Kaukaule Kekeid Nan Sapwekkimen Siohwa Ahl
“Koapworopworki Siohwa oh kekeid nan sapwellime ahl; e ahpw pahn ketin kawauwihiukala ni omw pahn sohsohki sampah.”—MELKAHKA 37:34, New World Translation.
1, 2. Dahme Nanmwarki Depit anahne wia ma e men kekeid nan sapwellimen Siohwa ahl, oh dahme kitail pil anahne wia nan atail ahnsou?
“KOMW ketin kasalehiong ie ahl me I pahn keid ie.” (Melkahka 143:8) Nan rahnpwukat, Kristian akan kin sang ni mongiongarail kan pwurehng koasoia mahsen pwukat en Nanmwarki Depit. Ni mehlel, re men kaperenda Siohwa oh kekeid nan sapwellime ahl. Met pahn kin wehwehki dah? Ong Depit, met kin wehwehki me e pahn kapwaiada sapwellimen Koht kosonned akan. E pil kin wehwehki me e pahn likih Siohwa oh sohte pahn ehuong wehi teikan. Ehi, e pil wehwehki me, ni lelepek, e pahn papah Siohwa, kaidehn koht akan en mehn mparail kan. Ong Kristian akan, kekeid nan sapwellimen Siohwa ahl kin wehwehki laudsang met.
2 Rahnwet, ma emen pahn kekeid nan sapwellimen Siohwa ahl, e pahn anahne pwoson tomw meirong en Sises Krais, oh kamehlele me Sises iei “me ahl, me mehlel, oh me mour.” (Sohn 3:16; 14:6; Ipru 5:9) E pil kin wehwehki kitail en kapwaiada “kosonned en Krais,” me kin wehwehki limpoakpene, oh kasalehda limpoak keieu ong rien Sises me keidi kan. (Kalesia 6:2; Madiu 25:34-40) Irail akan me kin kekeid nan sapwellimen Siohwa ahl kin poakohng sapwellime kosonned akan. (Melkahka 119:97; Lepin Padahk 4:5, 6) Re pil kin kesempwaliki ahr pwais kaselel en iang doadoahk en kalohk. (Kolose 4:17; 2 Timoty 4:5) Re kin kapakap ahnsou koaros. (Rom 12:12) Oh re kin ‘kanahieng duwen arail mour me irail weweidki.’ (Episos 5:15) Re sohte kin tohnmeteiki ahr kepwehn ni pali ngehn ong pai en sampah de ineng en sampah wet. (Madiu 6:19, 20; 1 Sohn 2:15-17) Ahpw inenen kesempwal en lelepek ong Siohwa oh likih ih. (2 Korint 1:9; 10:5; Episos 4:24) Dahme kahrehda? Pwehki kitail kin mih nan irair ehu me duwehte dahme mehn Israel en mahs kin lelohng.
Kesempwalpen Irairen Likilik oh Lelepek
3. Dahme kahrehda irairen lelepek, pwoson, oh likih Siohwa pahn kak sewese kitail en kekeid nan sapwellimen Siohwa ahl?
3 Wehin Israel iei kisin wehi tikitik ehu me kapilkihpene wehi lemei kan me kin kaudokiong koht likamw akan. (1 Kronikel 16:26) Wehin Israel kelepwte me kin papah Koht mehlel oh soh sansal, oh Siohwa kin kupwurki irail en tiahk mwahu. (Deuderonomi 6:4) Duwehte nan rahn pwukat, ihte aramas rar kei kin kaudokiong Siohwa, oh re kin mour nan sampah ehu me audaudki kereniong aramas wenelik me kin ahneki pelien lamalam oh koasoandi kan me kin weksang arail. Ma kitail iang pwihn en aramas rar pwukat, kitail anahne kaleke kitail sang aramas en sampah pwukat. Iaduwen kitail kak wia met? Met pahn kak sewese kitail ma kitail pahn lelepek ong Siohwa Koht, pwoson ih, oh likih me e pahn kapwaiada sapwellime inou kan. (Ipru 11:6) Met pahn kak sewese kitail en dehr likih dahme sampah kin koapworopworki.—Lepin Padahk 20:22; 1 Timoty 6:17.
