Soangen Elen Madamadau Dah Ke Kin Kasalehda?

“Kalahngan en Kaun Sises Krais en ieiang elen madamadau me kumwail kin kasalehda.”​—PAIL. 25, NW.

KE KAK SAPENG?

Dahme kahrehda kitail men medewe elen madamadau me kitail kin kasalehda?

Soangen elen madamadau dah kitail en soikala? Ia duwen atail kak wia met?

Dahme kitail kak wia pwehn kasalehda elen madamadau mwahu nan mwomwohdiso?

1. Nan nah kisinlikou ko, dahme Pohl koasoiaiong mwomwohdiso ko pak tohto?

NAN nah kisinlikou ko ong tepin Kristian ko, Pohl koasoia pak tohto me e koapworopworki me Koht oh Krais pahn ketin pwungki elen madamadau me mwomwohdiso ko kin kasalehda. Karasepe, e ntingkihlahng mehn Kalesia ko: “Riei ko, kalahngan en atail Kaun Sises Krais en ieiang elen madamadau me kumwail kin kasalehda. Amen.” (Kal. 6:18, NW) Soangen elen madamadau dah me Pohl kangoangehki Kristian ko ren ahneki?

2, 3. (a) Soangen elen madamadau dah me Pohl ekei pak kangoangehki Kristian ko ren ahneki? (b) Peidek dah kan kitail en idek rehtail duwen atail elen madamadau?

² Atail elen madamadau kin kahrehiong kitail en nda de wia soahng kan. Emen aramas kakete ahneki soangen madamadau me kin kahrehiong en meleilei, nsenohki meteikan, kadek oh kin kasalehda mahk. Paipel mahsanih me e mwahu en “kadek oh meleilei” oh “kanengamah” me iei en kaunda atail pepehm. (1 Pit. 3:4; Lep. Pad. 17:27) Emen aramas kakete ahneki soangen madamadau me kin kahrehda e kin nda soahng kamedek kan ong meteikan de kahrehiong en nohn kesempwalki mwohni. E pahn kakete keh nsensuwedla de e kakete sohte perenki emen en ndaiong dahme e pahn wia. Ekei kin ahneki madamadau me kahrehda ren ahneki madamadau samin de ren uhwongada Koht.

³ Pohl kin kangoange rie Kristian ko ren kahlemengih Krais oh ahneki soangen madamadau me kin kaperenda kupwuren Koht. (2 Tim. 4:22; wadek Kolose 3:9-12.) Rahnpwukat, e kin mwahu en pein idek rehtail: “Soangen elen madamadau dah me I kin kasalehda? Ia duwen ei kak kamwahwihala elen ei madamadau pwehn kak kaperenda kupwuren Koht? Ia duwen ei kak kangoange meteikan nan mwomwohdiso pwe ren kak ahneki madamadau me kin kaperenda kupwuren Koht?” Karasepe, nan mwetuwel en rohs lingan kan, lingan en ehuehu wahnrohs ko kin kahrehda mwetuwelo pwon en lingan. Ia duwe, kitail duwehte wahnrohs ko? Kitail kin sewese mwomwohdiso pwon en linganla? Kitail anahne nantihong wia met. Kitail tehk ia duwen atail kak kasalehda elen madamadau me kin kaperenda kupwuren Koht.

SOIKALA “ELEN MADAMADAU EN SAMPAH”

4. Dahkot “elen madamadau en sampah”?

⁴ Paipel padahkihong kitail: “Kitail kin ale, kaidehn elen madamadau en sampah, ahpw manaman me sang rehn Koht.” (1 Kor. 2:12, NW) Dahkot “elen madamadau en sampah”? E duwehte elen madamadau me kileldi nan Episos 2:2, (NW) me mahsanih: “Kumwail kin weweid loale ahnsowo nin duwen ahl suwed en koasoandi en sampah wet, nin duwen kaun me ahneki manaman en nan wehwe, elen madamadau me met kin kamwakamwakid seri en sapeik kan.” “Elen madamadau en sampah” iei mwomwen madamadau en aramas en sampah. Duwehte kisinieng, e kin kapilkitailpene. Karasepe, me tohto rahnpwukat kin ahneki soangen madamadau me duwehte, ‘Sohte emen pahn ndahng ie dahme I pahn wia!’ de ‘Ke anahne doare pein omw pwung!’ Irail pwukat iei “seri en sapeik kan” en ahn Sehdan sampah.

