Ke Pahn Iang Koht Kekeidwei?

“Kitail en iang Koht kekeid ni lamalam aktikitik.”—MAIKA 6:8.

1, 2. Iaduwen pepehm kan en Siohwa eh duwehte pepehm kan en pahpa men me padahkihong seri men duwen alu?

SERI tikitik men me neh kan saikinte kehlail en alu, kapahla peh ko rehn eh pahpa de nohno me onopadahr pwehn koledi ih ni eh wia tepin ah kahk. Met mwomwen mehkot tikitik ehu, ahpw ohng nohno oh papah en serio, e wia mehkot kesempwal ehu, ahnsou ehu me kihong ira koapworopwor laud ohng ahnsou kohkohdo. Ira kin kasikasik ahnsou me neira serio pahn iang ira alialu, mwurin sounpwong kei de sounpar kan me pahn kohdo. Ira kasikasik ni ahl tohto me ira pahn kihda kaweid oh epwel ohng serio ni ahnsou kohkohdo.

² Siohwa Koht kin ahneki soangen pepehmohte ohng sapwellime seri kan en sampah wet. E mahsanih met ki sapwellime aramas Israel, de Ephraim: “Ahpw ngehi me kaiahnehkihda mehn Israel kan alu. I tupwengeirailda . . . I kaiahnehkiniraildohng rehi kadek oh limpoak.” (Oseia 11:3, 4) Wasaht, Siohwa kin ketin karasahiong pein ih duwehte pahpa limpoak men me kin kasalehda kanengamah ni e kin padahkiong seri men en alu, ele pil pwoalehdi ih ahnsou me e kin pwupwudi. Siohwa, Sahm me keieu mwahu, kin ngoangki en padahkiong kitail duwen alu. E pil kin perenki ieiang kitail ni atail kin wie kekeirada. Nin duwen me atail iren onop kasalehda, kitail kak iang Koht kekeid! (Maika 6:8) Ahpw, ia wehwehn en iang Koht kekeid? Dahme kahrehda kitail anahne wia met? Iaduwen met kak wiawi? Oh soangen kapai dah kan me kin kohsang atail kin iang Koht kekeid? Kitail tehkpene mahs peidek pahieu pwukat.

Ia Wehwehn en Iang Koht Kekeid?

3, 4. (a) Dahme inenen kaselel ni atail pahn medewehiong duwen atail pahn iang Koht kekeidwei? (b) Ia wehwehn en iang Koht kekeidwei?

³ E sansal me aramas men me ahneki paliwar uduk oh nta sohte kak uhdahn iang Siohwa, me wia ngehn ehu, kekeidwei. (Eksodus 33:20; Sohn 4:24) Kahrehda, ni Paipel kin koasoia duwen aramas akan en iang Koht kekeid, e kin doadoahngki lokaiahn karasaras. E kin wia kawehwe kaselel me siksang irair akan en wehi kan oh wiepen tiahk kan oh pil siksang ahnsou en mwehi kan. Pwe iaduwen, mie tohn wasa de mwehi ehu me pahn sohte kak wehwehki dahkot en iang emen kekeid? Lepin lokaia wet kin kasalehda duwen limpoak oh kerenpene, kaidehn? Soangen pepehm wet kin kihong kitail wehwepen en iang Koht kekeid. Ahpw, kitail anahne en oaritik sang met.

⁴ Tamanda ohl lelepek Inok oh Noha. Dahme kahrehda Paipel kin koasoia me irail kin iang Koht kekeid? (Senesis 5:24; 6:9) Nan Paipel, lepin lokaia “en kekeid” kin kalapw wehwehki en idawehn soangen ahl de mour ehu. Inok oh Noha pilada soangen mour ehu me pahrekiong kupwuren Siohwa Koht. Ira kin kasalehda ara weksang sampah me kapilirapene ni ara kin ale oh kapwaiada sapwellimen Siohwa kaweid. Ira kin likih Siohwa. Iaduwen, met wehwehki me Siohwa me kin wiawiong ira ara pilipil kan? Soh. Siohwa kin ketikihong aramas akan ahr saledek en pilipil, oh e kupwurki kitail en doadoahngki kisakis wet ki atail “kehl en pilipil.” (Rom 12:1) Ahpw, ni atail kin wia atail pilipil kan, kitail anahne en kasalehda aktikitik ni atail mweidala sapwellimen Siohwa erpit en kahluwa atail kehl en pilipil. (Lepin Padahk 3:5, 6; Aiseia 55:8, 9) Atail wia met pahn kahrehiong kitail en ieiangete Siohwa ni atail pahn seiseiloak kohwei nan atail mour.