4. Dahme kahrehda wehi kan “nan kapehdirail inenen rotorot”?
4 Wahnpoaron Pohl kasansalehda me Kristian akan anahne en weksang sampah ni eh ntinghidi met: “Eri, ni mwaren Kauno, I kehkehlingkihong kumwail: kumwail dehr kin idawehn mouren me rotorot akan, me ar lamalam sohte ekis katepe mie, oh nan kapehdirail inenen rotorot. Re sohte iang ahneki mour me kin sang rehn Koht, pwehki ar mihmi nan rotorot douluhl oh nan ar nan kapehd keptakai.” (Episos 4:17, 18) Sises iei “me marain mehlelo.” (Sohn 1:9) Mehmen me soikala ih de dene me e kin kamehlele Sises ahpw sohte kin peikiong “kosonned en Krais” kin mihmi “nan rotorot douluhl.” Re kin dohsang sapwellimen Siohwa ahl, oh irail sohte kin “ahneki mour me kin sang rehn Koht.” Edetehn irail lemeleme me re loalokong ni mehkan me kin pid sampah, irail me ‘rotorot’ ong ni mehkan me kin pid loalokong me kak kahluwalahng emen en ale mour soutuk, iei Siohwa Koht oh Sises Krais.—Sohn 17:3; 1 Korint 3:19.
5. Edetehn padahk mehlel kin lingalingki marain nin sampah wet, dahme kahrehda aramas tohto sohte kin mwekidki marain wet?
5 Ahpw, padahk mehlel kin wie lingalingki marain nin sampah wet! (Melkahka 43:3; Pilipai 2:15) “Kumwail rong! Loalokong kin liklikwer nanial kan oh nan wasahn netinet kan.” (Lepin Padahk 1:20) Nan pahr samwalahro, Sounkadehdehn Siohwa kan kin iang doadoahk en koasoiaiong mehn mparail kan duwen Siohwa Koht oh Sises Krais, oh re kin doadoahngkihla awa lik samwa ong doadoahk wet. Aramas lop kei mwekidki ahr doadoahk en kalohk. Ahpw, e soh wia mehkot kapwuriamwei me aramas tohto pil sohte mwekidki ahr doadoahk? Soh. Pohl koasoia duwen “nan ar nan kapehd keptakai.” Ekei me keptakai pwehki re kin roporop ong pein irail de irail me kin poakohng mwohni. Ekei kin mihla pahn kaweid sapwung en kaudok likamw de loalokong en sampah. Ekei kin lelohng kahpwal akan nan ahr mour oh met kin kahrehong irail en sohpeisang Koht. Pil ekei aramas kin kahng en kapwaiada sapwellimen Siohwa koasoandi ileile kan. (Sohn 3:20) Ahpw, emen me kin kekeid nan sapwellimen Siohwa ahl kakete solahr nohn nsenohki liksang soahng pwukat me kin kahrehong aramas en sohte kekeid nan sapwellimen Siohwa ahl?
6, 7. Mendahki irail kin kaudokiong Siohwa Koht, ahnsou dah kei me mehn Israel akan pwupwudi, oh pwekida?
6 Met wiaiong mehn Israel kan en mahs, nin duwen me Pohl kasalehda. E ntingihdi: “Eri, mepwukat koaros mihmi ni karasaras ong kitail, pwe kitail dehr kin inangih me suwed kan, duwehte ekei irail, de pwongih dikedik en eni kan, duwehte ekei irail. Duwen Pwuhk Sarawi eh mahsanih, ‘Aramas ako eri mwohdpenehng ar kamadipw, re ahpw sakasakau oh kahkahlek. Kitail dehr nenek, duwehte me ekei irail wiadahr—kahrehda rienen silikid rehrail mehkihla rahnteieu.’”—1 Korint 10:6-8.
7 Keieu, Pohl kin koasoia duwen ni ahnsou me mehn Israel akan kaudokiong kou kohl ni Nahna Sinai. (Eksodus 32:5, 6) Re sapeikiong kosonned akan me kohsang rehn Koht me re inoukihong Koht wihk ehu mwowe me re pahn kapwaiada. (Eksodus 20:4-6; 24:3) Oh, Pohl kin koasoi duwen ni ahnsou me mehn Israel akan iangala serepein kan en mehn Moab oh irail kaudokiong Paal. (Nempe 25:1-9) Pwongih kou pwul kin pidada tiahk suwed akan en ahneki ‘ahnsou peren ehu.’a Dipen nenek pil kin wiawi ni ahnsou me irail kin wia arail kaudok ong Paal. (Kaudiahl 2:14) Dahme kahrehda mehn Israel akan wiahda dihp pwukat? Pwehki re kin mweidong mongiongirail kan en ‘inangih me suwed kan’—pwongih dikedik en eni kan de dipen nenek kan.
