Ke Kin Kalahnganki Sapwellimen Siohwa Kanengamah?
1 Ma Siohwa sohte kanengamah erein sounpahr 10, 20 oh sounpahr tohto sang mahs lel met, oh mweidong doadoahk en kalohk en wiawi erein ahnsou pwukat, ke lemeleme ke kak sukuhlikihdi padahk mehlel? Kitail uhdahn kalahngankihong Siohwa me e mweidong aramas tohto en “wiliakapwala.” Mehlel, kitail wehwehki me sapwellimen Siohwa Rahnen Kadeik “pahn leledo duwehte lipirap emen.” (2 Pit. 3:9, 10) Ihme kahrehda, kitail en dehr lemeleme me sapwellimen Siohwa kanengamah kin kahrehong Ih en kapwandehla kasohralahn koasoandi suwed wet.—Apakuk 2:3.
2 En Poakpoake Aramas akan: Kitail sohte kak uhdahn wehwehki sapwellimen Siohwa kanengamah. Kitail en dehr pohnsehsehla kahrepen Siohwa kin ketin kanengamah. (Sona 4:1-4, 11) Siohwa kin ketin mwahngih duwen irair suwed me aramas akan mihmi loale oh e kin ketin poakpoake irail. Sises kin pil duwehte. Pwehki e kin poakpoake aramas akan me kin kohdo reh pwehn rong sapwellime padahk kan, e kupwurki doadoahk en kalohk en lel aramas koaros pwe ma re mwahuki, re kak sukuhliki dahme re anahne wia pwehn ale mour soutuk.—Madiu 9:35-38.
3 Ni ahnsou me kahpwal kan de melimel kan de lapake kan kin lel aramas, ke soh kin poakehla irail kan me sohte wehwehki padahk mehlel? Aramas akan rahnwet kin rasehng “pelin sihpw ehu me sohte silepe” ni arail kin nantihong powehdi kahpwal kan oh kin song en wehwehki dahme kahrehda diren kahpwal kan rahnwet. (Mark 6:34) Ni atail pahn ngoangki kalohki Rongamwahuwo, kitail kin kamweitala irail me mongiong mehlel kan oh kasalehda me kitail kalahnganki sapwellimen Siohwa kanengamah.—Wiewia 13:48.
4 Atail Doadoahk Kin Karuwaru: Nan pahr me ahpwtehn nek, aramas 323,439 me papidaisla oh meh 14,000,000 samwa iang towehda Kataman. Mie koapworopwor me aramas tohto pil kakete pitsang kasohralahn koasoandi suwed wet! Ia uwen tohtohn aramas me pahn iang “pokon kalaimwun” kitail sehse. (Kaudiahl 7:9) Ia uwen werei doadoahk en kalohk pahn wiawi, kitail pil sehse. Ahpw Siohwa kin ketin mwahngih soahng pwukat. Doadoahk en kalohki Rongamwahu pahn wiawi lao lel ahnsou me Siohwa pahn kileledi, oh ih ahnsou me “imwin sampah ahpw pahn kohdo.”—Madiu 24:14.
5 Atail ahnsou mwotomwotlahr, oh Rahnen Koht kerendohr. (1 Kor. 7:29a; Ipru 10:37) Kitail kak kamehlele me “ahnsoun atail mourla kerendohngkitailehr, kerensang ahnsoun atail tepin pwosonla.” (Rom 13:11) Kitail en dehr pohnsehsehla kahrepe kan me Siohwa kin kasalehda kanengamah. Kitail en ngoangki kalohk pwehn sewese aramas tohto me men sukuhliki padahk mehlel en kak pehm sapwellimen Siohwa mahk-kalahngan.