5. Dahme kahrehda Sises mahsanihki duwen emen eh pahn kareireikihla eh mour “cubit ehu”?

⁵ Paipel kin kalap karasahiong mour duwehte seiloak de sapal. Ekei pak, kawehwehpen mour kin wehwehkiong wehwe riau pwukat, ahpw ekei pak e kin karasahiongete. Karasepe ehu, Sises mahsanih: “Ihs rehmwail me kak kareireikihla eh mour cubit ehu pwunupwunodki eh mour?” (Madiu 6:27) Mahsen pwukat kak pil kapwonopwon ohng uhk. Dahme kahrehda Sises mahsanihki duwen emen eh pahn kareireikihla eh mour “cubit ehu,” sosohng ehu me kin sohngki uwen doh en mehkot ohng mour me kin sosohngki ahnsou?a E sansal me Sises kin medewehiong mour duwehte seiloak ehu. Wasaht, e padahkiong kitail me pwunod sohte pahn kak kapataiong pil kahk ehute ohng atail sapal en mour. Eri iaduwen, met wehwehki me sohte mehkot kitail kak wiahiong uwen reirei en atail sapal? Uhdahn soh! Met kitail pahn uhd wia peidek keriau, Dahme kahrehda kitail anahne iang Koht kekeidwei?

Dahme Kahrehda Kitail Anahne Iang Koht Kekeidwei?

6, 7. Anahn dah me aramas soh unsek kan kin ahneki, oh dahme kahrehda e pahn mwahu ma kitail rapahki sawas sang rehn Siohwa?

⁶ Ehu kahrepen kitail anahne iang Siohwa Koht kekeidwei sansalda nan Seremaia 10:23: “Maing Siohwa, I ese me sohte mehmen me kaunda pein imwilahn eh mour; sohte aramas emen me kaunda pein eh mour.” Kahrehda, kitail aramas sohte ahneki koahiek de pwung en kaunda pein atail mour. Kitail anahne kaweid. Irail akan me men saledeksang Koht oh pein wia ahr koasoandi kin wiahda soangen pilipil sapwungohte me Adam oh Ewa wiahda. Ira pein alehdahng ira pwung en pein pilada dahme mwahu oh dahme suwed. (Senesis 3:1-6) Kitail sohte ahneki pwung en kaunda pein kitail.

⁷ Ke soh pehm me ke anahne kaweid nan seiloak en ahmw mour? Rahn koaros kitail kin anahne wiahda pilipil tikitik oh pil laud kan. Ekei pilipil pwukat me apwal oh re pahn pidada atail mour ahnsou kohkohdo—iangahki pil mour en irail kan me kitail poakohng. Kitail anahne tamataman me mie emen me mah oh erpit sang kitail me kupwurperenki en ketikihong kitail kaweid limpoak kan ohng pilipil pwukat! Ahpw, e inenen kansensuwed pwe pali laud en aramas kin pilada en likih pein ahr pilipil kan en kaweid ahr kahk kan. Irail kin soikala mehlelpen ire me kileledi nan Lepin Padahk 28:26: “Aramas pweipwei men me kin idawehnte pein eh kaweid. Ke pahn mourla ma ke idawehn padahk en me kupwurokong sang uhk kan.” Siohwa kupwurki kitail en pitsang kahpwal akan me kin kohsang ni aramas akan ahr kin likih mohngiongarail kan me diren piht. (Seremaia 17:9) E kupwurki kitail en kekeidki erpit, en likih Ih nin duwen Sounkaweid oh Sounpadahk erpit men. Ma kitail pahn wia met, atail kekeid nan mour sohte pahn mih nan irair keper, ahpw e pahn kansenamwahu.