8. Dahme kitail kak sukuhliki sang ekspiriens kan en mehn Israel?
8 Pohl koasoia me kitail anahne sukuhliki sang wiewia pwukat. Sukuhliki dah? Kitail sohte kak medemedewe me emen Kristian pahn kak pwongih dikedik en kou kohl de emen koht en mehn Moap kan. Ahpw iaduwen dipen nenek de kamweitada inengendender? Soahng pwukat kin kalapw wiawi nan rahnpwukat, oh ma kitail pahn mweidong ineng suwed pwukat en kekeirada nan mohngiongatail kan, met pahn kak kahrehong kitail en dohsang Siohwa. Imwihlahn met pahn duwehte ma kitail pahn pwongih dikedik en eni kan—kitail pahn dohsang Koht. (Kolose 3:5; Pilipai 3:19.) Ni kaimwiseklahn sapwellimen Pohl mahsen akan, e kangoange rie kan: “Kumwail kadohwaneweisang kumwail tiahk en pwongih dikedik en eni kan.”—1 Korint 10:14.
Mehn Sawas Ong Kitail en Kekeid nan Sapwellimen Koht Ahl
9. (a) Sawas dahieu kitail kin ale pwehn sewese kitail en kekeid nan sapwellimen Siohwa ahl? (b) Ia ehu ahl me kitail kin rong ‘kapitie sang mwuritail’?
9 Ma kitail inengieng en kaukaule kekeid nan sapwellimen Siohwa ahl, kitail pahn ale sawas. Aiseia kohpadaher met: “Ma kumwail pahn salongasang nan ahlo oh kolahng ni palimeing de maun, kumwail pahn rong kapitie sang mwurimwail me mahsanih, “Iet ahlo. kumwail idawehn.” (Aiseia 30:21) Iaduwen ‘pein salengatail kan’ kin rong ‘kapitie sang mwuritail’? Sohte emen aramas nan rahnpwukat me kin rong ngihl ehu me kin kohsang rehn Koht. “Kapitie” en Koht me kin kohdohng kitail me kitail kin karonge kin lelohng kitail ni soangen ahl teieu. Keieu kesempwal, e kin kohsang Pwuhk Sarawi, me kin ntingihdi sapwellimen Koht madamadau kan oh sapwellime wiewia kan rehn aramas akan. Pwehki rahn koaros kitail kin rong padahk kan de koasoi likamw akan sang rehn irail akan “me sohte kin ahneki mour sang rehn Koht,” eri, pwe kitail en kak roson ni pali ngehn, kitail anahne wadek neitail Paipel oh doudouloale ahnsou koaros. Met pahn sewese kitail en liksang “soahng soh katepe kan” oh kitail “kak wia oh koahiekla ni soangen wiewia mwahu koaros.” (Wiewia 14:14, 15; 2 Timoty 3:16, 17) Met pahn kakehle kitail, oh sewese kitail en ‘pweida mwahu wasa koaros me kitail pahn kohla ie.’ (Soshua 1:7, 8) Ihme kahrehda, sapwellimen Siohwa mahsen kin kangoange kitail: “Eri, mwahnakapw akan, kumwail rong ie. Kapwaiada ei lokaia kan, kumwail ahpw pahn perenkihda. Rong kanahieng omw sounpadahk. Ke en loalokongla; dehr mwamwahlkihla.”—Lepin Padahk 8:32, 33.
10. Ia kariau en ahl me kitail kin rong ‘kapitie sang mwuritail’?
10 ‘Kapitie sang mwuritail’ pil kin kohdohng kitail sang rehn irail me wie “ladu lelepek oh loalokong,” me kin kihong kitail “kanatail kisin mwenge ahnsou me konehng.” (Madiu 24:45-47) Ehu ahl me mwenge en pali ngehn kin kohwong kitail iei sang pwuhk kan me kin poahsoanda pohn Paipel, oh nan rahnpwukat mwenge en pali ngehn wet kin reklahr. Karasepe ieu, makisihn en Watchtower kin kamarainih kitail duwen kokohp akan. Nan makisihn wet, kitail ale kangoang en nantiong wia doadoahk en kalohk oh katohnpadahk mendahki aramas tohto sohte perenki rong, oh kitail kin ale kangoang en powehdi kasongosong kan, oh kitail pil ale kangoang en kakairada atail irairen Kristian akan. Kitail kin uhdahn kesempwaliki mwenge en pali ngehn ni ahnsou wet!
