Pwuhk ehu Sang Rehn Koht
“Pwe sohte mwahn kokohp ehu kin pwilisang ni nsenen aramas emen, ahpw ngehn sarawi me kin ti pohn aramas ni ar kin lohkihda mahsen en Koht.”—2 PITER 1:21.
1, 2. (a) Dahme karehda ekei kin peidengki ma Paipel katapan ong mouren en ahnsouwet? (b) Mehn kadehde siluh dahkei kitail kak doadoahngki pwehn kasalehda me Paipel kohsang rehn Koht?
PAIPEL katapan ong aramas kan me momour kerenlahng nan pahr 2000? Ekei kin lemeleme me soh. “Sohte me kak doadoahngki pwuhk en chemistry en pahr 1924 nan sukuhl en chemistry en ahnsouwet—pwehki mie soahng tohto me kitail sukuhlkidiehr sang ahnsouwo kohdo lel ahnsouwet,” Dr. Eli S. Chesen ntingihdi ni ah kawehwe karepen e lemeleme me Paipel sohte kak kadoadoahk pwe e mering. Ong ni pali liki, dahme e koasoia mwomwen pwung. Pwe aramas sukuhlkidiehr soahng tohto me pid duwen pelien sains, oh pelien roson en madamadau, oh tiahk en aramas sangete ni mwein Paipel kohdo. Ihme karehda, ekei kin wahpwonki: ‘Iaduwen pwuhk en mahs wet sohte pahn kak sapwung ong pelien sains? Iaduwen e kak audaudki kaweid me katapan ong mour en ahnsouwet?’
2 Pein Paipel kihda pasepengo. Nan 2 Piter 1:21 padahkiohng kitail me soukohp kan en Paipel kin “lohkihda mahsen en Koht sang ni ngehn sarawi kin ti pohrail.” Paipel eri kasalehda me pwuhk wet kohsang rehn Koht. Ahpw, iaduwen kitail kak kamehlelehiong mehteikan me met mehlel? Kitail en tehkpene mehn kadehde siluh me kasalehda me Paipel iei Mahsen en Koht: (1) E pwungiong pelien sains, (2) e audaudki mouren kosonned kesempwal kan me katapan ong mour en ahnsouwet, oh (3) e kin audaudki kokohp oaretik kan me pweidaiehr, duwen me poadoapoad kasalehda.
Pwuhk Ehu Me Pwungiong Pelien Sains
3. Dahme karehda Paipel sohte kin apwalkihla soahng kapw kan me pelien sains diarada?
3 Paipel kaidehn pwuhk en sains ehu. Ahpw, e wia pwuhk en padahk mehlel, oh mehlel kin mihmihte sangete mahs lel ahnsouwet. (Sohn 17:17) Soahng kapw kan me pelien sains kin diarada sohte kin kihsang mehlel en Paipel. Ni ahnsou me Paipel kin koasoia ire kan me pid pelien sains, e sohte kin wiahda pein ah kawehwehn mahs akan en “pelien sains” me kin mwuri sansalda me sohte mehlel. Ni mehlel, e audaudki mahsen kan me sohte ihte pwungiong pelien sains ahpw kin pil uhwong madamadau en ahnsouwo. Tehk, karasepe ehu, parekpenen Paipel oh pelien wini.
4, 5. (a) Toahkte kan en mahsie sohte kin wehwehki dahkot duwen soumwahu? (b) Dahme karehda Moses ni soh peikidpe wehwehki wiepen wini kan me toahktehn Isip kan kin doadoahngki?