8. Dihp oh soh unsek kin kahluwalahng aramas ni soangen imwila dah, ahpw ia kupwuren Siohwa ohng kitail?

⁸ Ehu kahrepen kitail anahne iang Koht kekeidwei pidada uwen reirei en sapasapal me kitail pahn wia. Paipel kasalehda mehkot mehlel ehu me sohte nohn kaperen. Kitail kak nda me imwilahn mour en aramas soh unsek koaros kin duwepenehte. Ni Paipel ah kawehwehda kahpwal kan me kin kohsang mahla, Eklesiasdes 12:5 mahsanih: “Kitail kohkolahng ni wasahn kommoal poatopoat, oh ni imwilah iei mwahiei pahn kadirehla nanial akan.” Dahkot “wasahn kommoal” wet? Iei sousou me dihp oh soh unsek kin kahluwakitaillahng ie. (Rom 6:23) Ahpw, Siohwa kupwurki ehu soangen mour me laudsang ihte en ipwidi, mour ahnsou mwotomwotkis, oh mwuri mehla. (Sohp 14:1) Ihte ma kitail kin iang Koht kekeid me kitail kak koapworopworki me kitail pahn kak kekeidki erein ahnsou me Siohwa kupwurki kitail en kekeid—kohkohlahte. Kaidehn ih met me ke men wia? Kahrehda, e sansal me ke anahne iang Sahmo kekeidwei.

Iaduwen Kitail Kak Iang Koht Kekeidwei?

9. Dahme kahrehda ekei pak Siohwa kin ketin rir sang sapwellime aramas akan, ahpw soangen mehn kamehlele dah me e ketikihong kitail nin duwen me kileledi nan Aiseia 30:20?

⁹ E konehng kitail en tehk kanaieng peidek kesiluh wet. Met iei, Iaduwen kitail kak iang Koht kekeidwei? Kitail kak diar pasapengpen met nan Aiseia 30:20, 21: “Pein ih pahn ket rehmwail pwe en ketin padahkih kumwail, oh kumwail solahr pahn rapahki ih. Ma kumwail pahn salongasang nan ahlo oh kolahng ni pali meing de maun, kumwail pahn rong kapitie sang mwurimwail me mahsanih, ‘Iet ahlo, kumwail idawehn.’” Nan iren kangoang wet, mahsen en Siohwa me kileledi nan iretikitik 20 ele kin katamankihong sapwellime aramas akan me ni ahnsou me irail kin pelianda Ih, e kin ketin rir sang irail. (Aiseia 1:15; 59:2) Wasaht kasalehda me Siohwa sohte kin rir sang irail sapwellime aramas lelepek kan, ahpw e kin ket mwohrail. Ele kitail kak medewehiong met duwehte sounpadahk men me kin kesihnenda mwohn nah tohnsukuhl kan oh padahkiong irail soahng kan me e men irail en sukuhliki.