5. Soangen madamadau sapwung dah me ekei nan Israel kasalehda?

⁵ Aramas kin ahneki soangen madamadau wet sangete mahs. Ni mwehin Moseso, Kora uhwongada irail ko me ahneki manaman nan Israel. E uhdahn uhwong Aaron oh nah pwutak ko me ahneki pwukoa en papah nin duwen samworo kei. Mwein Kora tehkada arail soh unsek. De ele e medewe me Moses kihong irail pwukoa tohrohr kei pwehki re peneinei. Sohte lipilipil dahme Kora ele medewe, e sansal me e sohla medewe soahng kan nin duwen Siohwa eh kin ketin wia. Kora kasalehda me e sohte wauneki ohl akan me Siohwa ketin pilada ni eh nda: “Kumwa nohn daulihala!” Ih eri pil nda: “Dahme komwi, Moses, kin pein kasapwilkomwihda pohn sapwellimen KAUN-O aramas akan?” (Nemp. 16:3) Ni soangen ahlohte, Dadan oh Apiram kaulimki Moses oh ndahng me e kin songosong en kaunirailda. Ni Moses eh nda ren tuhpene, re sapengki: “Se sohte pahn kohwei!” (Nemp. 16:12-14) E sansal me Siohwa sohte ketin kupwurki arail wiewia en uhwong oh e ketin kemeirailla koaros.—Nemp. 16:28-35.

6. Ia duwen ekei tepin Kristian ko arail kasalehda madamadau sapwung? Dahme kahrehda re ele medewe met?

⁶ Ekei tepin Kristian ko tepida “mwamwahliki manaman en Koht.” Re sohte kasalehda wahu ong irail ko me ahneki manaman nan mwomwohdiso sang ni arail kin uhwong irail. (Sud 8) Ohl pwukat ele medewe me re konehng ahneki pwukoa tohto. Oh re pil kin song en kamwakid meteikan ren sohte kasalehda wahu ong irail ko me ale manaman sang Koht oh me kin wia uwen arail kak pwehn papah mwomwohdiso.​—Wadek 3 Sohn 9, 10.

7. Madamadau dah me kitail anahne kanahieng en dehr ahneki?

⁷ Madamadau wet sohte konehng wiawi nan mwomwohdiso, kahrehda koaros anahne kanahieng en dehr tepida ahneki soangen madamadau wet. Elder kan sohte unsek, duwehte ohl mah ko ni mwehin Moseso oh ni mwehin wahnpoaron Sohn. Ele elder kan kak wiahda sapwung kan me kin kansensuwedih kitail. Ma met wiawihong kitail, kitail en dehr alasang madamadau en sampah oh nda: “Met sapwung, e anahne kapwungpwungla!” de “Mehkot anahne wiawihong brother menet”! Kitail anahne tamataman me Siohwa kak ketin pilada en ketin pohnsehsehla kisin sapwung kan me elder men ele wiahda. Ia duwe, kitail kak wia soahngohte? Ekei me kin wiahda dihp laud sohte kin perenki mehkot duwen elder kan me koasoandi en sewese irail. Kahrehda re kin kahng tuhwong elder ko. Re duwehte aramas soumwahu men me kin kahng ale sawas me pahn kamwahwihala eh soumwahwo pwehki mie mehkot duwen toahkteo me e sohte perenki.

