Ke Kin Wia Emen Me Nennen oh Namenek?
1 Kitail sohte kin pwuriamweiki ma kitail kin kilang kisin seri tikitik men kin rukuruk oh mwasamwasahn kitail ni ahnsou me e kin mihmi rehn ah pahpa de nohno. Ih duwen pali laud en seri kan . . . re kin namenek oh nennen ahnsou me re kin mihmi rehn aramas akan me re sohte ahn. Pil ahnsou me re kin laudla, ekei kin wia soangen aramas me namenek oh nennen. Ma ke kin apwalki kalohk pwehki ahmw nennen oh namenek, dahme ke kak wia?
2 Iaduwen Ke Kak Powehdi Ahmw Namenek: E kin kesempwal en kasawihada “mohngiongomw.” (1 Pet. 3:4, New World Translation) Kakehlail ahmw limpoak ong Siohwa oh mehn mpomw kan. Ken kamehlele sang nan kapehdomw me ma ke iang doadoahk en kalohk, e kin wia dah me keieu mwahu en kasalehda limpoak oh ngehnin tohnmetei. Ken wiahda ahmw koasoandi mwahu en wia pein ahmw onop oh kaukaule iang towehda mihding kan oh kapwaiada koasoandio. Kaukaule kapakap ong Siohwa oh peki sapwellime sawas ong ahmw kahpwal kan me ke pahn kasalehong ih. Ahmw pwoson kehlail oh likih Ih pahn sewese iuk en ngoang oh pahn kihong uhk “eimah ahnsou koaros ni ahmw pahn padapadahngkiseli mahseno.”—Phil. 1:14.
3 Peiong ahmw pepehm kan me ke sohte itar. Likamwete Timoty kin nantihong wia met. Pohl kangoange Timoty en “dehr mweidohng emen en mwamwahlikin uhk pwehki omw pwulopwul,” oh e pil katamankin ih me “Ngehn Sarawi me Koht kin ketikihong kitail sohte kin kahrehiong kitail masak; ahpw sapwellime Ngehno kin ketin audehkinkitailda manaman, limpoak, oh kin sewese kitail en kakaun atail ineng kan.” (1 Tim. 4:12; 2 Tim. 1:7) Siohwa ketin doadoahngki Timoty oh e kak pil doadoahngki uhk ma ke pahn kekeirada ni pali ngehn oh likih Ih ni soahng koaros me ke pahn wia.—Melkahka 56:11.
4 Ahnsou me emen pahn doudouloale iren Paipel ehu, duwehte Madiu 10:37, e kak sewese irail duwehte e sewese emen sister me kin namenek oh nennen me kahrehong ih en masak ah pwoud ohl me kin uhwong ih. Ahpw, pwehki e kin nannanti, e kin ekis ekis mengeila en iang kalohk, oh kedekedeo, ah pwoud, ah nohno oh rie ohl kan koaros pedolong nan padahk mehlel!
5 Kaunopada me Kesempwal: Ma ke pahn kaunopada mwahu ong kalohk, ahmw eimah oh ngoang pahn pil kekeirada. Pilada padahk mengei sang pwuhken Reasoning de Atail Doadoahk Ong Wehio en rahn teiko oh katengehdi nan ahmw madamadau dahme ke pahn nda oh praktis ahmw padahk. Ken dehr mweidong ahmw pwunod en poweiukedi ahpw ken ahneki madamadau me ke kak pweida. Ken eimah oh iang mehteikan nan kalohk oh ale sawas sang irail. Tamataman me pali laud en aramas me ke kin tuhwong nan kalohk kin namenek oh nennen duwehte kowe. Aramas koaros anahne rong Rongamwahu en Wehio.
6 Ma ke wia soangen aramas me kin namenek oh nennen, ke dehr nsensuwedla. Ma ke pahn nannanti, Siohwa kak sewese iuk en wiahla emen sounkalohk en Rongamwahu me koahiek. Ih ahnsou me ke pahn perenki iang doadoahk en kalohk.—Lepin Padahk 10:22.