10. Ni ahl dah me kumwail ele kin “rong kapitie sang mwurimwail” me kohsang atail Sounkaweid Lapalapo?

¹⁰ Iren mahsen me kileledi nan iretikitik 21 ekis weksang met. Wasaht kawehwehda duwehte me Siohwa kin ketiket kohwei mwurin sapwellime aramas akan oh ketin kaukaweidkin irail duwen ahl me pwung en keid ie. Irail me semen en Paipel kan kin kasalehda me iren kawehwe wet poahsoankihda mwomwen en sounsilepen sihpw men eh kin ideidawehn nah sihpw kan oh kin likwerih irail pwehn kahluwa irail oh irail en dehr wetila ni ahl me sapwung. Iaduwen iren mahsen wet kadoadoahk ohng kitail? Eri, ni ahnsou kan me kitail kin sohpeiong Mahsen en Koht pwehn ale kaweid, kitail kin wadewadek mahsen kan me kileledier sounpar kid kei samwalahro. Eri, pwehki mahsen pwukat kileledier mahsie, e kin mwomwen me kitail rong mahsen pwukat sang mwuritail. Ahpw, mahsen pwukat kin pwungiong atail ahnsou duwehtehte ahr kin pwungiong nan ahnsou me irail kileledi. Kaweid en Paipel kak kaweid kitail nan atail pilipil kan en ehu ehu rahn, oh e pil kak sewese kitail en koasoanehdi soangen mour me kitail pahn mourki nan ahnsou kan me pahn kohdo. (Melkahka 119:105) Ni atail kin ngoangki rapahki soangen kaweid wet oh kapwaiada, eri met wehwehki me Siohwa me iei atail Sounkaweid. Kitail iang Koht kekeidwei.

11. Nin duwen me Seremaia 6:16 koasoia, soangen mahsen en luhk dah me Siohwa ketikihong sapwellime aramas akan, ahpw iaduwen irail mwekidki met?

¹¹ Eri iaduwen, kitail kin uhdahn mweidala Mahsen en Koht en kaweid kitail? Ekei pak, e kin konehng kitail en uhdi oh pein kasawih kitail ni mehlel. Kitail tehkpene ehu ire me pahn sewese kitail en wia me: “Kauno ketin mahsanih ong sapwellime aramas akan, ‘Kumwail kesihnenda wasa me ahl akan wetpeseng ie oh kilengwei. Kumwail kalelapak duwen elen kawa ko oh mehnia ahl me keieu mwahu. Kumwail eri keidwei ie, kumwail ahpw pahn diar popohl.’” (Seremaia 6:16) Mahsen pwukat ele kin katamankihong kitail duwen emen me seiseiloak kohwei oh uhdi limwahn ahl apwoat me wetpeseng pwehn peki kaweid. Ni ahlohte, sapwellimen Siohwa aramas sapeik kan nan Israel anahne ale kaweid ohng ahr anahn en pali ngehn. Irail anahne rapahkihda elerail nan “elen kawa ko.” “Ahl me keieu mwahu” me ahlo me ahr pahpa kahlap lelepek ako kin keid ie, ahl me wehio salongasangehr ie. E kansensuwed pwe Israel sapeikiong iren kataman wet me Siohwa ketin katamankinirail pwehki ah limpoak. Ire wet pil pousehla: “Re ahpw nda, ‘Soh, se sohte pahn wia met!’” Ahpw, nan atail ahnsou, sapwellimen Koht aramas akan kin mwekidki mahsen pwukat weksang mwomwen en mehn mahs ako ahr mwekidki met.

12, 13. (a) Iaduwen sapwellimen Krais tohnpadahk keidi kan mwekidki kaweid en Seremaia 6:16? (b) Iaduwen kitail kak kasawih pein kitail duwen elen atail kekeid nan rahnpwukat?

¹² Nan century 19, sapwellimen Krais tohnpadahk keidi ko kapwaiada iren kaweid en Seremaia 6:16. Nin duwen pwihn ehu, irail kin tihengwei nan ahlo ki mohngiongarail unsek oh pil pwuralahng “elen kawa ko.” Weksang irail Kristendom me kin ahneki ngenin uhwong, irail me keidi kan kin lelepek “katengehdiong irail mahsen mehlel kan” me Sises koasoanehdiong irail oh sapwellime tohnpadahk lelepek kan en century keieu C.E. kin kapwaiada mahsen pwukat. (2 Timoty 1:13) Leledo nan rahnpwukat, me keidi kan kin sawaspene nanpwungarail oh pil iengerail “sihpw teikan” ni ahr kin mourki mour me mehlel me irail Kristendom kan kin soikala.—Sohn 10:16.

