“Tangowei Uwen Omw Kak Nan Weirentang en Pwoson”
1 Wahnpoaron Pohl kaweidki Timoty en “tangowei uwen omw kak nan weirentang en pwoson.” (1 Tim. 6:12) Pein Pohl kin mourki lepin mahsen pwukat. Ahnsou me e mahlahr, e kasalehda, ni eimah, me e wia uwen me e kak en tang kehlail nan weirentang en pwoson. (2 Tim. 4:6-8) Ni soangen ahl koaros, e kin nantihong kalohk ni eimah, ngoang oh kanengamah. Ni atail kin kahlemengih mehn kahlemeng mwahu en Pohl, kitail kak kamehlele me kitail kin wia uwen me kitail kak en tang kehlail nan weirentang en pwoson.
2 En Pwerisek: Pohl kin doadoahk laud nan kalohk. (1 Kor. 15:10) Kitail pil anahne doadoahk laud ma kitail men diar irail koaros me perenki rong nan atail wasahn kalohk. (Madiu 10:11) Pwehn tuhwong irail, mwein ke anahne pirida mwadang oh kalohk ong irail me kin alu nanial. De mwein ke anahne kalohk mwurin souwas de ni soutik pwehn tuhwong aramas me kin pwurala nan imwarail mwurin doadoahk de sukuhl.
3 Pwehn lel wasahn tuhpenehn kalohk mwohn mihding en kalohk pahn tepida, kitail anahne wiahda atail koasoandi mwahu oh kolokol koasoandio. Karasepe ehu, ekei tohnBethel kan kin anahne kohla wasahn tuhpenehn kalohk me dohkihsang Bethel minit 60 pwehn iang tohn arail mwomwohdiso kalohk nan arail wasahn kalohk. Pil ehu, kitail pil kin kilang me ekei sounkalohk kan oh peneinei kan nan pein atail mwomwohdiso pil anahne mwadang mwesel sang imwarail pwehn lel wasahn tuhpenehn kalohk mwohn mihding en kalohk pahn tepida oh kitail wadekala irail. Sounkalohk pwukat me kin nannanti oh koasoanehdi mwahu koasoandi kan kin wia mehn kahlemeng mwahu ong kitail.
4 Kitail anahne pwurehng pwurala rehn aramas koaros me kin perenki rong. Ahnsou me kitail kin kihla makisihn kan de brochure kan rehn aramas me kitail kin tuhwong nanial de wasa sohte lipilipil, e pahn mwahu en idek rehn aramaso iawasa e kin mihmi ie oh nah telephone nempe pwehn kak pwurehng pwurala reh. Ahnsou me kitail pahn pwurehng tuhwong aramaso, kitail kak nantihong tepida onop Paipel reh.
5 Kaukaule Iang Kalohk: Pohl kin kaukaule iang kalohk oh e kin nantihong kalohk ong aramas koaros. (Rom 15:19) Iaduwen kowe? Ke kin kaukaule iang kalohk? Ke iangehr kalohk sounpwonget? Irail brother kan me kin wia Pwuhk Study en Mwomwohdiso kin perenki kilang sounkalohk koaros nan arail Pwuhk Study iang kalohk nan August. Brother pwukat pahn kak sewese iuk en wia met.
6 Ma kitail kahlemengih mehn kahlemeng mwahu en Pohl en utungada doadoahk en kalohki rongamwahu, kitail pahn “wia uwen me kitail kak nan weirentang en pwoson.”