng kaselel weneu me kin wiawi mwohn ehuehu tepidahn mihting. Me pid duwen prokramo, emen brother koahiek tehkada oh nda, “E mwomwen me koaros me iang towehda mihting tohrohro sohte men mwekidsang nan dewerail kan, pwehki irail sohte men katihasang mehkot erein mihtingo.” Emen misineri koasoia duwen mihting tohrohr en pahr nekiero, “Kisin kasdo kan kalaudehla ei kamehlele padahk mehlel oh Wehio.”
Siohwa pil ketin kapaiahkinkitailda ekei koul kapw en Wehio kan erein pahr nekiero. Ehu pwopwoud ntingihedi: “Koul kapw kan kin duwehte Siohwa eh ketin pwoaleikihtdi. Koul pwukat kin kansenamwahwihala kiht pak tohto ni ahnsou kansensuwed kan.” Atail mihting tohrohr kan kin katamankihong kitail uwen limpoak oh doadoahk laud en irail sounkeseng kan oh sounkoul kan ar kin wiliankitaildi koaros oh kalaudehla kaping me kin kowohng Siohwa!
Amwail mwomwohdiso kin doadoahngki mwahu mehn kadahr me pwuhk kan mi loale ong kalohk ong wehipokon? Ia uwen wiepe wet eh wia kapai ehu ong pweidahn doadoahk en kalohk! Ekei aramas me kin kousoan nan kehl kan de apartment lapala kan ehdin arail kin rong padahk mehlel. Oh aramas tohto, iangahki irail Sounkadehde kan me wereilahr sohla patehng mwomwohdiso, pil kin alehdi sawas ong arail nanpwungmwahu rehn Siohwa sang ni wiepen kalohk wet. Nan January 2015, ohl emen nan South Korea kohla ni ehu mehn kadahr me pwuhk kan mi loale. E kawehwehda me e tepidahr medemedewe duwen soahng kan me kin pidada Koht. Ih eri tepida onopki Paipel. Nan February, ehdin eh iang towehda mihting en mwomwohdiso; Nan March, e uhdihsang simoak sika. Nan April, e mwemweitla nan ohpis en sounkadehdehn kan nan South Korea, oh e pousehlahte kakairada eh nanpwungmwahu rehn Siohwa. Met ehu mehkot me wiawi nanpwungen soahng tohto me pweida nan kalohk ong wehipokon me se alehdier nan poasen kaun.
Se kin kapakapki me ire kan me kitail sukuhlki nan mihting tohrohr en pahr nekiero pahn kamwakid me tohto me kin kehlail papah Siohwa mahso en pwurodohng pahn limen Siohwa mwohn eh pahn sohla ahnsou! Se kangoange kumwail koaros en kahlemengih Siohwa ni amwail pahn kasamwo irail kan me pwurodo ni limpoak.—Esek. 34:16.
Siohwa uhdahn ketin kapaia sapwellime aramas akan erein pahr en kalohk nekiero. Dahme kitail pil kak kasikasik? Kitail anahne awih oh kilang. Ni ahnsou wet, se men kumwail en ese me kiht Pwihn me Kin Apwalih Mwomwohdiso nan Sampah Pwon uhdahn poakepoake kumwail koaros oh se kin ahnsou koaros kapakapkin kumwail.
Riamwail kan,
Pwihn me Kin Apwalih Mwomwohdiso en Sounkadehdehn Siohwa kan nan Sampah Pwon