Atail Doadoahk en Kalohk Kin Kasalehda Me Kitail Weksang Meteikan
1 Aramas tohto kin idek rehtail, “Dahme kahrehda Sounkadehdehn Siohwa kan kin wuksang pelien lamalam teikan?” Iaduwen ke pahn sapengla peidek wet? Ke kak kawehwe duwen atail padahk kan oh kawehwe me padahk koaros poahsoanehda pohn Pwuhk Sarawi. Ahpw, mie pak me ke medemedewe en kawehwe me kitail kin wia atail doadoahk en kalohk oh met kin kasalehda me kitail wuksang pelien lamalam teikan?—Madiu 24:14; 28:19, 20.
2 Rahnwet, aramas malaulau me iang pelien lamalam kan men ehukihong meteikan dahme re kin kamehlele. Re lemeleme me e itar en peikiong kosonned en sahpw, oh wia tiahk mwahu, oh kadek ong meteikan. Ahpw, re sohte kin pehm me mie arail pwukoah en sewese meteikan en sukuhliki dahme Pwuhk Sarawi kin kasalehda duwen dahme kitail anahne wia pwehn ale komourpatail. Iaduwen kitail kin weksang meteikan?
3 Atail ngoangki wia atail doadoahk en kalohk kin kasalehda me kitail uhdahn weksang pelien lamalam teikan. Sangete sounpahr 100 samwalahr, Sounkadehdehn Siohwa kan en rahnpwukat kin nannanti en kalohki Rongamwahu en Wehin Koht wasa koaros nan sampah, ni arail kin kahlemengih Kristian en mahs kan. Atail mehn akadei iei en sewese aramas tohto en mourki arail mour en pahrekiong kupwuren Koht.—1 Tim. 2:4; 2 Pit. 3:9.
4 Koaros kin Wehwehki Komwi Nin Duwen Emen me kin Ngoangki Kalohk? Aramas koaros kin wehwehki me komwi emen me kin ngoangki kalohki Mahsen en Koht? (Wiewia 17:2, 3; 18:25) Pwehki ahmw kin iang wia doadoahk en kalohk, mehn mpomw kan kin kilang wekpeseng nanpwungen arail pelien lamalam oh ahmw pelien lamalam? Koaros kin wehwehki me ke kin ngoangki kasalehong meteikan ahmw koapworopwor? Mie ahmw koasoandi en kaukaule iang kalohk? Tamataman me kitail weksang meteikan kaidehn ihte pwehki eden atail pelien lamalam, ahpw, pil pwehki dahme ahd wet kin wehwehki—atail kadehde ong meteikan duwen Siohwa.—Aiseia 43:10.
5 Limpoak ong Koht oh mehn mpatail pahn kamwekid kitail en iang doadoahk en kalohk. (Madiu 22:37-39) Ihme kahrehda, duwehte Sises oh sapwellime wahnpoaron kan, kitail men doadoahngki ahnsou mwahu koaros pwehn ehukihong meteikan duwen Wehin Koht. Kitail en nannanti kalohki Rongamwahu en Wehin Koht ong koaros me men rong. Ni atail wia met, kitail pahn sewese irail me mohngiong mehlel en “kilang wekpeseng en . . . me kin papah ie [Koht] oh me sohte kin papah ie.”—Malakai 3:18.