¹³ Ni ahr kin ketikihda mwengehn ngehn kan ni ahnsou konehng kan, irail pwihn en “ladu lelepek oh loalokong” kin sewese me rar kei irail en diarada “elen kawa ko” oh iang Koht kekeidwei. (Madiu 24:45-47) Iaduwen, ke iang kisehn irail me rar pwukat? Ma iei, eri dahme ke kak wia pwe ken dehr peila, oh pwurehng wia dahme ke men pein wia? E pahn wia elen loalokong en kin wiahda ahnsou ken uhdi oh tehk duwen mwomwen ahmw kin kekeid nan mour. Ma ke kin poadidiong wadewadek Paipel oh sawaspen Paipel kan oh iang towehda koasoandi en kasukuhl kan me irail me keidi kan kin koasoanehdi nan rahnpwukat, eri met kasalehda me ke kin kasukuhliki ken iang Koht kekeidwei. Oh ni ahmw kin kasalehda aktikitik oh kapwaiada kaweid me kin kohieng uhk, met kin kasalehda me ke kin uhdahn iang Koht kekeidwei oh ideidawehn “elen kawa ko.”

Kekeid Likamwete Ke “Kilang Koht Me Soh Sansal”

14. Ma Siohwa wia emen me mehlel rehtail, iaduwen met pahn sansalda ni pein atail pilipil kan me kitail kin wia?

¹⁴ Pwe kitail en kak iang Koht kekeidwei, Siohwa Koht anahne en wia emen me mehlel rehtail. Tamataman me Siohwa kamehleleiongehr irail mehn Israel en mahs ako me e sohte kin ketin rirsang irail. Pil duwehte nan rahnpwukat, e kin ketin sansalehng sapwellime aramas akan nin duwen Sounkaweid Lapalap emen. Iaduwen, Siohwa kin wia emen me mehlel rehmw duwehte me e kesikesihnen mwohmw pwehn kaweid uhk? Iei soangen pwoson wet me kitail anahne pwehn kak iang Koht kekeidwei. Moses ahneki soangen pwoson wet pwe “e wonlahte mwowe nan eh seiloak, likamwete e kilang Koht me soh sansal.” (Ipru 11:27) Ma Siohwa kin wia emen me mehlel rehtail, eri kitail pahn kin medemedewe duwen kupwure kan ni ahnsou me kitail kin wia atail pilipil kan. Karasepe ehu, kitail sohte pahn medewe kitail en wia me sapwung oh song en ekihla dipatail kan sang elder Kristian kan de kisehn atail peneinei kan. Ahpw, kitail pahn nantihong iang Koht kekeidwei pil ni ahnsou kan me meteikan sohte kin kilang kitail. Duwehte Nanmwarki Depit, kitail en koasoanehdi: “I pahn weweid nan mour mwakelekel nan imwei.”—Melkahka 101:2.

15. Iaduwen atail kin ehuiong riatail Kristian kan kin sewese kitail en kilangwohng Siohwa nin duwen emen me mehlel rehtail?

¹⁵ Siohwa mwahngih me kitail soh unsek oh ekei pak kitail pahn kin apwaliki en kamehlele mehkan me kitail sohte kin kilang. (Melkahka 103:14) E kin ketin sewese kitail laud pwe kitail en powehdi soangen luwet wet. Karasepe ehu, e ketikihpene “aramas ekei pwe re en wiahla sapwellime” sang wehi kan koaros en sampah. (Wiewia 15:14) Ni atail kin miniminpene oh ehupene ni kaudok, kitail kin ale sawas sang rehn emenemen. Ni atail kin rong duwen en Siohwa kin sewese emen riatail ni pali ngehn en powehdi soangen kasongosong apwal ehu, e kin kahrehiong Koht en uhdahn wia emen me mehlel rehtail.—1 Piter 5:9.