8. Iren Paipel dah kan kak sewese kitail en ahneki madamadau pwung duwen elder kan nan mwomwohdiso?

⁸ Kitail kak soikala soangen madamadauo ma kitail kin tamataman me Sises “ketiki nin lime palimaun usu isuh.” “Usu” ko wehwehki elder keidi kan, ahpw dahme Paipel mahsanih duwen irail pil dokedoke elder koaros nan mwomwohdiso kan. Sises kak ketin doadoahngki “usu” ko ni ahl sohte lipilipil me e kupwurki. (Kaud. 1:16, 20) Nin duwen Tapwin mwomwohdiso, Sises uhdahn mwahngih dahme wiewiawi nanpwungen elder kan. Silangi “likamwete mpwulen kisiniei” oh e mwahngih soahng koaros. Kahrehda ma elder men anahne kaweid, Sises pahn ketin tehk mwahu me eldero pahn ale kaweid ni ahnsou oh ahl me konehng. (Kaud. 1:14) Lao Sises pahn ketin wia met, kitail anahne wauneki elder kan me kin mi “nin lime palimaun.” Pohl ntingihedi: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih [“kumwail,” NW]; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.”​—Ipru 13:17.

9. (a) Madamadau dah me Kristian men kakete kasalehda ma e ale kaweid? (b) Dahme keieu mwahu kitail en wia ma kitail kin ale kaweid?

⁹ Ma elder kan kin kaweid emen de kihsang eh pwukoa kan, aramas menet kak kasalehda ma eh madamadau mwahu de suwed. Emen brother pwulopwul ni elen kadek ale kaweid sang elder kan pwehki e kin mwadongki video game kan me kin kasalehda tiahk lemei. E sohte pwungki kaweido, oh pwehki e sohte kin idawehn kaweid kan en Paipel ong sounsawas kan, e sohla kak wia emen sounsawas. (Lep. Pad. 6:16-19; 1 Tim. 3:8-10) Mwurin mwo, brothero tepida ndaiong meteikan me e sohte pwungki dahme elder ko koasoanehdi. E pil kadarala kisinlikou tohto ong ohpis en Sounkadehdehn Siohwa kan oh e nda mehkot suwed duwen elder ko. E pil song en kahrehiong meteikan nan eh mwomwohdiso ren pil iang kadarala kisinlikou ni ohpis en Sounkadehdehn Siohwa kan. Ahpw ni mehlel, ma kitail kin song en kihda kahrepe ong atail wiewia sapwung kan, kitail kin kahrehiong meleilei en mwomwohdiso nan keper oh met sohte kin sewese kitail. Ma kitail kin ale kaweid, e pahn uhdahn mwahu kitail en medewe me met wia ahnsou mwahu en pohnese atail luwet kan oh kapwaiada kaweid kan.​—Wadek Koulen Kedepwidepw kan 3:28, 29.

10. (a) Dahme Seims 3:16-18 kak padahkihong kitail duwen madamadau pwung oh madamadau sapwung? (b) Dahme kin imwikihla atail kin mwekid pahrekiong erpit me Koht ketikihda?

¹⁰ Seims 3:16-18 padahkihong kitail dahkot madamadau pwung oh dahkot madamadau sapwung me aramas emen kin kasalehda nan mwomwohdiso. E mahsanih: “Pwe wasa me peirin oh mehwo kin mie, iei wasao me pingiping oh soangen suwed koaros pil kin mi ie. A erpit me kin sang powe, mwohn mehkoaros me mwakelekel, me pil kansenamwahu, kapohl, oh kompoake, me kin diren kalahngan oh kin kahrehda wiewia mwahu tohtohie; e sohte kin lipilipilki aramas, e sohte kin mwalaun. Pwung, iei wahn wiewia mwahu me irail kan me kin wia doadoahk en kamwahu kin kamwerehdi ni popohl.” Ma kitail kin mwekid pahrekiong erpit me Koht ketikihda, kitail pahn alasang sapwellime irair kan. Ni ahl wet, kitail kin kangoange emenemen en kasalehda elen madamadau pwung oh e pahn mie popohl nan mwomwohdiso.