4 Toahktehn mahs akan sohte kin uhdahn wehwehki iaduwen soumwahu kin doupeseng, re pil sohte kin ese duwen kesempwal en mwakelekel pwehn irehdi soumwahu kan. Ong pelien wini en ahnsouwet, wiepen wini en mahs tohto kin mwomwen rotorot. Ehu pwuhk en wini me keieu mering me mihmihte lau 1el ahnsouwet iei Ebers Papyrus, me audaudki wiepen wini en mehn Isip kan me wiawihda mpen sounpar 1550 B.C.E. E audaudki wini en soangsoangen soumwahu 700, “soahngen soumwahu en keikei en mahn krokodail pil lellahng medek en kikin nehn aramas.” Pali moron en wini pwukat sohte lipwe, ahpw ekei me inenen keper. Ong wini en ohla, ehu wiepen wini iei en doaloapene kainen mwenge en aramas oh wini teikan oh keieki nan ohlao.
5 Pwuhk en wini en Isip wet ntingdi mpen ahnsouwohte me tepin pwuhk kan en Paipel ntingdi, me pil iangahki Kosonned en Moses. Moses, me ipwidi nan pahr 1593 B.C.E., tikida nan Isip. (Eksodus 2:1-10) Pwehki e tikida nan imwen Parao, Moses “audaudkidahr soangen loalokong koaros en mehn Isip.” (Wiewia 7:22) Moses wehwehki wiepen wini kan me “toahkte” en Isip kan kin doadoahngki. (Senesis 50:1-3) Moses kin mihla pahn arail tiahk oh kileledi arail wiepen wini soh lipwalipw kan oh keper kan nan ah nting?
6. Kosonned en kamwakel dahieu nan Kosonned en Moseso me pelien wini en ahnsouwet pahn pil pwungki?
6 Soh, kosonned en kamwakel pil mih nan Kosonned en Moseso me kin pwungiong pelien wini en ahnsouwet. Karasepe ehu, kosonned pil wiawihda ong impwal en sounpei kan me re anahne sarepedi arail kainen en mwenge likin kahnimpwalo. (Deuderonomi 23:13) Met iei wiepen irehdi soumwahu endehr doupeseng me inenen deila sang arail ahnsouwo. Met kin irehdi utupen pihl akan endehr saminla oh pil irehdi soumwahu ehu me adaneki shigellosis me kin kohsang loahng oh soahngen soumwahu en mehntang me lau lel ahnsouwet kin kemehla aramas rar kei nan ehu ehu sounpar, keieu nan sahpw semwehwe kan.
7. Kosonned en kamwakel dahkei nan Kosonned en Moseso kin kihda sewese en irehdi paraparalahn soumwahu dou kan?
7 Kosonned en Moses pil kin audaudki kosonned en kamwakel teikan me kin sewese irehdi paraparalahn soumwahu dou kan. Aramas me soumwahuki soumwahu ehu me dou de emen me re lemeleme me ahneki soahngen soumwahu dou wet anahne katohrohrla sang mehteikan. (Lipai 13:1-5) Likou kan de dipwisou kan me mahn mehla men (ele e mehkihla soumwahu) sairada pahn anahne kamwakelehda mwohn aramas pahn pwurehng doadoahngki de ma soh ah en kauwehla. (Lipai 11:27, 28, 32, 33) Aramas emen me doahkehda paliweren aramas mehla men pahn saminkihla oh pahn anahne wia wiepen kamwakel ehu me iangahki kamwakelehda ah likou kan oh duhdu. Erein rahn isuh en ah saminkihla met, e pahn liksang karanih de doahke aramas teikan.—Nempe 19:1-13.
8, 9. Dahme karehda kitail kak ndahki me kosonned en kamwakel me mih nan Kosonned en Moseso kin deila douluhl sang ahnsouwo?
