Ke Kin Dadaurete?

¹ “Sohte me I perenki sang ei rong me nei seri kan kin momourki mour mehlel.” (3 Sohn 4) Ahnsou me Sohn kin kilang nah seri ni pali ngehn wie dadaurete, e kin kihong ih peren laud. Siohwa pil kin perenki kilang aramas rar rar kei me kakete wiahla sapwellime seri kan “momourki mour mehlel”!​—Lepin Padahk 23:15, 16; 27:11.

² Edetehn pali laud en sapwellimen Koht aramas akan kin nantihong ngoangki soahng kan me pid mour en Kristian, ekei solahr nohn ngoangki soahng ngehnin kan duwehte mahs. Edetehn re ngoangki soahng ngehnin kan ahnsou me re ahpwtehn sukuhliki padahk mehlel, ahpw, mwurin sounpahr kei, re solahr kin kaukaule iang kalohk oh ekei pak re sohte kin iang kalohk nan ekei sounpwong kan.

³ Se kin wehwehki me ekei solahr kin iang kalohk duwehte mahs pwehki soumwahu kan me re ahpwtehn iangada de re wie mahmahlahr. Se men kapinga irail pwe re kin nannanti mendahki soahng pwukat. Re kin wia uwen me re kak. Ahpw, emen emen kitail me inoukihong Koht atail mour kak idek pein rehtail: ‘I kin mweidong pein ngehi en kedirepwki soahng teikan likin soahng kan me pid mwohnki mahs Wehio oh soahng ngehnin kan kin uhd solahr nohn kesempwal? I solahr nohn ngoangki soahng ngehnin ahpw I “sohte karakar de . . . sohte lemwulemwur,” de I kin “nantihong” duwehte mahs? (Kaudiahl 3:​15, 16; Luk 13:24) Kitail koaros en medemedewe oh kapakap ahnsou me kitail kin kasawihada dahme kitail wia oh wasa kan me kitail anahne kamwahuihala, oh kitail en tamataman me Siohwa kin “ketikihong aramas koaros me kin wiewia me mwahu, lingan, wahu, oh popohl.”​—Rom 2:​10.

⁴ Iaduwen Kitail Kak Dadaur: Dahme sewese Sises en dadaur? Pohl kawehwehda: “Pwehki peren me e kasikasik, e sohte mwahn kupwurohkihla kanamenekpen eh pahn pwoula nin [tuhke]; eri ahnsou wet e ketiketier ni palimaun en mwoalen Koht.” (Ipru 12:​1-3) Peren me Sises kin kasikasik mihmi nan eh madamadau laud sang kalokolok kan me e anahne dadaur ahnsoukis. Ma kitail kin pil tamataman oh kasikasik peren me kitail pahn ahneki ni ahnsou kohkohdo, met pahn pil sewese kitail en dadaur. (Kaudiahl 21:​4, 7; 22:12) Ma kitail kilangwong Siohwa pwehn kihong kitail sapwellime kehl sang ni atail kin pein onop Pwuhk Sarawi, kaukaule iang towehda mihding kan koaros oh kapakap ahnsou koaros, kitail pahn kak dadaurete nan doadoahk me e ketikihong kitail en wia.

⁵ Siohwa kin perenki kilang sapwellime aramas lelepek kan dadaur. Kitail en kaperenda Siohwa ni atail kin “momourki mour mehlel.”