KASALEHDA WAHU NAN MWOMWOHDISO

11. (a) Ma kitail ahneki madamadau pwung, dahme kitail sohte pahn wia? (b) Dahme kitail sukuhlki sang ahn Depit mehn kahlemeng?

¹¹ Kitail anahne tamataman me Siohwa ketin kupwurki elder kan en “wia silepen mwomwohdisohn Koht.” (Wiewia 20:28; 1 Pit. 5:2) Kitail anahne wauneki sapwellimen Koht ahl akan en wia soahng kan sohte lipilipil ma kitail elder kei de soh. Ma kitail ahneki madamadau pwung, kitail sohte pahn nohn kesempwalki ahneki manaman oh pwukoa. Ni ahnsou me Nanmwarki Sohl tepida medewe me Depit kakete wiahla nanmwarki, eh tepida “peiriniong Depit me inenen laud.” (1 Sam. 18:9) Nanmwarkio ahneki madamadau sapwung oh e pil men kemehla Depit. Kitail dehr duwehte Sohl me kin pwunodki laud en ahneki manaman, ahpw e mwahu kitail en duwehte Depit. Mendahki e kin lokolongki koasoandi sapwung, Depit kin ahnsou koaros kasalehda wahu ong irail me Koht ketikihong irail manaman.​—Wadek 1 Samuel 26:23.

12. Dahme kitail kak wia pwehn sewese kolokol minimin en mwomwohdiso?

¹² Pwehki kitail koaros ahneki madamadau wekpeseng, ekei pak kitail kin kak kansensuwedihala emen. Met pil kak wiawi nanpwungen elder kan. Kaweid en Paipel kin kasalehiong kitail soangen madamadau dah kitail en ahneki: “Kumwail wahupene nanpwungamwail” oh “Kumwail dehr pil akloalokong.” (Rom 12:10, 16) Met wehwehki kitail en dehr ngihtehtehki me kitail pwung, ahpw kitail anahne pohnese me e kin kalapw mie ahl pwung tohto. Ma kitail kin wia uwen atail kak en wehwehki madamadau en meteikan, kitail kak sewese kolokol minimin en mwomwohdiso.​—Pil. 4:5.

13. Dahme kitail anahne wia mwurin atail kasalehda atail madamadau? Karasaras dahieu nan Paipel me kasalehda dahme kitail anahne wia?

¹³ Ia duwe, met wehwehki me e sapwung kitail en kasalehda atail madamadau ma kitail medewe me mie mehkot nan mwomwohdiso anahne kapwungpwungla? Soh. Ni mwehin tepin Kristian ko, mie mehkot me tohto tohnmwomwohdiso sohte pwungkipene. Brother ko “koasoanehdi me Pohl oh Parnapas oh ekei sang Andiok en kohla Serusalem oh tuhkihong wahnpoaron ko oh me mah kan duwen ire wet.” (Wiewia 15:2) Ni mehlel, emenemen brother ko ahneki madamadau duwen dahme pwung en wiawi. Ahpw mwurin emenemen irail ar nda dahme re medewe oh re wiahda pilipil ehu sang sawas en sapwellimen Koht manaman, brother ko sohte pousehlahte koasoia pein arail madamadau. Mwurin mwomwohdiso ko alehdi kisinlikouo iangahki pilipilo, “re ahpw perenkihda kowahlap mahsen en peneu kan” oh re “kehlaillahr nan pwoson.” (Wiewia 15:31; 16:4, 5) Pil duwehte rahnwet, mwurin atail kin padahkihong elder kan mehkot me kin kapwunodei kitail, kitail anahne likih me re pahn medewe mwahu dahme kitail ndaho oh koasoanehdi ma mie mehkot anahne wiawi.