8 Kosonned en kamwakel wet kasalehda erpit me deila sang loalokong en ahnsouwo. Pelien wini en ahnsouwet sukuhlkidiehr soahng tohto duwen iaduwen soumwahu kin doupeseng oh dahme kak wiawi pwehn irehdi. Karasepe ehu, kekeiradahn pelien wini nan 1800 wahdo wiepen wini ehu me adaneki ni lokaiahn wai antisepsis—me wehwehki kamwakel pwehn irehdi soumwahu dou kan. Imwilahn met iei malaulaulahn soumwahu dou kan oh pil iangahki mehla kan me kin kohsang soumwahu pwukat. Nan pahro 1900, nan sapwen Iurop tohto oh nan United States, uwen reirei en mour en emen sang ah ipwidi kin mwotomwot sang sounpar 50. Ahpw sangete ahnsouwo kohdo, mour en aramas kin reireila kapwuriamwei, kaidehn ihte pwehki kekeiradahn pelien wini wehwehkidahr irehdi soumwahu kan ahpw pil pwehki kamwahulahn wiepen kamwakel oh wasahn kousoan kan.
9 Ahpw mendahki met, sounpahr kid kei mwohn pelien wini sukuhlkihdi iaduwen soumwahu kin doupeseng, Paipel kasalehdaiehr wiepen perepe kan me emen en doadoahngki pwehn irehdi ih sang soumwahu. E sohte kapwuriamwei me, Moses kak kosoiahki mehn Israel koaros nan ah mweio me re mour lel sounpar 70 de 80. (Melkahka 90:10) Iaduwen Moses kak ese soahngen kosonned en kamwakel pwukat? Pein Paipel kawehwehda: “Tohnleng kan patohwando” Kosonnedo. (Kalesia 3:19) Ehi, Paipel kaidehn pwuhk ehu me kin audaudki loalokong en aramas; ahpw pwuhk ehu sang rehn Koht
Pwuhk Katapan Ehu ong Mouren Ahnsouwet
10. Mendahki Paipel ntingdi kereniong sounpar 2,000 samwalahro, ia mehlel en ah kaweid?
10 Kaweid en pwuhk kan kin kalap meringla oh kin mwadang kopwungpwungla de welialihkihda kaweid kapw kan. Ahpw Paipel ni mehlel me tohrohr. Melkahka 93:5 mahsanih: “Sapwellimomwi kosonned akan me poatopoat.” Mendahki Paipel ntingda kereniong sounpar 2,000 samwalahro, ah mahsan kan kin kadoadoahk sangete ahnsouwo lel ahnsouwet. Oh mendahki soahngen poh dah kilitail de mehnia sahpw me kitail kin kousoan ie, mahsan pwukat kin kadoadoahk ong kitail koaros duwepenehte. Tehk duwen ekei karasaras kan en kaweid kesempwal, oh “likilik” kan en Paipel.
11. Sounpar eisek samwas samwalahro, dahme karehong pahpa oh nohno tohto en kamehlele duwen kaiane seri kan?
11 Sounpar eisek samwa samwalahro pahpa oh nohno tohto—kin ale kangoang sang “lamalam kapw kan” me pid kekeirada seri kan—oh kin medemedewe me ren dehr kaiane sen kan. Re lemeleme me irehdi seri kan kak kauwehla pepehm en seri kan oh karehong ren pwunod. Sounkaweid kan me kin mehlelki arail kaweid kin ngidingidki me pahpa oh nohno kan en kihong neirail seri kan kaweid marahrahte. Soahngen sounkaweid tohto pwukat kin ahnsouwet “kangoangehki pahpa oh nohno kan ren pwurehng kaiane neirail seri kan,” The New York Times ripohtki.
12. Dahme lepin lokaiahn Krihk me kin kawehwe “kaiahn” kin wehwehki, oh dahme karehda seri kan anahnehki soahngen kaian wet?
12 Ahpw, sangete mahs kohkohdo, Paipel kin kihda kaweid me oaretik, oh pahrek ong kaiane seri. E kaweidki: “Kumwail sahm akan, kumwail dehr kamwakara mwahl noumwail seri kan. A kumwail kaiahneirailda ni padahk oh lamalam en Siohwa.” (Episos 6:4) Lepin lokaiahn Krihk me kin kawehwe “kaiahn” kin wehwehki “kekeirada, kaiane, kaweid.” Paipel mahsanih me kaiahn, de kaweid, kin wia sansalepen limpoak en pahpa oh nohno. (Lepin Padahk 13:24) Seri kan kin keirada mwahu pahn kaweid pwung sansal kan me kin sewese irail en kekeirada irair en ese dahme pwung oh dahme sapwung. Kalahn akan me kin wiawi ni ahl me konehng kin sewese seri kan en ahneki pepehm en meleilei; e kin padahkihong irail me arail pahpa oh nohno nsenohkin irail oh soahngen aramas dah me irail pahn wiahla ehu rahn.—Pil tehk Lepin Padahk 4:10-13.
