Dahme Komw Pahn Koasoiaiong Mehn Suhs Men?

¹ Nan keieun senturi, “nein mehn Israel” tohto mwekidki oh kalahnganki kalohk en Sises oh sapwellime wahnpoaron kan. (Wiewia 10:36) Duwehte ni ahnsowo, nan rahnpwukat, pil mie ekei mehn Suhs mehlel akan me kin tepida kamehlele ni mehlel padahk mehlel kan​—kaidehn nan wehin Israel kelepwte ahpw pil nan Russia, United States, oh pil nan wehi teikan. Ke men ese iaduwen ke kak pweida mwahu ni omw pahn koasoiong mehn Suhs akan? Sawas pwukat pahn kak sewese iuk en ni kadek koasoiong irail mehn Suhs akan me kin kamehlele pelien lamalam kan en mehn Suhs oh pil koasoiong mehn Suhs akan me sohte kin pwungki padahk kan en pelien lamalam mehn Suhs akan ahpw kin men utungada tiahk oh loalokong en mehn Suhs akan.

² Kalohkong Mehn Suhs akan me kin Kamehlele Ahr Pelien Lamalam kan: Kitail anahne wehwehki me mehn Suhs akan me kin poadidiong ahr pelien lamalam kin pali laud en ahnsou nsenohki en kapwaiada tiahk kan en ahr rabbi kan oh irail sohte kin nsenohki duwen oaritik kan en arail padahk kan. Re kin kilangwong ahr tiahk kan me e kesempwal oh pahrekiong iren Paipel kan. Ihme, re sohte kin men koasoia duwen padahk loal kan en Paipel. Re pil kin kilangwong Paipel nin duwen pwuhk en Kristian ehu. Ihme, ni ahnsou me kitail kin koasoia duwen Paipel, e pahn mwahu kitail en doadoahngki lepin lokaia pwukat, “Nting en Ipru kan,” “Torah,” de “Nting kan.” Mie ehu brochure me wiawihda ong mehn Suhs akan, me oaralap koasoia, Will There Ever Be a World Without War?

³ Mehnia oaralap kan ele mwein mehn Suhs akan me kin poadidi ong arail pelian lamalam pahn perenki koasoia duwen? Eri, re kin kamehlele me mie Koht tehmen, oh e kin nsenohkin aramas akan. Irail pil kin kamehlele me Koht kin sewese aramas akan. Ele ke kak doadoahngki ire pwukat ni ahnsou me ke pahn koasoiong irail, pwe ire pwukat kin pahrekiong dahme re kin kamehlele. Oh pil, pali laud en mehn Suhs akan kin wehwehki duwen kalokolok me mehn Suhs akan lelong nan Mahwen Keriau en Sampah. Re kin wahpwonki, dahme kahrehda Koht kin mweidong kopwung suwed en wiawi oh iahd me suwed pwukat pahn imwisekla. Kitail kin kaunop mwahu en sapeng peidek pwukat, karasepe ieu, kitail ese dahme kahrehda riatail brother kan lelohng kalokolok kan erein Holocaust.

⁴ Kitail sohte men kalingeringerda tohnihmwo, ihme kitail sohte pahn mwadang koasoi duwen ihs me Mesaia. Ahpw, ke kak koasoia duwen pwukoah me Moses ahneki nan poadoapoad en wehin Israel oh idek rehn tohnihmwo me e kin kamehlele me padahk kan en Moses kin pid atail ahnsou. Ni ahnsou me ke lemeleme me konehng en koasoia duwen ihs me Mesaia, ele ke kak wadek mahs iren Paipel wet nan Deuderonomi 18:15, me mahsanih: “Pwe e pahn ketin poaronehdo sapwellime soukohp emen duwehte ngehi sang nanpwungamwail; eri, kumwail pahn peikiong.” Idek rehn tohnihmwo, ihs me Moses medemedewe ni ahnsou me e koasoia duwen soukohp emen me duwehte Moses. Eri, ke kak koasoia ekei ire kesempwal kan sang brochure wet World Without War ni pali 14, parakrap 17 oh 18.

⁵ Mehn Suhs akan me Sohte kin Pwungki Padahk kan en Pelien Lamalam en Mehn Suhs: Kaidehn mehn Suhs akan koaros kin pwungki padahk kan en pelien lamalam en mehn Suhs akan. Mehn Suhs tohto kin kesempwaliki mehkan me kin pid sampah. Irail kin nsenohki oh utungada tiahk kan oh kasukuhl kan en mehn Suhs akan, laudsang ar kin kamehlele ahr pelien lamalam en mehn Suhs. Ekei mehn Suhs pwukat sohte ese ma mie Koht de soh​—oh ekei kin pil sohte kamehlele Koht. Ni tepio, e sohte pahn konehng en koasoia iren Paipel tohto sang Nting en Ipru. E pahn pweida mwahu ma kitail pahn koasoiong soangen aramas pwukat duwehte me kitail kin koasoi ong aramas akan me sohte perenki pelien lamalam kan. Ke kak kawehwehda me Paipel iei ehu pwuhk me kin kihda sawas laud ong aramas akan nan rahnpwukat. Ma tohnihmwo sohte kin kamehlele me Paipel kin kohsang rehn Koht, ekei padahk kan me ntingihdi nan brochure, World Without War, kak kihda sawas, keieu ire kan me mih nan pali 3 oaralap koasoia “Paipel​—Kohsang rehn Koht?”

⁶ Ni ahnsou ke pahn kalohkong mehn Suhs men, ke kak nda met:

◼ “Pali laud en kitail mie kompoakpatail men me mehla. Ni ahnsou me emen pahn mehla, dahme ke lemeleme pahn wiawi?” Mweidong tohnihmw en sapeng. Mwuhr kasalehong tohnihmwo koakon me oaralap koasoia “Mehla oh Soul​—Ia Wehwehn Met?” nan pali 22 nan brochure en World Without War. Koakono kin kapahrekiong dahme iren Paipel kan kin koasoia duwen mour mwurin mehla oh dahme rabbi kan kin koasoia. Mwurin met, pakalahng ni parakrap 17 nan pali 23, oh kasalehda me nin duwen Nting sarawi kan, aramas akan me mehla pahn iasadahng mour nan paradais nin sampah. Kihla brochure. Pwehn kaunopada madamadau en tohnihmwo me ke pahn pwurala reh, ke kak koasoia me Sohp pil kin kamehlele koapworopwor en kaiasada. Kasalehong ih iren Paipel kan me ntingihdi ni imwin parakrap 17, oh nda me ke pahn pwurala oh koasoi duwen iren Paipel pwukat.

⁷ Pwuhk kan en Madiu, Mark, Luk, Sohn, oh Wiewia kin ntingihdi mouren mehn Suhs akan me kin rong oh kapwaiada padahk mehlelo. Siohwa kin pil ritingihda ahlo me kin kahluwalahng mour soutuk. Mehn Suhs tohto me kin mehlel ele mwein pahn sukuhliki duwen Siohwa, me iei ih Koht mehlel, pwe irail pil kak mour kohkohlahte nan sapwellimen Koht sampah kapw.​—Maika 4:​1-4.