KASALEHDA MADAMADAU PWUNG NAN OMW NANPWUNGMWAHU REHN METEIKAN

14. Ia duwen atail kak kasalehda madamadau pwung nan atail nanpwungmwahu rehn meteikan?

¹⁴ Mie ahnsou mwahu tohto kitail en kasalehda madamadau pwung nan atail nanpwungmwahu rehn meteikan. Karasepe, emenemen kitail kak wiahda dahme uhdahn mwahu ma kitail kin mwadang en mahk ni ahnsou me meteikan kin kansensuwedih kitail. Mahsen en Koht padahkihong kitail: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.” (Kol. 3:13) Lepin lokaia pwukat “ni emen rehmwail eh pahn kin kaulime emen” kasalehda me ekei pak kitail ele kin ahneki kahrepe mwahu en kaulime meteikan. Kitail dehr nohn pwunodki mehkot tikitik me kitail sohte perenki duwen emen en kansensuwedih kitail. Met kak kauwehla popohl en mwomwohdiso. Ahpw kitail anahne kahlemengih Siohwa sang ni atail pahn kin mahkohng riatail Kristian kan oh pousehlahte iang irail papah Koht.

15. (a) Dahme kitail kak sukuhlki sang Sohp duwen mahk? (b) Ia duwen kapakap eh kak sewese kitail en kak kasalehda madamadau pwung?

¹⁵ Kitail kak sukuhlki sang Sohp duwen mahk. Kompoakepah ohl silimen ko anahne kansenamwahwih Sohp, ahpw re ndaiong Sohp soahng kamedek tohto. Mendahki met, Sohp mahkohng irail. Dahme sewese ih en wia met? Sohp “kapakapki kompoakepah silimeno.” (Sohp 16:2; 42:10) Ni atail kin kapakapki meteikan, ele atail pepehm ong irail kin wekila. Ni atail kin kapakapki riatail Kristian kan, e kin mengei en ahneki soangen pepehmohte me Sises sapwellimanki ong irail. (Sohn 13:34, 35) Kitail pil anahne kapakapki sapwellimen Koht manaman. (Luk 11:13) Sapwellimen Koht manaman pahn sewese kitail en kasalehda irair en Kristian kan nan atail nanpwungmwahu rehn meteikan.​—Wadek Kalesia 5:22, 23.

MWOMWOHDISO PWON KIN PAIEKIDA OMW ELEN MADAMADAU MWAHU

16, 17. Soangen elen madamadau dah me ke men kasalehda?

¹⁶ Ni emenemen kitail eh kin nantihong laud pwehn kolokol madamadau pwung, mwomwohdiso pwon kin paiekihda. Ele iren onop wet seweseiuk ken koasoanehdi me ke kak kamwahwihala omw elen madamadau oh ken kin kangoange laud meteikan. Ma ei, mweidohng Mahsen en Koht en kasalehiong uhk ia duwen omw kak wiahda wekidekla kan. (Ipru 4:12) Pohl me wia mehn kahlemeng mwahu nan mwomwohdiso, nda: “Duwen ei pehm, nan kapehdiet me mwakelekel, ahpw met sohte wehwehki me sohte uhdahn dipei mwohn silangin Koht. Kaun-o iei ihete me kin ketin kadeikiehda.”​—1 Kor. 4:4.

¹⁷ Kitail koaros kak kangoange emenemen en kolokol madamadau pwung nan mwomwohdiso. Kitail kak wia met sang atail alasang sapwellimen Koht irair kaselel kan oh dehr ngihtehtehki me kitail pwung de dehr medemedewe me kitail warohng ale pwukoa tohto. Ma kitail kin mwadang mahkohng meteikan oh ahneki madamadau pwung duwen irail, kitail pahn kolokol meleilei rehn riatail Kristian kan. (Pil. 4:8) Kitail kak kamehlele me ma kitail kapwaiada soahng pwukat koaros, elen madamadau me kitail kin kasalehda pahn kaperenda Siohwa oh Sises.​—Pail. 25, NW.

[Kilel nan pali 20]

Dahme kitail anahne tamataman ni ahnsou me kitail kin ale kaweid sang elder kan?