13. (a) Ni ahnsou me e kin pid kaiahn, peneu dahieu Paipel ketikihda ong pahpa oh nohno kan? (b) Soahngen kaiahn dah me Paipel kin ketikihda?
13 Ahpw Paipel kin panawih pahpa oh nohno nan ire wet me pid kaiane neirail seri kan. Pahpa oh nohno kan endehr doadoahngki arail manaman ni ahl me sapwung. (Lepin Padahk 22:15) Seri kan sohte anahne en mihla pahn kalokolok lemei kan. Pepei endehr wiawi nan peneinei me kin mourki Paipel. (Melkahka 11:5) Wiekau ni pali en pepehm—duwehte lokaia lemei, kalap kauwe, oh lokaiahn kapweikeng, kak kauwehla mouren serio. (Pil tehk Lepin Padahk 12:18.) Ni loalokong, Paipel panawihki pahpa oh nohno kan: “Dehr kamwakara mwahl noumwail seri kan, pwe re dehr mworusala [de, “kumwail pahn kihsang kehl en loalerail,” Phillips].” (Kolose 3:21) Paipel kin kihda ire kan me pahpa oh nohno kan en kaleke. Nan Deuderonomi 11:19, kin kangoangehki pahpa oh nohno kan en doadoahngki ahnsou soh lipilipil kan pwehn katengediohng nan mohngiong neirail seri kan tiahk kesempwal kan oh ire kesempwal kan en pali ngehn. Soahngen kaweid pwukat me pid kaiane seri me sansal oh materek kin katapan rahnwet duwehte nan ahnsoun Paipel kan.
14, 15. (a) Ni ahl dahieu Paipel sohte kin ihte ketikihda kaweid loalokong kan? (b) Padahk en Paipel dahkei me kak sewese ohl oh lih kan sang nan soangsoangen keinek kan oh wehi kan en kilangwohng emen emen me re duwepenehte?
14 Paipel sohte kin ihte kihda kaweid loalokong kan. Rongen Paipel kin kaperen ong mohngiong en aramas. Ipru 4:12 mahsanih: “Mahsen en Koht wie momour oh manaman, e keng sang kedlahs me au riau. E kin lellohng loalen aramas lel wasa keieu rir, wasa me mour oh ngehn kin tuhpene ie, wasa me kakon oh sahl akan kin tuhpene ie. E kin kadeikada ineng oh lamalam en nan kapehd en aramas.” Tehk ehu karasepen manaman en Paipel.
15 Aramas rahnwet kin irairkihpeseng keinek, wehi, oh tiahk. Kehl pwukat me aramas wiahda kin karehda kamakamalahn aramas soh diperail kan nan mahwen kan nan sampah pwon. Ni pali teio, Paipel kin audaudki padahk kan me kin sewese ohl oh lih kan sang nan soangsoangen keinek kan oh wehi kan en kilangwohng emenemen me re duwepenehte. Karasepe ehu, nan Wiewia 17:26 mahsanih me Koht “wiahda kadaudok koaros sang rehn ohl tehmen.” Met kasalehda me keinek ehute me mie—keinek en aramas! Paipel pil pousehla kangoangehkin kitail en “kalimengih Koht,” meno me Paipel mahsanihki: “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” (Episos 5:1; Wiewia 10:34, 35) Ong irail ko me kin uhdahn rapahki en mourki padahk kan en Paipel, loalokong en Paipel wet kin karehda kaminimin. E kin doadoahk nan wasa me keieu loal—nan mohngiong—oh kin kauwehla kehl akan me aramas wiahda me kin katohrepeseng aramas kan. E uhdahn kin doadoahk nan sampah rahnwet?
