IREN MEHN KASUKUHL 08
Ke Kak Kompoakepahnki Siohwa
Siohwa ketin kupwurki ken esehla mwahu duwen ih. Dahme kahrehda? E ketin koapworopworki me uwen laud en omw esehla ih, sapwellime ahl akan oh kupwure, ih uwen laud en omw pahn men wiahla kompoakepah. Ahpw, ke kak uhdahn wiahla kompoakepahn Koht? (Wadek Melkahka 25:14.) Dahme ke kak wia pwe ken wiahla kompoakepah? Paipel kin sapengala peidek pwukat oh kin kasalehda kahrepen ken wiahki Siohwa kompoakepahmw me keieu kesempwal.
1. Dahme Siohwa ketin lukeiuk ken wia?
“Kumwail karanihala Koht, oh e pahn ketin karanihala kumwail.” (Seims 4:8) Ia wehwehn met? Siohwa kin ketin lukeiuk ken wiahla kompoakepah. Mweinele ekei kin medewe me e apwal en kompoakepahnkihla emen me re sohte kak kilang, ahpw mehlel wiahla kompoakepahn Koht. Ahpw nan sapwellime Mahsen, Paipel, Siohwa kin ketin kasalehda mehkoaros me pid duwen ih pwe kitail en kak karanihala ih. Ni atail kin wadek sapwellimen Koht mahsen ong kitail nan Paipel, atail nanpwungmwahu rehn Siohwa kin kekehlailla mendahki atail sohte kak kilang ih.
2. Dahme kahrehda ke kak wiahki Siohwa kompoakepahmw me keieu mwahu?
Sohte me poakohng uhk laudsang Siohwa. E kin ketin kupwurki ken peren oh sohpeiong ih ahnsou koaros me ke anahne sawas. Ke kak ‘patohwanohng ih omw pwunod akan koaros, pwehki e kin ketin nsenohkin uhk.’ (1 Piter 5:7) Ahnsou koaros Siohwa kin ketin onopada pwehn sewese, kansenamwahwih oh karonge kompoakepah kan.—Wadek Melkahka 94:18, 19.
3. Dahme Siohwa kin ketin kupwurki kompoakepah kan ren wia?
Siohwa kin ketin poakohng aramas koaros, “ahpw e kin ketin kompoakepahnki me pwung kan.” (Lepin Padahk 3:32) Siohwa kin ketin kupwurki kompoakepah kan ren song wia me mwahu oh liksang me suwed. Mweinele ekei kin medewe me re sohte kak wia mehkoaros me Siohwa kupwurki ren wia oh soikala soahng suwed koaros. Ahpw, Siohwa uhdahn ketin mwahngih met. E kin ketin kupwurperenki koaros me kin poakohng Ih ni mehlel oh wia uwen arail kak en kaperenda Ih.—Melkahka 147:11; Wiewia 10:34, 35.
KALAUDEHLA OMW ESE MET
Kalaudehla omw ese ia duwen omw kak kompoakepahnkihla Siohwa, oh kahrepen ken wiahki Siohwa Kompoakepahmw me keieu mwahu.
4. Eipraam wia kompoakepahn Siohwa
Koasoipen Eipraam (me pil adaneki Eipram) nan Paipel sewese kitail en wehwehki wehwehn wia kompoakepahn Koht. Wadek duwen Eipraam nan Senesis 12:1-4. Mwuri koasoiapene peidek pwukat:
Dahme Siohwa ketin mahsanihong Eipraam en wia?
Dahme Siohwa ketin inoukihong ih?
Eipraam peikiong dahme Siohwa ketin mahsanihong en wia?
5. Dahme Siohwa ketin mahsanihong kompoakepah kan ren wia
Kitail kin kalapw kasik soahng kei sang kompoakepatail kan.
Ia ekei soahng kan me ke men kompoakepahmw kan ren wiahiong uhk?
Wadek 1 Sohn 5:3, oh mwuri koasoiapene peidek wet:
Dahme Siohwa ketin kupwurki kompoakepah kan ren wia?
Mweinele kitail anahne wekidala atail wiewia de soangen aramas dah kitail, pwe kitail en kak peikiong Siohwa. Wadek Aiseia 48:17, 18, oh mwuri koasoiapene peidek wet:
Dahme kahrehda Siohwa ketin mahsanihong kompoakepah kan ren peikiong sapwellime kehkehlik kan?
Kompoakepahmw mwahu men pahn katamankihong uhk soahng kan me kak pereiuk oh wia kamwahupomw. Siohwa pil kin ketin wiahiong met kompoakepah kan
6. Dahme Siohwa kin ketin wiahiong kompoakepah kan
Siohwa kin ketin sewese kompoakepah kan ni ar lelohng kahpwal kan. Kilang KISIN KASDO, oh mwuri koasoiapene peidek wet.
Ia duwen Siohwa eh ketin sewese lih menet ni eh kin mwoaros oh pwunod?
Wadek Aiseia 41:10, 13, oh mwuri koasoiapene peidek pwukat:
Dahme Siohwa ketin inoukihda me e pahn wiahiong kompoakepah kan koaros?
Ke medewe me Siohwa kak ketin wia Kompoakepahmw mwahu men? Dahme kahrehda?
Kompoakepahmw keren kan kin seweseiuk ni ahnsou me ke anahne. Siohwa pil pahn ketin seweseiuk
7. Pwehn kompoakepahnki Siohwa, kitail anahne patohong ih oh rong ih
En kompoakepahnki emen kumwa anahne kin koasoakoasoipene pwe kumwa en karanihala emenemen. Wadek Melkahka 86:6, 11, oh mwuri koasoiapene peidek pwukat:
Ia duwen atail kak koasoakoasoiong Siohwa?
Ia duwen Siohwa eh kin ketin mahseniong kitail?
Kitail kin koasoiong Siohwa ni kapakap; e kin ketin mahseniong kitail sang nan Paipel
EKEI ARAMAS KIN NDA: “Sohte me kak kompoakepahnkihla Koht.”
Mehnia iren Paipel me ke pahn doadoahngki pwehn kasalehda me kitail kak kompoakepahnkihla Siohwa?
DAHME KE SUKUHLKIER
Siohwa ketin kupwurki wiahla Kompoakepahmw, oh e pahn ketin seweseiuk ken karanihala ih.
Kousapahl
Ia duwen Siohwa eh kin ketin sewese kompoakepah kan?
Dahme kahrehda Siohwa kin ketin mahsanihong kompoakepah kan ren peikiong sapwellime kehkehlik kan?
Ke medewe me e nohn apwal en wiahla kompoakepahn Siohwa? Dahme kahrehda, de dahme sohki?
PIL TEHK
Ia kamwahupen omw pahn kompoakepahnkihla Koht?
“Jehovah—A God Worth Knowing” (The Watchtower, February 15, 2003)
Sukuhlki ia duwen omw kak kompoakepahnkihla Koht.
Kilang dahme kahrehda emen lih medewe me eh kompoakepahnkihla Siohwa doarehla eh mour.
Rong me pwulopwul kan ar kasalehda ar pepehm kan duwen Siohwa.