11. Kawehwehda kasiluh en ahl me kitail kak rong ‘kapitie sang mwuritail.’
11 Ladu lelepek oh loalokong kin kihong kitail mwenge en pali ngehn nan atail mihding kan. Met kin pidada mihding en mwohmwohdiso kan, kapokon en circuit kan, oh pil kapokon laud kan me kin wiawi pahr koaros. Mie Kristian lelepek men me sohte kin kesempwaliki mihding pwukat? Mihding pwukat kin wia sawas laud ong kitail en kekeid nan sapwellimen Siohwa ahl. Pwehki Kristian tohto kin anahne doadoahk oh sukuhl ni awa tohto oh mih rehn iengarail kan me sohte kin iang ahr pwoson, en kaukaule iang mihding en Kristian kan kin kak sewese emen en kamourala. Mihding kan kin kihong kitail ahnsou mwahu ehu en ‘nsenoh sawaspene ni kasalepen atail limpoak oh atail wiewia mwahu kan.’ (Ipru 10:24) Kitail poakohng riatail kan, oh kitail perenki mihmi rehrail.—Melkahka 133:1.
12. Dahme Sounkadehdehn Siohwa kan kin nantiong en kapwaiada, oh iaduwen re koasoia duwen met?
12 Mpen aramas wenerar nan rahnpwukat kin kekeid nan sapwellime Siohwa ahl, oh irail kin kehlailkihda mwengen ngehn, oh pil aramas rar rar kei kin onop Paipel pwehn sukuhliki en kekeid nan ahlohte. Irail pwukat kin nsensuwedki de luwetkihla me irail me malaulau sang tohnsampah lik kan? Uhdahn soh! Re kin nantiong en kapwaiada de rong ‘kapitie sang mwuritail,’ re kin lelepek kapwaiada kupwuren Siohwa. Pwehn kasalehong wehi pokon ahr ngoangki en kapwaiada met, nan pahr 1998 oh 1999, Kapokon en District oh International wiawi, me oaralap koasoia “Sapwellimen Koht Ahl” oh irail me towehda wiahda inou ehu sang mongiongarail kan me irail pahn kolokol ahr lelepek ong Koht. Met iei audepe kan en inouo.
Inou
13, 14. Soahngen madamadau pwung dahieu me Sounkadehdehn Siohwa kan kin ahneki me kin pid irairen sampah?
13 “Kitail, nin duwen Sounkadehdehn Siohwa kan me pokonpene nan Kapokon en ‘Sapwellimen Koht Ahl’ oh ni mohngiongatail unsek pwungki me sapwellimen Koht ahl iei me keieu mwahu en mourki. Kitail pohnese me pali moron en aramas akan nan rahnpwukat sohte kin kamehlele met. Aramas akan kin song en rapahki elen mour me keieu mwahu sang ni pein ahr madamadau kan, loalokong kan, pelien lamalam kan. Ahpw ma emen pahn, ni mehlel, tehk duwen poadoapoad en aramas oh irairen sampah nan rahnpwukat, e kin kasalehda mwahu dahme ntingihdi nan Pwuhk Sarawi nan Seremaia 10:23, [NW]: ‘Sohte aramas emen me kak kaunda pein eh mour.’
14 “Rahn koaros kitail kin kilang mehn kadehde kan ong mehlelpen mahsen pwukat. Keieu, aramas akan kin mwamwahleki sapwellimen Koht ahl. Aramas akan kin nantiong en wia dahme pein irail lemeleme me pwung. Met kin imwikihla suwed—peneinei kin ohla oh seri kan sohte ahr kaweid kan; noahrok mwohni kin imwikihla aramas en ahneki madamadau soh-katep en mour oh nsensuwed; mwersuwed oh pei me aramas kin mehkihla; pei nanpwungen keinek kan oh mahwen kan me aramas inenen tohto kin mehkihla; oh reklahn wiahda dipen nenek kin kahrehong paralahn soumwahu en dipwisou en kaparaparala. Met iei ekeite kahpwal laud kan me kin kihsang ahn emen peren, popohl oh meleilei.
15, 16. Me pid duwen sapwellimen Koht ahl, ni ahl dahieu me Sounkadehde kan koasoia duwen ahr men kapwaiada met ni inou?