16. Koasoiahda eksperiens ehu me kasalehda me Sounkadehdehn Siohwa kan kin wia pwihn en pirien mehlel ehu nan sampah pwon.
16 Ehi uhdahn! Sounkadehdehn Siohwa kan kin ndandki arail kin wia pwihn en pirien ehu nan sampah pwon, me kin kaminiminpene soangsoangen aramas kan sang nan soahngen wasa kan me uhdahn sohte kin popohlpene. Karasepe ehu, erein mahwenpenen keinek kan me wiawi nan Rwanda, Sounkadehdehn Siohwa kan en ehu ehu keinek kin pere riarail Kristian brother oh sister kan en keinek teio, oh kihong pein arail mour nan keper. Nan ehu irair, Sounkadehde mehn Hutu men ekihla nan imwe peneinei en Sounkadehde en Tutsi wenemen sang nan ah mwomwohdiso. E inenen kansensuwed pwe, kedekedeo peneinei en Tutsi diarekda oh kamakamala. Brother en Hutu oh ah peneinei ahnsouwet mihla pahn engieng en sounkamakam ko oh re anahne tangalahng sapwen Tanzania. Ripoht pil kasalehda soahngen karasaras tohto me duwehte met. Sounkadehde kan en Siohwa kin pohnese me soahngen minimin wet kin kak wiawi pwehki mohngiongarail kan kin inenen mwekidki manaman kehlail en rongen Paipel. Me Paipel kak kaminiminpene aramas kan nan sampah wet me dirki kailok kin wia mehn kadehde kehlail me e kohsang rehn Koht.
Pwuhk en Kokohp Mehlel Ehu
17. Iaduwen kokohp kan en Paipel kin weksang kokohp en aramas?
17 2 Piter 1:20 mahsanih: “Sohte emen kak kawehwehda kokohp ehu en nan Pwuhk Sarawi sang ni pein nsene.” Soukohp kan en Paipel sohte kin kasawih irair kan me kin pwarapwarada nan wiewia kan en sampah oh eri poahsoanehda pein arail kawehwe kan pohn wiewia pwukat. Irail sohte kin pil wiahda kokohp kan me sohte nohn sansal me pahn doakedoakehte wiewia soh lipilipil ehu nan ahnsou kohkohdo. Kitail en tehk, nin duwen karasaras ehu, duwen kokohp en Paipel ehu me inenen oaretik oh me kohpada mehkot me aramas en ahnsouwo sohte kasik pahn wiawi.
18. Dahme karehda tohn Papilon en mahsie kin ni soh peikasal pepehm me sohte apwal pahn lellohng irail, ahpw mendahki met, dahme kokohp en Aiseia mahsanihki duwen Papilon?
18 Lau lel nan senturi kaisuh B.C.E., Papilon kin wia poasen kaun en Wehin Papilon me mwomwen sohte kak ohla. Kahnimwo kin kapilipilikihpene Pillap Iupreitis, oh pilen pillapo kin kadoadoahk pwehn wiahda warawar ehu me tehlap, oh loal oh dahu kan me kin kapilpene kahnimwo. Kahnimwo kin pil pereperkihla kehl laud kan me kin mosulki arail kin wad riau, me kin utuhtkihda imwen doulik kan. Ni soh peikidpe tohn Papilon kin pepehm me sohte apwal pahn lellohng irail. Ahpw mendahki met, nan senturi kawaluh B.C.E., pil mwon Papilon lellohng nan ah lingan koaros, soukohp Aiseia kohpada: “Papilon . . . pahn ohla duwehte me Koht wiahiongehr Sodom oh Komora. Sohte emen pahn pwurehng kousoan wasao. Sohte mehn Arepia men me seiseiloakseli pahn kauwada imwe impwal wasao, oh sohte silepen sihpw men pahn kamwenge nah pelinsihpw wasao.” (Aiseia 13:19, 20) Tehk me kokohpo sohte kin kohpadahte me Papilon pahn ohla ahpw pil kih kohpada me sohla me pahn pwurehng towe. Ia uwen kehlail en kokohp wet! Aiseia kin ntingihdi ah kokohp mwurin ah kadehde ohlahn Papilon? Poadoapoad kasalehda me soh!
