“Pwoson Sises”—En Pwoson Sises Kin Itar ong Komourla?
Paipel sapengki
Kristian kan kin kamehlele me Sises ketin pwoukihla dipen aramas akan. (1 Piter 3:18) Ahpw en komourla kin pidada laudsang ihte kamehlele me Sises iei Sounkomour. Ngehn suwed kan ese me Sises iei “Sapwellimen Kohto” ahpw irail pahn kasohrala, kaidehn komourla.—Luk 4:41; Sud 6.
Dahme I kak wia pwe ien komourla?
Ke anahne kamehlele me Sises ketin meirongkihla sapwellime mour ong dipatail kan. (Wiewia 16:30, 31; 1 Sohn 2:2) Met kin iangahki en kamehlele me Sises uhdahn mie oh soahng koaros me Paipel mahsanih duwen ih kin pwung.
Sukuhlki dahme Paipel uhdahn padahngki. (2 Timoty 3:15) Paipel mahsanih me Pohl oh Sailas ndaiong sounsilepen imwetengo: “Pwoson Kaun Sises, a kowe oh omw peneinei koaros pahn mourla.” Eri mwurin mwo ira tepida padahkihong sounsilepen imwetengo “mahsen en Siohwa.”a (Wiewia 16:31, 32) Met kasalehda me sounsilepen imwetengo anahne wehwehki tepin padahk en Mahsen en Koht pwehn kak uhdahn pwoson Sises. E anahne esehla loalokong pwung me poahsoankihda Paipel.—1 Timoty 2:3, 4.
Koluhla. (Wiewia 3:19) Ke pil anahne koluhla de pahtoukihla soahng sapwung kan me ke kin wia de medewe mahso. Meteikan pahn kak kilang me ke koluhlahr pwe ke uhdihsangehr wia soahng kan me Koht sohte kin ketin kupwurki oh kin uhd wia “soahng kan me kasalehda koluhla.”—Wiewia 26:20.
Papidaisla. (Madiu 28:19) Sises mahsanih me irail kan me wiahla sapwellime tohnpadahk pahn papidaisla. Sounsilepen imwetengo me kitail koasoiapene mwoweo papidaisla. (Wiewia 16:33) Pil duwehte, mwurin Piter eh padahkihong lapalahn pokon ehu me mehlel me pid duwen Sises, “irail ko me kamehlele eh koasoi ahpw papidaisla.”—Wiewia 2:40, 41.
Peikiong sapwellimen Sises kaweid. (Ipru 5:9) Irail me “kapwaiada mehkoaros” me Sises ketin kehkehlingki kin kasalehda nan arail mour me irail wia sapwellime tohnpadahk. (Madiu 28:20) Irail wiahla soangen aramas kei me kin “peikiong mahseno ahnsou koaros” ahpw kaidehn “kin rongorongete.”—Seims 1:22.
Dadaurete lel ni imwi. (Mark 13:13) Sapwellimen Sises tohnpadahk kan anahne kin “dadaurete” pwehn komourla. (Ipru 10:36) Karasepe, wahnpoaron Pohl kin tehk kanaiehng en kin peikiong soahng koaros me Sises kin ketin kaweidki oh e kin ahnsou koaros loalopwoat ong Koht oh dadaurete sang ni rahn me e wiahla Kristian men lao lel eh mehla.—1 Korint 9:27.
A ia duwen “Kapakap en me Dipan Men”?
Nan ekei pelien lamalam, aramas kin kosoaia duwen kapakap kan me duwehte “Kapakap en me Dipan Men” oh “Kapakap en Komourla.” Aramas me kin wia soangen kapakap pwukat kin pohnese diparail kan oh kasalehda arail pwoson me Sises ketin pwoukihla diparail kan. Irail pil kin peki Sises en ketilong nan mohngiongirail de arail mour. Ahpw Paipel sohte kin kasalehda de pil kangoange kitail en wia “Kapakap en me Dipan men.”
Ekei aramas kin medewe me mwurin arail kin pwurupwurehng nda lepin lokaia kan en “Kapakap en me Dipan Men,” re pahn komourla. Ahpw sohte kapakap ehu kak uhdahn komourala aramas emen. Nin duwen aramas soh unsek kei, kitail kin pousehlahte wiahda sapwung kan. (1 Sohn 1:8) Ihme kahrehda Sises ketin padahkihong sapwellime tohnpadahk kan ren kaukaule kapakapki mahkpen diparail kan. (Luk 11:2, 4) Patehng met, ekei Kristian kan me ahneki koapworopwor en mour kohkohlahte luhssang koapworopwor wet pwehki re sohpeisang de sohla papah Koht.—Ipru 6:4-6; 2 Piter 2:20, 21.
Ia wasa “Kapakap en me Dipan Men” tepisang ie?
Soupoad kan sohte kin pwungkipene ia wasa “Kapakap en me Dipan Men” tepisang ie. Ekei nda me tiahko tepida kadoadoahk erein ahnsou me pelien lamalam en Prohs wiawihda. Ekei kamehlele me aramas akan tepida wia “Kapakap en me Dipan Men” erein ahnsou me pelien lamalam kapw kan ahpwtehn tepida nan pahr 1700 oh 1800. Sohte lipilipil ia wasa e tepisang ie, Paipel sohte kin utung tiahk wet—ni mehlelo e sohte pwungiong dahme Paipel padahngki.
a Siohwa iei mwaren Koht me sansalda nan Paipel.