15 “Pwehki aramas akan kin mih pahn irair suwed ehu oh kerendohng ‘mahwen me pahn wiawi ni Rahn Lapalap en Koht, Wasa Lapalahpie,’ iei Armakedon (Kaudiahl 16:14, 16) kerendohr, eri, kitail, Sounkadehdehn Siohwa kan, inoukihda met:
16 “Keieu: Kitail kin kilangwong pein kitail nin duwen sapwellimen Siohwa Koht, oh pein emen emen kitail kin inoukihdahr ni unsek pein atail mour ong Siohwa, oh kitail pahn kolokolte atail pwoson sapwellimen Siohwa sawas ni e ketikihong kitail tomw sang sapwellime Ohl, Sises Krais. Kitail kin nantiong en kekeid nan sapwellimen Koht ahl oh papah ih nin duwen sapwellime Sounkadehde kan oh uhpaiong sapwellime kaunda sang rehn Sises Krais.
17, 18. Dahme Sounkadehdehn Siohwa kan pahn wia me pid koasoandi en tiahk mwakelekel oh pirienpene en Kristian?
17 “Keriau: Kitail pahn nantiong oh tengediong koasoandi en tiahk mwakelekel oh irair en pali ngehn me kapingpe mie nan Paipel. Kitail men liksang kekeid duwehte wehi kan kin kekeid pwe ar lamalam sohte ekis katepe mie. (Episos 4:17-19) Eri, kitail koasoanehdier nan atail madamadau me kitail pahn kolokolte atail mwakelekel mwohn Siohwa oh dehr saminkihla tiahk suwed kan en sampah wet.—Seims 1:27.
18 “Kasiluh: Kitail en kolokol teng atail pilipil me poahsoankihda iren Paipel kan me pid atail pirienpene en Kristian nan sampah pwon. Kitail pahn kolokolte atail sohpoupali en Kristian akan oh dehr utungada wehi kan, oh sohte mweidong pein kitail en lohdi pahn kailok oh liaktohrohr en keinek kan oh wehi kan.
19, 20. (a) Dahme Kristian pahpa oh nohno kan pahn wia? (b) Iaduwen Kristian mehlel kan koaros pahn kaukaule kadehde me pein irail iei sapwellimen Krais tohnpadahk kan?
19 “Kapahieu: Kitail, pahpa oh nohno kan pahn padahkiong neitail seri kan duwen sapwellimen Koht ahl. Kitail pahn wia mehn kahlemeng mwahu nin duwen mouren Kristian, oh met kin pid kaukaule wadek neitail Pwuhk Sarawi, onop rehn atail peneinei, oh mour unsekiong mwomwohdisohn Kristian oh doadoahk en kalohk.
20 “Kelimau: Kitail koaros pahn nantiong en kakairada irair akan me atail Sounkapikada kin sapwellimaniki, oh kitail pil pahn nantiong song en kahlemengih sapwellime wiewia kan nin duwen me Sises wia. (Episos 5:1) Kitail koasoanehdier nan atail madamadau me atail wiewia kan koaros pahn wiawi ni limpoak, pwe met pahn kadehde me kitail iei sapwellimen Krais tohnpadahk kan.—Sohn 13:35.
21-23. Dahme Sounkadehdehn Siohwa kan pahn pousehlahte en wia, oh dahme re kin kamehlele?
21 “Keweneu: Kitail sohte pahn uhdihsang atail kalohki rongamwahu en Wehin Koht, katohnpadahk, oh kitail pahn kaweidkinirailla duwen sapwellimen Koht ahl oh kangoange irail en kalaudehla arail kaiahn kan sang ni mihding en mwomwohdiso kan.—Madiu 24:14; 28:19, 20; Ipru 10:24, 25.
22 “Keisuh: Nin duwen pein emen emen kitail oh nin duwen pwihn en pelien lamalam ehu, kitail pahn nantiong en mwohnki Koht nan atail mour. Ni atail pahn doadoahngki sapwellime Mahsen, Pwuhk Sarawi, pwehn kaweidkin kitail, kitail sohte pahn sohpeila ni pali maun de pali meing, oh met pahn kadehde me sapwellime Koht ahl wie ahl ieu me siksang ahl teikan koaros en sampah wet. Kitail men kekeid nan sapwellimen Koht ahl—ni tengeteng oh lelepek, ni ahnsouwet oh pil ni ahnsou kohkohlahte!