19. Dahme karehda kokohp en Aiseia saikinte uhdahn pweida douluhl ni October 5, 539 B.C.E.?
19 Ni pwong en October 5, 539 B.C.E., Papilon lohdiong pahn sounpei kan en Medo—Persia pahn Sairus Lapalap. Ahpw, en Aiseia kokohp saikinte pweida douluhl ahnsouwo. Mwurin en Sairus kalowehdi Papilon—Papilon me miehte towe—mendahki e sohla kehlail—kin mihmihte erein sounpar epwiki kei. Nan keriau en senturi B.C.E., mpen ahnsouwohte me pwuhk en Aiseia me diarekda limwahn Sehd en Mehla kin pwurehng nting sapahl, mehn Parthian kan uhd kaunda Papilon, me ahnsouwo wehi kan limwa kin peiki pwehki re kin kilangwohng nin duwen kating ehu. Sounpoadoapoad en mehn Suhs Josephus ripohtki me mehn Suhs “tohto” kin koukousoan wasao nan keieun senturi B.C.E. Nin duwen me The Cambridge Ancient History kasalehda, sounnetinet mehn Palmyrene kan wiahdahr wasahn netinet pweida mwahu ehu nan Papilon nan pahr 24 CE. Ihme, lau lel nan senturi keieu C.E., Papilon saikinte uhdahn sohla towe; ahpw mendahki met, Aiseia kanekelahr ntingih nah pwuhko ahnsou werei mwohn met—1 Piter 5:13.
20. Mehn kadehde dahieu me kasalehda me kedekedeo Papilon Wiahla “koasokoasok en takai kei”?
20 Aiseia sohte mour oh koanoahdi kilang Papilon sohla towe. Ahpw me pwungiong kokohp, Papilon kedekedeo Wiahla “koasokoasok en takai kei.” (Seremaia 51:37) Nin duwen me ohl loalokong en Ipru Jerome (me ipwidi nan senturi kapahieu C.E.) kasalehda, nan ah mweio Papilon wiahlahr wasahn pwek mahn wasa me “soahngen mahn koaros” kin kohkohseli ie, oh tehulahr sangebe ahnsouwo lelledo rahnwet. Songosong en kapwurehdo Papilon nin duwen wasahn kapoudial ehu ong irail me mwemweitdo kan ele pahn kainengiengdo irail kan me mwemweitdo, ahpw Papilon “sohla pahn luhwehkihdi Iuehkot—sohte seri, sohte emen pahn mourla,” nin duwen me Aiseia kohpada.—Aiseia 14:22.
21. Dahme karehda soukohp lelepek kan ni pwung kak kohpada dahme pahn wiawi nan ahnsou kohkohdo?
21 Soukohp Aiseia sohte pein kasarkihda mehkan me e kohpada. E pil sohte pwurehng ntingih sapahl poadoapoad wet pwehn pitihki aramas me dene kokohp ehu. Aiseia kin wia soukohp mehlel men. Met pil duwehte soukohp en Paipel lelepek teikan. Dahme karehda ohl pwukat kak wia mehkot me aramas teikan sohte kak wia—kohpada ni pwung dahme pahn wiawi nan ahnsou kohkohdo? Pasepengo me sansal. Kokohp pwukat kin tepisang rehn Koht en kokohp, Siohwa, meno me “sangete nin tepio kin kasalehda dahme pahn wiawi mwuhr.”—Aiseia 46:10.
