Atail Inou—En Ideidawehn Sapwellimen Siohwa Ahlo
1 Ehu ire kesempwal nan Kapokon en District me oaralap koasoia “Sapwellimen Koht Ahlo” iei inouwo me kitail wiahda ni kaimwseklahn padahko. E tepikihda mahsen pwukat: “Kitail . . . ni mohngiong unsek pwungkihda me sapwellimen Koht ahlo iei elen mour me keieu mwahu.” Tamanda ekei ire kesempwal kan en inouwo me kitail nda, “EHI!”
2 Ih atail inou en kolokolte atail mwakelekel mwohn Siohwa, soh saminkihla sampah. Kitail pahn pousehlahte mwohneki mahs kupwuren Koht nan atail mour. Doadoahngki sapwellimen Mahsen, Paipel, me wia mehn kaweidpatail, kitail sohte pahn salongasang oh kohlahng ni pali maun de pali meing, pwehn kadehdehda me sapwellimen Koht ahlo me keieu ileile sang elen sampah.
3 Sampah kin kalapw mwamwahliki sapwellimen Koht ahlo oh eri kin dolungada imwila suwed me kohsang met. (Seremaia 10:23) Ihme kahrehda kitail anahne en kaukaulehte ale kasukuhl sang rehn atail Sounpadahk Lapalapo, Siohwa, me mahsanih: “Iet ahlo, kumwail idawehn.” (Aiseia 30:21) Sapwellimen Siohwa ahlo, me kileledi nan Pwuhk Sarawi, kin deila ni irair koaros. Pwehn kak idawehn ahl wet, e konehng kitail en isaneki mehkan koaros me Siohwa ketin padahkihongehr kitail.
4 Sapwellimen Siohwa Prokram en Kasukuhl Ileile: Siohwa kin ketin kasukuhlikihong kitail ia uhdahn kahrepen mour oh iaduwen kitail en doadoahngki atail mour ni ahl me keieu mwahu. E kasukuhlikihong kitail iaduwen kitail en kamwahuwiala irair en atail mour ni lamalam, tiahk, oh pali ngehn. E kasukuhlikihong kitail iaduwen kitail en miniminiong riatail Kristian kan, atail peneinei, oh iengetail aramas teikan. E kin ketin wia met ki sapwellime pwuhk, Pwuhk Sarawi, oh ki sapwellime pwihn.
5 Atail mihding en mwomwohdiso kan kin keieu kesempwal ni irair wet. Nindoken atail kin kaukaule towehda oh iang wiewia kan nan mihding limau ko koaros, kitail kin alehda kaiahn loal kan nin duwen sounkalohk kan en rongamwahuwo oh kasukuhl toupahrek ehu nan mouren Kristian. (2 Tim. 3:16, 17) Atail Sounpadahk Lapalapo kin pil pouselahte ketikihda kasukuhl sang powe sang ni kapokon kan. Atail mehn akadei iei en dehr katiasang ehu mihding ma atail roson oh irair kan mweidohng kitail en kak iang towehda.
6 Kitail en pwerisek kaukaule ideidawehn sapwellimen Koht ahlo ni rahn kan me kohkohdo, pwehn wahdo kaping ong Siohwa oh ong katingpatail soutuk!—Aiseia 48:17.