23 “Kitail wiahda inou wet pwehki kitail kin ni unsek likih sapwellimen Siohwa inou me mehmen me kin kapwaiada kupwuren Koht pahn mihmi kohkohlahte. Kitail wiahda inou wet pwe kitail kin kamehlele me mehmen me pahn kapwaiada padahk kan oh kaweid kan en Paipel, met pahn kahrehong soangen mour me keieu mwahu ong kitail nan rahnpwukat oh pil pahn wiahda poahsoan kehlail ong ni ahnsou kohkohdo, pwe kitail pahn kak ale mour me uhdahn mehlel. (1 Timoty 6:19; 2 Timoty 4:7b, 8) Mwohn mehkoaros, kitail wiahda inou wet pwehki kitail kin poakohng Siohwa Koht ki mongiongatail unsek, mouratail unsek, madamadau unsek, oh kehl unsek!
24, 25. Iaduwen aramas akan kin mwekidki inouo me kohwong irail, oh dahme irail akan me kin kekeid nan sapwellimen Siohwa ahl inengieng en wia?
24 “Koaros me iang towehda kapokon wet me kin pwungki en wia inou wet, menlau nda EHI!”
25 Wasahn kapokon epwiki kei nan sampah pwon kin wiahki ehu oh nda ni ngihl laud “EHI!” Sounkadehdehn Siohwa kan sohte kin peikasahlki me re pahn nantiong kekeid nan sapwellimen Siohwa ahl. Re kin likih unsek Siohwa oh pwoson me e pahn kapwaiada sapwellime inou. Sohte lipilipil dahme pahn wiawi, re kin lelepek ong ih. Oh re kin nantiong en kolokolte ahr pwoson en kapwaiada kupwuren Koht.
“Koht Ketin Uhpalihkin Kitail”
26. Ia irairen peren en irail akan me kin kekeid nan sapwellimen Siohwa ahl?
26 Sounkadehdehn Siohwa kan kin tamanda kangoang me kohsang Sounmelkahka: “Koapworopworki Siohwa oh kekeid nan sapwellime ahl; e ahpw pahn ketinkawauwihiukala ni omw pahn sohsohki sampah.” (Melkahka 37:34, NW) Irail pil sohte kin manokehla kangoang me kohsang Pohl: “Ma Koht pahn ketin uhpalihkin kitail, ihs me pahn pelian kitail? Koht sohte ketin kisekoleki Sapwellime Iehros, ahpw e ketin mweidala pwehki kitail koaros! E ketikidohng kitail Sapwellime Iehros—eri, ia duwe, e soh pil pahn ketin kupwur sapankihong kitail mehkoaros?” (Rom 8:31, 32) Ehi, ma kitail kin kekeid nan sapwellimen Siohwa ahl, e pahn “sapankihong kitail soahng koaros pwe kitail en peren.” (1 Timoty 6:17) Sohte ehu wasa me mwahu sang wasa me kitail kin mie—kekeidte nan sapwellimen Siohwa ahl, oh mihmi rehn riatail brother oh sister kan. Pwehki Siohwa kin ieiang kitail, kitail en nantiong kekeidte nan sapwellime ahl oh dadaurete lel ni imwi, oh likih ni unsek me, ni pein sapwellimen Koht ahnsou, kitail pahn kilang sapwellime inou kan koaros pweida ni unsek.—Taitus 1:2.
[Nting tikitik me mi pah]
a Emen sounkawehwe, me kawewehda lepin lokaia pwukat ni lokaiahn Krihk, “ahnsou peren ehu,” kin wehwehki kahlek kan me kin wiawi ni ahnsoun kamadipw en mehn pakan kan, oh e kapataiong met: “Tohto kahlek pwukat kin wiawihda pwehn kainengiada aramas akan en wia dipen nenek.”
Komw Tamanda?
◻ Dahme Kristian men anahne wia pwehn kekeid nan sapwellimen Siohwa ahl?
◻ Dahme kahrehda kitail anahne en kakehlailda atail likih oh lelepek ong Siohwa?
◻ Sawas dahieu mie ni ahnsou me kitail kin kekeid nan sapwellimen Siohwa ahl?
◻ Koasoia ekei ire kesempwal kan me kin pid inou me wiawi nan Kapokon kan en “Sapwellimen Koht Ahl.”
[Kilel kan nan pali 26]
Nan Kapokon en District oh International kan me oaralap koasoia “Sapwellimen Koht Ahl,” inou kesempwal ehu me alahldahr