22. Dahme karehda kitail en wia uwen me kitail kak koaros en kangoangehki me mohngiong mehlel kan en pein kasawih Paipel?
22 Ihme mie katepen kitail en kasawih Paipel? Kitail wehwehki me mie katepe! Ahpw aramas tohto sohte kin kamehlele me mie katepen kitail en kasawih Paipel. Re kin wiahdahr pein arail lamalam ong Paipel mendahki ma re saikinte wadek pak ehu. Tamanda sounpadahk en sukuhlo me kitail koasoiapene nan tepin artikel en mwowe. E pwungkihda en onop Paipel, oh mwurin ah kasawih ni keneinei Paipel, e esehda me pwuhk wet kohsang rehn Koht. Kedekedeo e papidaisla nin duwen emen Sounkadehdehn Siohwa, oh rahnwet e kin papah nin duwen elder men! Kitail en wia uwen me kitail kak en kangoangehki me mongiong mehlel kan en pein kasawihada Paipel oh mwurin kasalehda arail lamalam ong pwuhk wet. Kitail koapworopworki me ma irail pahn ni mehlel pein kasawih pwuhk wet, re pahn wehwehkihla me pwuhk tohrohr wet, Paipel ni mehlel kin wia pwuhk ehu ong aramas koaros!
Komw Kak Kawehwe?
◻ Iaduwen komw kok doadoahngki Kosonned en Moseso pwehn kasalehda me Paipel sohte kohsang rehn aramas?
◻ Mouren kosonned kesempwol dahkei nan Paipel me katapan ong mour en ahnsouwet?
◻ Dahme karehda kokohpo nan Aiseia 13:19, 20 sohte ntingdi mwurin pweidahn ire wet?
◻ Dahme kitail en kongoangehki aramas mohngiong mehlel kon en wia, oh dahme karehda?
[Koakon nan pali 30]
Iaduwen ire kan me Sohte Kawehwepe
Paipel kin audaudki soangsoongen mahsan kan me sohte kak kawehwehdiong ni mehkan me kitail kak kilangki mesetail. Karasepe ehu, pelien sains sohte kuk kawehwe duwen wasao me soh sansal me ngehn soh sansal kan kin kousoan ie. Soahngen iren Paipel pwukat me sohte kak kawehwehiong ni mehkot me aramas kak kilangki mese kin kasalehda me Paipel sapwung ong pelien sains?
Ih peidek wet me kin kapwunodih emen saintis me kin onopki weren planet ken me atail sampah kin iang kise me tepiada onop Paipel rehn Sounkadehdehn Siohwa kan sounpar kei samwalahro. Ohl menet tamanda: “I pahn wehkada me e apwal ong ie en kamehlele Paipel nin tepio pwehki I sohte kak kadehdehda sang ni pelien sains ekei mahsan kan en Paipel.” Ohl menet pousehlahte onopki Paipel oh kedekedeo eri kamehlelehda me mehn kadehde kan me mieiehr kasalehda me Paipel iei Mahsan en Koht E kawehwe: “Met kin katikitikihla ahi ineng en men kadehdehda de kawehwehda ire mehlel kan koaros en Paipel. Aramas men me kin mehn en mie wehwehn soahng koaros sang ni pelien sains anahne en kasawih Paipel ni ah pahn ahneki madamadau en pali ngehn, pwe ma soh eri e sohte pahn kamehlele padahk mehlel. Kitail endehr kasik me pelien sains pahn kak rapahkida wehwehn mahsan koaros nan Paipel. Ahpw pwehki ekei mahson kan sohte kak kawehwehda, met sohte wehwehki me e sapwung. Me kesempwal iei me ni ahnsou soh lipilipil me Paipel kin kadehdehda mehkot, pelien sains kak kadehde pwung en Paipel nan ire wet.”
[Kilel nan pali 28]
Moses kin ntingihdi kosonned en kamwakel kan me inenen sikla sang ni ahnsouwo