16. Iaduwen atail sukuhliki duwen Sises pahn sewese kitail en iang Koht kekeidwei?

¹⁶ Ahpw laudsang mehkoaros, Siohwa ketikihong kitail mehn kahlemeng mwahu en Sapwellime Ohl. Sises mahsanih: “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.” (Sohn 14:6) Sukuhliki duwen mour en Sises ni ahnsou me e ketiket sampah iei ehu ahl keieu mwahu pwe kitail en kak wiahki Siohwa emen me uhdahn mehlel rehtail. Soahng koaros me Sises mahsanih oh wia kin wia kasalepe unsek en mwohmw oh elen Semeo me ketiket nanleng. (Sohn 14:9) Ni atail pahn kin wiahda atail pilipil kan, kitail anahne medemedewe kanahieng duwen wiepen Sises kan nan soangen irair ako. Ma kitail kin wiahda atail pilipil kan mwurin atail kin medemedewe kanahieng oh kapakapki duwen pilipil pwukat, eri met kasalehda me kitail kin idawehn oh kahlemengih lipwen Krais. (1 Piter 2:21) Imwilahn met, kitail pahn iang Koht kekeidwei.

Met Kin Imwikihla Soangen Kapai Dah kan?

17. Ma kitail kin kekeid nan elen Siohwa, soangen “popohl” dah me kitail kak diar nan atail mour?

¹⁷ En iang Siohwa Koht kekeidwei kin wehwehki en ahneki mour ehu me diren kapai. Tamataman dahme Siohwa ketin inoukihong sapwellime aramas akan me kin rapahki “ahl me keieu mwahu.” E mahsanih: “Kumwail eri keidwei ie, kumwail ahpw pahn diar popohl.” (Seremaia 6:16) Ia wehwehn “popohl”? Mour ehu me direkihla soangen peren en war oh kepwehpwe? Soh. Siohwa kin ketikihda mehkot me mwahusang met, mehkot me aramas me keieu kepwehpwe sohte kin kalap diar. Pwehn kak diar popohl iei en diar popohl nan loalomw, peren, nsenamwahu, oh pweidahn pali ngehn. Soangen popohl wet kin wehwehki me ke kak koapworopworki me ke pilada elen mour me keieu mwahu. Soangen madamadau en popohl wet kin wia kapai ehu me sohte kin kalap dierek nan sampah apwal wet!

18. Soangen kapai dah me Siohwa kupwurki ohng uhk, oh dahme ken koasoanehdi teng nan kapehdomw me ke en wia?

¹⁸ Ehi mehlel, mour wia kapai ehu. Kisin mour mwotomwot mwahusang sohte. Ahpw, Siohwa sohte kupwurki ahmw mour en ihte wia mour mwotomwot ehu me tepikihda mour roson en me pwulopwul men oh imwikihla mour me direki medek pwehki mahla. Soh, Siohwa kupwurki ken ahneki kapai me keieu kaselel. E kupwurki ken iang Ih kekeidwei kohkohlahte! Met sansalda mwahu nan Maika 4:5: “Wehi koaros kin pwongih oh peikiong arail koht kan, a kiht, se pahn kin pwongih oh peikiong Siohwa, aht Koht, kohkohlahte.” Iaduwen, ke pahn kak alehdi kapaio? Ke pahn mourki mour me Siohwa kin mahsanih “mouro me uhdahn mour mehlel.” (1 Timoty 6:19) Eri, koasoanehdi teng nan kapehdomw me ke pahn iang Siohwa kekeidwei sang rahnwet kohla oh pil kohkohlahte!

[Nting tikitik me mi pah]

Iaduwen Ahmw Pahn Sapeng?

• Ia wehwehn en iang Koht kekeidwei?

• Dahme kahrehda ke ahneki pepehm me ke anahne iang Koht kekeidwei?

• Dahme pahn sewese iuk pwe ken kak iang Koht kekeidwei?

• Soangen kapai dah kan me kin kohwong irail akan me kin iang Koht kekeidwei?

[Kawehwehpen kilel kan nan ehu ehu pali 29]

Sang nan Paipel, kitail kin rong kapitiehn Siohwa mwuritail me mahsanih, “Iei ahlo met”

[Kawehwehpen kilel kan nan ehu ehu pali 31]

Nan mihding kan, kitail kin ale mwengehn ngehn kan ni ahnsou konehng